一個香港留學生在美國的生活: Sophomore

1998年Fall Semester開學日係8月31號，正式開始我大學第二年嘅生活。雖然我同小詠已經係同一間學校，但係今個學期都只有兩堂係同時間同一班，講到尾我同小詠主修嘅科目並一樣，不過點都好，落咗堂之後我哋都會一齊去圖書館或者去食飯。加上同住一齊，基本上算係形影不離。  

大學第二年嘅生活應該係最舒服嘅一年，經過第一年嘅學習同適應，所有嘢都已經上咗軌道，而要學習嘅科目又唔算太難，輕輕鬆鬆就可以過關，雖然唔係科科A，但係都可以維持GPA 3.5以上，我已經好滿意！交談琴方面我就繼續響大學兼職，除咗Joey之外我仲多咗另外一個香港人學生Addie ，而我自己呢，就報咗名下一年嘅三月考小提琴六級試。  

至於Alan阿健Aaron阿君幾個，今個學期都分別take唔同嘅班，大家嘅schedule唔一樣，好難再一齊上堂，見面嘅時候通常都係Student Union或者響圖書館，每個禮拜亦總會有一兩日去Alan屋企食。而我呢，自從同小詠住埋一齊之後，我開始煮飯煮多咗，我對飲飲食食同煮飯都十分有興趣，最初用廚房最多嘅係小敏，後來小詠搬咗入嚟之後就係佢同小敏兩個經常煮飯，到咗暑假八月嘅時候，從南加州返嚟，實在太得閒呀又未曾開學，於是我就攞咗阿媽喺香港寄過嚟嘅食譜開始鑽研，慢慢個廚房就變成左我嘅實驗室，我越煮嘅次數就越多，早餐午餐晚餐我都有煮，正所謂熟能生巧，我嘅廚藝都進步得好快，唔使兩三個月，我已經被公認為全屋企煮飯最好食嗰個，咁當然順理成章以後煮飯嘅重責做落喺我身上。  

九月尾迎嚟咗我二十歲嘅生日，亦係第一個小詠陪我一齊過嘅生日！由於正日係禮拜三，大家都要上堂，所以生日party就改咗響我生日之前嗰個禮拜六日，其實所謂生日party咪又係飲飲食食打牌唱K，Joe禮拜六一早入嚟陪我過生日，響我哋屋企住咗一個weekend，禮拜日在全日響屋企開party。  

日子過得好快，我轉眼間已經到咗Thanksgiving，學校有一個禮拜嘅假期，係呢個學期開始阿健正式同秋子拍拖，不過秋子就冇搬去阿健屋企住，只會耐唔中響佢嗰度過夜。Thanksgiving嗰一個禮拜假期我就同小詠兩個人去玩，最後我哋決定去Reno。本來Aaron又話要同我哋一齊去嘅，但係如果佢去就會同埋Joey一齊去，佢同Joey又唔係男女朋友，最重要嘅係自從小詠搬咗入嚟之後，我已經盡量少見Joey，我更加冇同小詠一齊去Café食飯，所以我就一口拒絕咗Aaron加入同我哋一齊去旅行！   



講返我同小詠之間嘅關係，我估由佢七月搬入嚟同我一齊住，已經差唔多半年，我相信我哋仍然處於蜜月期，我記憶中呢六個月差唔多冇嘈過交，我哋差唔多每一晚都會做愛，有時一日會有兩次，從無間斷，有時候我好攰又或者考試期間我想休息一下，小詠都唔會放過我，老實講我覺得小詠係有性上癮嘅問題！為咗更加刺激同埋增加樂趣，我哋開始玩性玩具，包括按摩棒震蛋等等，但係好似都滿足唔到小詠嘅慾望，今次嘅旅行，佢就係想有多啲二人世界！