一個香港留學生在美國的生活: Tahoe（1）

整個三月風平浪靜之下渡過，小詠冇再喺學校同嗰幾個印尼仔Hang Out，一放咗學就會即刻返屋企陪我，不過我知道件事係未完嘅，響學校canteen時不時我都會見到嗰幾個印尼仔，每次見到面佢哋都會用一啲好唔友善嘅眼光望我，我當然唔會理佢啦！阿健就好似人間蒸發咁，同我哋斷晒來往，雖然耐唔中響學校我都會見到佢，不過大家都已經冇嘢講。Alan呢，就通知我佢同Kim已經申請咗Florida嗰邊嘅大學，好大機會呢個學期完咗之後就會搬走。我聽到當然有啲失落啦！身邊有朋友一個一個咁離開，我估如果唔係佢同阿健反咗面，佢應該會讀到畢業先至走。不過世事嘅嘢係冇如果嘅，事情發生咗大家總要面對後果。  

 三月尾最後一個禮拜係Spring Break，放假之前已經考晒試，由於過咗呢個學期之後Alan同埋阿君都會轉校，所以我哋打算約埋一齊去個旅行。Lake Tahoe係響我哋住嘅呢個大學城比較近嘅度假區，冬天嗰度係一個滑雪勝地，我唔係一個鍾意滑雪嘅人，所以冬天我係唔會去嘅，三月尾四月初已經開始融雪，氣溫雖然仍然係凍，但係起碼唔係冰天雪地。  

Lake Tahoe 唔算太大，主要嘅旅遊區係西面嘅Tahoe City同南邊嘅South Lake Tahoe。今次我哋去嘅係Tahoe City，因為Joe少佢阿爸響嗰度有間六間房四千幾呎嘅渡假屋， 可以免費俾我哋住。  

由於我地Spring Break嘅時間同Joe間學校唔一樣，所以我哋會禮拜三先開車入去，Joe同其他人禮拜五先出發。除咗我哋之外，David Yoyo Amy 同 Joyce都會一齊入嚟，聽阿Joe講， Amy又回復返單身，至於Joyce嘅男朋友屋企有事，呢個weekend冇辦法同我哋一齊玩。  

禮拜三一大早我哋就開車出發，我同Alan阿君係分開三部車，沿住HWY80向東行大概兩個鐘頭車程，全程都係上山嘅方向，海拔越來越高，行到最後一段路，沿途開始有雪，再睇吓路牌，原來已經去到海拔四千幾呎，呢條公路其實我哋以前都行過，上一次係行同一條路同小詠去Reno。我哋去到一個小鎮叫做Trukee就轉右有一條細啲嘅公路，其實就已經入咗Lake Tahoe範圍，後邊條細路仔行多大概20分鐘就到Joe間渡假屋！  



乜嘢係豪宅呢？呢間就肯定係！呢間屋其實唔係好貴，聽Joe講，佢阿爸早幾年先買，全間屋重新裝修，買屋連埋裝修費都唔使八十萬美金，寬大嘅落地玻璃可以望到成個Lake Tahoe，四千八百尺，三層樓高， 二樓陽台仲有按摩浴池，六間睡房六個廁所唔知幾多個廳，如果呢間屋放喺香港賣，恐怕係億億聲！ 

我哋一人揀咗一間房，整理完行李，我哋一行六個人就去咗附近嘅超級市場買餸，呢度附近冇乜好嘅餐廳，我哋人多其實都係打算喺屋企入邊煮下飯仔。禮拜五等埋Joe佢哋入嚟之後我地會去Hiking。   

買完餸返屋企已經差唔多下晝四點，雖然仲未天黑，但係氣溫已經降到差唔多零度，好彩間屋有中央暖氣，大廳仲有個火爐，今晚餐飯Alan同我負責，其他人就上咗3樓睇戲，原來三樓除咗一間大嘅主人套房之外，仲有一個大嘅私人影院，可惜嘅係我哋唔知道有啲咁嘅設備，呢度嘅影碟唔係好多選擇，好多都係舊嘅，如果唔係我哋應該一早去租幾隻碟返嚟睇！