一個香港留學生在美國的生活: 回美

Aaron我同小詠訂咗同一班飛機響一月廿日飛番三藩市，今年今年Spring Semester開學第一日係二月一日，返到去仲有個零禮拜先開學，應該有足夠時間選科同埋登記讀邊一堂，之後仲要買書準備開學。 

距離上機仲有幾日，我哋三個分別都要陪屋企人，仲要作最後衝刺買日用品帶返去美國，所以都唔會有機會見面。呢幾日大部份時間都係同阿媽一齊，差唔多每一日阿媽放學之後都會同我去探婆婆，差唔多每一日阿媽放學之後都會同我去探婆婆，婆婆已經80歲，身體大不如前，起居飲食都已經要人照顧，記得細個嘅時候阿爸阿媽工作好忙，好多時都係嫲嫲同婆婆輪流照顧我同細佬，去咗美國一年多，再返嚟見到婆婆嘅時候，發覺佢真係老咗好多，所以剩返呢幾日喺香港嘅時間，我盡量都會陪婆婆傾偈食飯。   

至於細佬阿傑，響英國返嚟第二日就已經返咗溫哥華，佢開學俾我哋早，所以唔可以喺香港留咁耐。講起阿傑，唔可以唔提嘅就係佢個女朋友，阿傑已經成功追到呢個女仔，原來今年聖誕個女仔都返咗香港，只不過阿傑從來都冇提，直到我哋去機場送佢機嘅時候，先第一次見到呢個女仔！嗰女仔叫做Joanne，同我上次去溫哥華睇相個樣差唔多，不過真人非常可愛，阿傑都算有眼光，個女仔開朗大方，主動同阿爸阿媽同我打招呼！阿傑大學畢業無耐就同呢個女仔結婚，後來搬埋去多倫多，生咗兩個小朋友，到而家都係咁恩愛。  

送完阿傑機之後，阿媽就不停咁問我關於呢個女仔嘅嘢，我又點會知啊！我都係第一次見，阿爸就陰陰咀咁笑，好彩阿爸一句都冇提過關於小詠，睇嚟暫時唔俾阿媽知係一個正確嘅選擇！  

放假嘅日子真係過得好快㗎，眨吓眼已經到咗要上機嗰日，今次我哋坐嘅係早機，由香港直航三藩市，我同小詠約好咗響機場入閘嘅地方見，由於阿媽要返學。雖然今日係禮拜六，但係阿媽要返學校開會，所以又係只係阿爸嚟送機。去到機場阿爸第二次見到小詠，唯一唔同嘅係小詠嘅父母都在場，禮貌上我哋大家互相介紹傾咗兩句，我同小詠都有啲緊張，不過醜婦終須見家翁，要來嘅總係會嚟，大家辦完登機手續之後，去咗附近坐低食少少嘢，之後就一齊入閘。 入到去先發覺原來唔知幾時Aaron已經響候機室入邊，「點啊兩位，見完家長未啊！」Aaron一見到我哋兩個就笑笑口咁問，「見乜嘢家長啊！又唔係第一次見！」一個人出國留學要同屋企人分開，好彩係身邊仲有一班朋友陪伴，我哋傾吓講吓好快就到左相機嘅時候，我哋訂機位嘅時候已經畫咗會坐埋一齊，呢個時候嘅飛機都係大機，經濟艙係三個四個三個一排，好多人會以為我哋三個一定會揀三個人一排嘅位，咁你就錯啦！我哋商量過之後，決定坐中間四人一排嘅位，中間會留空一個，如果班機唔滿，照計中間嘅單人位係冇人會坐嘅，咁樣我哋變相就係三個人霸左四個人嘅位！最差嘅情況係中間嗰個位俾人坐咗，咁我哋都可以同嗰個人講俾佢坐路口位，咁我哋三個一樣可以坐埋一齊！而事實上我哋嘅計劃係成功嘅，到咗起機嘅時候中間個空位都冇人坐，所以全程機我哋都坐得好舒服，小詠甚至可以打橫瞓兩個位休息。  



美國飛番香港大約14個半鐘，由香港飛番美國就13個鐘都唔使！睇咗兩套電影，食埋飛機餐，已經差唔多到步。攞完行李過咗海關，響出閘嘅地方小玲已經喺度等緊，小詠會留響三藩市陪小玲兩日先，之後先會返入大學城。而我同Aaron就會租車自己揸返屋企。  

人生總係充滿唔同嘅意外，估唔到小詠決定留響三藩市陪小玲兩日，埋下咗半年之後佢第一次偷食嘅伏筆。呢個已經係後話，而我同Aaron返到去屋企，我哋又要面對另一場大風暴！