一個香港留學生在美國的生活: 回家

餘下幾日，我再冇見過小詩，可能佢嬲咗我？又可以覺得尷尬冇再搵我？無論如何，我覺得我同佢之間唔應該再有任何超友宜關係，起碼當時嘅我係咁諗！  

辨完買樓手續委托黃Uncle公司做物業管理之後已經冇嘢要做，禮拜三休息咗一日，於是我將原本禮拜六嘅機位改早，提前禮拜四下午機飛返屋企。  

落機嘅時候係下午四點，小詩應該仲響學校上緊堂，阿君仲響Oregon Road Trip未返，於是我先打畀Aaron「喂Aaron，我提早咗機返嚟，已經到咗機場，攞緊車，你喺邊呀？」「我係屋企發緊毛囉！你哋一個二個走晒，我可以去得邊啊？啱啦，既然你返咗嚟，今晚陪我食飯啦！」「唔得喎，我打算返屋企沖咗涼執兩件衫，就會即刻出三藩市搵小詠，你今晚都係食自己啦！」「重色輕友呀！好彩我仲可以搵Joey！」「咦！你追到人啦？」「多得你囉！你咁樣拒絕人！我同佢絕對唔係男女朋友，只係炮友！說來話長，等你出完三藩市返嚟我哋再傾啦！拜拜！」  

同Aaron 收線之後，我就去攞車返屋企，拍咗大約一個禮拜車響停車場，都唔使$150 ，真係平過搭的士。返到屋企沖咗個涼，洗咗啲污糟衫跟住攞返兩套乾淨嘅放入背囊，跟住就出車去三藩市。小詠係唔知道我提早咗返嚟㗎，我就係打算出去俾佢一個驚喜，於是我先打個電話俾小玲同佢打個招呼，正如我所預料，小詠仲上緊堂，只有小玲響宿舍入邊「小玲，你幾好嗎？我依家出緊嚟，應該六點半左右到宿舍，你唔好話俾小詠知我嚟緊喎，我想俾個驚喜佢！」「明嘅明嘅！你泊咗車就打俾我啦，我開門俾你！不過要快喎，小詠六點半落堂，通常七點就會返到宿舍，跟住我哋就出去食飯，不過咁啱今晚我約咗阿漢食飯陪唔到小詠，你地兩個可以撐枱腳啦！」  

於是我匆匆忙忙飛車出三藩市，好彩今日仲係星期四，加上Spring Break同Easter，好多人出咗去旅行，所以路上面嘅車都比較少，我六點左右就已經到咗大學宿舍門口。打完電話俾小玲，等坐一陣就見到佢落嚟開門「嗱，你自己一個人響房入邊等啦，我冇鎖門，我走啦！口渴就自己攞嘢飲啦！拜拜」   



自從小玲同阿漢喺埋一齊之後，佢成個人真係改變咗好多，完全有一個毒女脫胎換骨，根本就係兩個人。小玲開咗門俾我之後就直接離開，我一個人上到房，間房其實係一個大約四百尺Studio，十分寬敞，我行咗去小詠張床度坐低，床上邊仲有我送俾佢嘅毛公仔，女仔嘅房間就係唔同啲， 整齊清潔，仲有一股香味。  

睇吓個鐘六點半未到，於是我除咗對鞋走咗上小詠休息，攬住張被聞到小詠有味道，可能我真係太攰啦，唔使幾分鐘我就蒙蒙朧朧咁入睡。瞓咗冇耐我就感覺到有人輕輕咁錫我個嘴，當然係小詠已經返咗嚟啦！當我擘大眼見到佢我就問：「小詠，有冇好驚喜呢見到我？」「傻豬！你咁大架車泊喺樓下，係人都知你嚟咗啦！做乜嘢咁好突然嚟探我呀？」「吓？我仲諗住嚟俾個驚喜你添！早知我泊架車遠啲啦！」「唔係呀！我見到你架車我好高興呀！」「我改早左機票返嚟，掛住你呀嘛！我會留響三藩市兩日，星期六先返番入去準備開學，我呢兩日喺度陪你好唔好？」「好啊！你有乜嘢計劃啊？」「我要搵酒店先，不如我哋而家出去食飯先？」「其實唔使再搵酒店啦，你可以喺度過夜，阿康有好幾晚都已經喺度過夜，只要你唔好俾人投訴屈蛇應該唔係一個問題！」「咁仲好，咁我今晚就喺度瞓啦！」  

呢個時候小玲就打電話俾小詠，通知佢話呢兩晚都會響阿漢屋企過夜唔返嚟瞓啦喎！哈哈，佢呢個Roommate真係識做！