一個香港留學生在美國的生活: 別離

瞓醒第二朝，睇下個鐘八點未夠，我依然係第一個起身，今日係禮拜日，亦都係假期最後一日，大家返屋企過埋呢個學期就會各散東西，下次見面已經唔知會係幾時，諗起都覺得傷感！  

行李已經執得七七八八，我見小詠仲瞓緊，於是我刷牙洗面換衫，決定走之前再次行下湖邊。我返去同一間餐廳坐同一張枱叫咗個同一樣嘅早餐，一邊食一邊聽歌享受難得嘅寧靜。可能呢幾日大家玩得太攰，一直到食完早餐都冇人打電話搵我。  

埋單之後，我沿著同一條路徑慢慢行返大屋，行咗一半，Joe終於打畀我：「老人家，咁早一個人晨運呀？」「你可唔可以唔好一早起身就咁口臭得唔得？」「咁我未擦牙吖嘛！你響邊呀！一早唔見人！」「大哥，十點啦！仲早！我行緊返嚟，我打算中午前開車走。」「吓？唔食埋晏先？」「唔食啦！我怕回程塞車！」講講下，其實我已經返到屋，打開門入到大廳，依舊空無一人！「喂！我返到屋啦！你響邊呀又話起咗身？」「你等等，我著返衫落嚟！」收咗線冇耐就見到Joe從樓上落嚟！睇佢個樣尋晚肯定又同Joyce大戰！「你可唔可以唔好咁明目張膽同Joyce一齊？」「男未婚女未嫁，有乜所謂？」「我怕你遲早出事！你睇吓Alan同阿健！」「人同人唔一樣，你唔洗擔心喎！我身經百戰，冇事嘅！」「你睇路啦！條路自己揀，扑街唔好喊！」  

呢個時候，其他人開始起身，阿君小敏第一個攞行李落樓，小敏同我地打招呼後去廚房煮早餐，之後Alan同Kim都落咗嚟！「你地小心開車，我就唔送啦！希望有機會可以再見面一齊玩！」Joe佢哋呢個禮拜先至Spring Break，所以佢哋會留多幾日先返三藩市！我同阿君Alan就要趕返屋企準備返學，我下個禮拜除咗有期中考試，交group project，仲要考琴！冇錯，呢個係我離開香港後第一次自己報名考六級小提琴！所以嚟緊呢個禮拜會係十分之忙碌嘅一個星期！  

食完早餐我地直接開車返屋企，由於係禮拜日，回程交通比較差，本來兩個小時車程變成六個鐘！返到去已經差不多食晚飯！  



開咗咁耐車大家都好攰，唔想喺屋企煮，於是時就約埋一齊出去食飯。食飯嘅時候大家終於講到住屋嘅問題「還有一個好月我和小敏就會搬走，到時你們要再找roommate還是搬去小一點的房子 ？」「我哋應該唔會搬啦！呢度住得舒服，再加上暑假小詠細佬會由香港搬過嚟預備九月開學，到時候兩間房我哋三個人住啱啱好！」「差點兒忘記了小詠弟弟會過來讀書。這樣我也不會不好意思要你多付租金！」「其實租約仲有六七個月，完咗之後我先再考慮會唔會搬屋！如果有機會，我可能會響附近買一間屋當作投資，到時先再算啦！」  

就係咁樣，我哋安排好阿君同小敏搬走之後嘅住屋問題。餘下嘅日子過得好快，轉眼已經到咗學期尾，阿君同小敏考試結束後一個禮拜就將所有行李搬走，佢哋一齊轉左去東岸另一間大學繼續junior year，而我同小詠就留返響度讀summer school。  

阿君走咗唔夠一個禮拜又到Alan同Kim兩個走，睇住讀咗兩年大學同學一個一個咁走，唔傷心就假嘅！好彩仲有小詠響度陪我，再講，呢個暑假成間屋就只係得返我哋兩個人個二人世界，每一日除咗返學放學買餸煮飯，餘下嘅時間就係行街睇戲食飯，只係情侶嘅生活開始變得平淡，好似有啲老夫老妻嘅感覺。估唔到嘅係，呢一個暑假正係我同小詠關係嘅轉捩點。