一個香港留學生在美國的生活: 南加(2)

Kettleman City差唔多係每一個開車落LA又或者上三藩市嘅旅客必停中途站，呢個小鎮其實唔大，根據路牌嘅資料，全個小鎮大約千五人左右，主要係餐廳油站同埋小型酒店。酒店就其實冇乜人住嘅，會住嘅主要都係啲長途貨櫃車司機，旅客呢一般只會食下嘢屙個尿入滿油就會繼續上路。  

餐廳嘅類型主要係連鎖快餐店，絕大部份響美國搵到嘅快餐店牌子呢度都有。我哋出咗exit之後直接去咗麥當勞，入到去之後先發覺人山人海，除咗呢個小鎮之外附近基本上都係農場同埋荒地，所有人要食飯去廁所都要嚟呢一度。最有趣嘅係呢度嘅遊客大多數係講普通話同廣東話，唔講你仲以為返咗香港！  

買嘢食要排隊，屙尿都要排隊！我哋食完晒嘢又入埋油已經差唔多三點，估唔到咁樣搞一搞就已經冇咗兩個鐘，如果交通暢順又唔塞車，我哋仲要查多大約三個鐘先至入到LA。好彩嘅係今日係國慶日，路上面人真係好少，我哋好順利六點左右就到達目的地。我哋今晚先住嘅酒店係響University Studio隔離。點解我哋會停呢度先呢？主要原因係因為比較順路，呢度屬於LA嘅西北面，距離進入LA市中心起碼仲要查多四十分鐘車，反正我哋都打算去University Studio，咁就不如停呢度先，玩完先再入城。  

酒店其實就係University Studio隔離，行去正門入口都唔使十分鐘，我哋泊好車check-in放低行李差不多六點半，今晚我哋兩間房其實就係隔離房，房同房中間仲有道門可以相通，阿漢走咗過嚟同我哋講「咁遠黎到，不如開車出去食飯啦？我第一次嚟LA咋！」「咁就親個天未黑，我哋飛車落去Santa Monica？我臨走之前問咗Joe有邊幾間餐廳值得一試，其中有一間食生𧐢同海鮮嘅餐廳好出名，就響Santa Monica海邊，今晚睇嚟冇九點都唔會日落，我地仲有大把時間可以慢慢嘆！」「好啦就咁決定！兩位女士行得未？」小詠同小玲喺度執緊行李，不過一聽到話要食嘢就即刻話好！於是我哋立即出發。  

Santa Monica響LA嘅西邊，由我哋酒店開車去都係十幾分鐘，我哋沿着10號公路往西行，好快就見到太平洋。七月份南加州嘅天氣雖然熱，不過天朗氣清白雲朵朵，你絕對唔會有香港嗰種悶熱嘅感覺。Santa Monica最出名嘅係佢個沙灘同碼頭，而我哋要食嘢嘅餐廳就響沙灘旁邊，我哋攞咗個路邊位，一路食一路望住海，小詠問：「沙灘旁邊有好多小店，食完飯我哋行吓街啦？」小玲就話「好啊好啊！我仲想落去行吓沙灘，香港邊會有啲咁靚嘅沙灘！」於是我哋就決定快快手手食完野再去沙灘嗰邊行。  



呢間餐廳食物水準真係一流，阿Joe介紹永冇失望，佢真係應該去寫食評！我哋叫咗四打唔同產地嘅生𧐢兩隻大龍蝦兩隻大肉蟹仲有其他小食，食完飽到上心口！埋單差唔多三舊水！貴就貴啲，不過真係好食！  

埋單嘅時候已經差唔多八點，太陽正在落山，夕陽西照，海面泛起一片金光，我哋四個人就行去沙灘坐低，攬住身邊嘅愛人欣賞西邊嘅太平洋嘅日落。