一個香港留學生在美國的生活: 小詠外傳-阿浩（1）

阿浩坐嘅係由香港直航三藩市UAL班早機，到達三藩市國際機場嘅時候大概係朝頭早九點半！由於佢唔係美國公民，以留學生身份第一次入境，手續上係需要耐啲嘅時間，連埋攞行李過海關出閘，差唔多用咗一個半鐘頭，小詠響接機大堂望住出閘口，足足等咗半個鐘頭先見到阿浩出現！  

今年啱啱19歲嘅阿浩，身高五呎十，濃眉大眼，臉上有兩個酒窩，個樣同林志穎真係有八成相似，響香港讀中學嘅時候已經有過兩個女朋友，而佢喺美國嘅生活，由於冇父母嘅管束，又係同我哋一齊住，感情生活比香港更為多姿多彩！佢喺呢度啲女真係走馬燈咁轉，耐唔中就有唔同嘅女仔喺我哋屋企過夜，響大學入邊係出咗名嘅Player，而佢嘅故事以後會再交代。  

阿浩見到小詠，推住行李車行過去大叫「家姐！」，之後一個熊抱將小詠抱住，阿浩足足高過小詠一個頭，小詠畀佢抱住跟郁唔到「快啲放手，咁多人呢度！喂啊！透唔到氣啦！」「快啲去攞車！我未坐過家姐開車！去邊度攞車呀？」阿浩放低小詠，推住架行李車四圍望！「左邊呀！」小詠繞住阿浩隻手，一路行一路講！而圍嘅人都注意到佢哋，唔知道嘅話，佢哋絕對係一對熱戀中嘅情侶！  

去到停車場，「嘩！CLK！正呀！」「係阿偉部車！你響香港有冇見到佢呀！」「更係有啦！姐夫部車咁正！可以畀我揸就好啦！」「你快啲考車先啦！阿爸話過會買車畀我地！」「會唔會買咁正嘅跑車先？」「到時再講啦！要唔要食飯先呀！要開一個幾鐘頭車先返到屋企！」「咁食咗飯先啦！飛機餐又難食份量又小！好肚餓呀！」「咁你想食乜？」「啱啱嚟美國更係食Burger啦！」「咁我同你去間正宗美國漢堡餐廳，以前同阿偉去過幾次，唔係麥當勞啲快餐咁嘅！」  

於是小詠就同佢細佬先去食飯，再開車返大學城屋企！禮拜六交通比較暢順，食完飯開車返到屋企都係三點左右！一入到屋阿浩就好興奮咁四圍參觀！「嘩！間屋好大啊！仲有咁大個露台！我間房呢？」「左邊間係我同阿偉，右邊係你嘅！」「吓？你唔係自己一間咩？你壞啦！學人同居！」「你八卦啦！你唔好咁多口！如果唔係我趕你瞓街！」「阿爸阿媽以為你自己住！」「所以你唔好多口！穿煲我唯你是問！」  



入到房放低行李，阿浩就入去廁所準備沖涼。「嘩！美國地方就係大！連廁所都咁大，但係點解冇浴缸，只得花酒？」「冇浴缸咪仲好，唔洗咁污糟！以前次次你浸完浴缸都要我幫你清潔，嚟到呢度鬼同你做咁多嘢！」  

小詠響外邊幫阿浩整理行李，家俱同床都係阿君留低，所有嘢都係現成。廁所傳出水聲，阿浩一邊沖涼一邊唱歌「家姐你幫我攞毛巾同底衫褲吖！」小詠響喼入面摷咗套底衫褲攞條大毛巾，再攞入廁所「你咁大個仔可唔可以閂埋門沖涼？」「怕乜嘢喎！以前我哋成日一齊沖㗎啦！係呢兩年你去咗美國先至冇之麻！」「以前你細個，依家點同！何況仲有阿偉響度！你諗都唔好諗！」放低毛巾衫褲，小詠就出返去！