一個香港留學生在美國的生活: 買琴

踏入十月，天氣開始轉涼，學校功課亦變得越來越多，除咗中期試之外，仲有一大堆Project要做，而小詠因為主修Marketing，Group Project更加係個個禮拜唔停，而同一時間我地又要忙𢴇屋，選購裝修材料，買傢私等等！結果就係weekdays返學去圖書館，weekend就Shopping。忙碌嘅生活令我同小詠見面時間越嚟越少，磨擦自然多咗。  

今日係禮拜六，我同小詠一早去咗一間賣廚房浴室設備嘅店舖，單單買浴室配件已經用咗兩個禮拜，小詠喜歡花巧裝飾，我喜歡比較現代簡約設計，最終決定主人房廁所用小詠選擇，其餘幾個廁所由我拍板！至於廚房，基本上只有我煮飯，所以我可以話晒事！  

新屋其他傢具已經買得七七八八，今日另一重點係買琴，我同小詠中午好快咁響附近食完麥當勞，就趕去琴行，我係呢間琴行常客，亦介紹好多學生嚟買琴書同樂器，入面店員都認得我，其中個阿伯Steve仲係我買小提琴個Sales，我早已經約好佢今日睇琴，我一直渴望有部Steinway Grand Piano，試咗幾次琴之後，最後決定買Model D 6’2 Concert Grand，連稅加運費大約五萬。今日去其實係簽單比錢，阿伯一見到我就四萬咁口，入到去簽好晒啲Paperwork之後，Steve伯伯「呢個係你學生？」佢第一次見小詠，「唔係啦！呢個係我女朋友，佢都彈琴㗎！係呢，我想買幾本Four Hands，可以同我女朋友一齊玩下！」「咁你去嗰邊睇吓啦！你係行家，我就唔多做介紹啦！」小詠未嚟過呢間琴行，我就同佢講「嗱，後面白色嗰都Steinway就係我哋部新琴，你去試吓啦！」小詠過嚟美國之前啱啱考完八級，不過兩年冇彈，已經有啲生疏，雖然係咁，佢嘅樣貌氣質都吸引到唔少人圍觀！  

最後我揀咗Brahms Hungarian Dances，Steve伯「不如你同你女朋友試吓彈，表演下？」小詠就話「我唔得㗎啦！太耐冇彈！」「試吓啦！我慢慢彈就住你，warm up 咗就順㗎啦！」於是我打開本譜，揀咗#5:  

https://youtu.be/zWXhtZsKVtI  



一如所料，小詠太耐冇彈，彈得唔順，不過彈咗十幾節之後已經好好多，最終順利彈完全首！四圍掌聲不斷，Steve就繼續不停叫我響度教琴！我當然推得就推，跟著再同Steve約好送琴時間，之後就離開琴行，睇下鐘，兩點未到，打算去新屋睇下裝修進度「我等陣要返圖書館做Project，要你車我返學校先呀！」「又做Project？平日已經冇時間見面，weekend都仲要做？」「Group Project呀！唔去唔好嘅！」「咁今晚去邊度食？幾點接你？」「唔好等我啦，我可能做到好夜！」「你究竟同啲乜人做Project？要日日做，仲要Weekend都唔放人？」我開始有啲火「同班同學囉！你讀Finance又唔會識嘅！」其實我估到係班印尼仔，但係如果我因為咁唔比佢去實炒大鑊，「你自己知道乜嘢重要，我車你去啦！之後我自己睇屋！」「唔係嬲啦！我聽日陪你！」「咁今晚幾接你？」「我打比你啦！如唔係，細佬接我都得！」  

送咗小詠返圖書館之後，我腦海中一直浮現班印尼仔個樣，再諗返起Aaron講嘅嘢，個心好唔舒服，小詠應該知道我唔鍾意佢同班印尼仔一齊，但係又同佢地同班同group做Project，我感覺到我同小詠之間嘈交多咗，一個禮拜可能連一次做愛嘅機會都冇。胡思亂想一輪，好快去到教屋，工人正在鋪設地板，我同工頭交代今日買嘅浴室水龍頭面盤廚櫃，攪攪下已經到咗黃昏，工人收工，我亦打算返屋企。  

沿住五號公路響北，會先經過大學出口先會返到屋企，突然間我想返學校睇下小詠所講嘅同班同學係咪班印尼人，雖然估到，但始終唔係親眼見！最後我真係Exit咗大學出口，泊咗車，行咗去圖書館。Weekend圖書館唔多人，尤其是黃昏，我上到二樓，行到盡頭有一排細房，做Group Project好多時會搵間房Meet up，入面有長枱white board仲有四五張櫈，我慢慢走過，大部分房都有人meeting，終於去到第五間房，我見到小詠，仲有兩個男仔，一左一右坐喺隔離，冇錯，係上次響Student Union Canteen見過同一班印尼人！我若無其事咁走過，佢哋應該冇發現我，我已經搵到答案，於是我攞車，再返屋企。