一個香港留學生在美國的生活: Cats

1998年嘅除夕並冇同Addie過，我同阿爸阿媽細佬響12月30號一早開車離開咗倫敦，去咗一個叫Exeter嘅地方，阿爸有一個舊同事退休之後移咗民去呢度，相比倫敦，Exeter算係比較鄉下嘅地方，人口唔多，只有十二三萬人左右，九成半以上都係百人，幾乎完全見唔到其他香港人！  

我哋一家響呢個Uncle屋企住咗兩晚，冇特別慶祝新年，只係響屋企食咗兩餐豐富嘅英國式住家飯，順便亦都遊覽下呢個羅馬帝國時期已經建成嘅古城。呢個古城嘅歷史可以追溯到公元55年，羅馬人啱啱到達建立嘅軍事堡壘，我一個人響舊城區行，沿途見到好多舊城遺址，仲有好多古舊教堂，比較可惜嘅係假期，大部份嘅建築物都已經關門，入唔到去入邊睇，當我正準備行返屋企嘅時候，電話就響啦「阿偉，你響邊呀」原來係Addie打嚟「我一個人響Exeter舊城區行緊，呢個好靚呀，我影咗好多相，返嚟俾你睇啊！」「好啊！我打嚟係想問你有冇興趣一齊去睇Musical？」「有興趣喎！我要1月1號晚先會返倫敦，你打算邊一日去睇呀？」「不如1月3號晚啦？我知道嗰晚仲有飛賣，如果你冇問題我就買飛啦！」「好啊！咁就麻煩你！我返到倫敦之後再打俾你啦！」  

管弦樂團嘅演奏我就聽得多，Opera同Musical就從未睇過！到咗3號嗰日，我約咗Addie食咗晚飯先，開場時間係七點，所以要好早食飯，呢場Musical表演場地係New London Theatre，即係今日嘅Gillian Lynne Theatre，就響Covent Garden區，我同Addie響附近搵咗間意大利餐廳，快快手手食完飯就一齊入場。今晚睇嘅係Cats，  同Phantom of the Opera一樣，都係Andrew Lloyd Webber嘅作品，當時嘅我對於英國嘅broadway show冇乜認識，完全係出於好奇去睇， Addie買嘅喺樓上balcony，我哋去到嘅時候已經坐滿人，坐低之後冇耐音樂劇就開始。  

全套歌劇分上下兩節，大約三個幾鐘頭，屬於近代嘅音樂，同傳統嘅Opera有好大分別，不過音樂同故事都十分好聽同吸引人，對我來講真係大開眼界！  

睇完歌劇已經差唔多11點，我叫咗㗎的士先送Addie返佢同我屋企，Addie就同我講「我後日就返三藩市啦，好多謝你呢個幾禮拜陪我玩咗咁耐，我好開心呀！返到美國我又回復返係你學生嘅身份啦！」呢兩個禮拜我哋係玩得好開心，其實關係就十分曖昧，唔係男女朋友但係又好似男女朋友咁一齊玩，其實我明白Addie嘅心意，但係我仲未白癡到會一腳踏兩船，掘個坑畀自己跳，我選擇逃避「咁你返到去就俾心機練琴，開學嘅時候俾啲驚喜我，好唔好？」            



餘下嘅車程我哋都冇乜點講嘢，到咗佢同學屋企門口，我就同佢一齊落車，送到佢門口我就同佢講再見，正當我準備轉身離開嘅時候，Addie突然係我塊面度錫左一啖，之後轉頭就跑左入屋。我呆咗幾秒，搖一搖頭返番上的士度返屋企。  

我同Addie像霧又像花短暫而曖昧嘅關係算係暫時性嘅結束，如喺倫敦日子我都係同屋企過，參加完婚禮之後兩日我哋又去咗巴黎停留咗五日先至返香港。返到香港我先知道小詠已經喺日本返咗嚟，於是第二日我哋就約出嚟見面，一齊嘅仲有Aaron同佢女朋友。