一個香港留學生在美國的生活: 新學年

一月最後一個禮拜一係Spring Semester開學，Alan阿健都已經返晒嚟準備，Aaron阿君同我如常響Alan屋企食飯，小敏有時都會一齊，夜晚就多數會響阿君度瞓，我都已經習慣咗屋企多咗個人。  

本來打算開學前個禮拜六日出去揾小詠，不過實在太忙，加小詠早我幾日已經開咗學，最後都改咗開學後嗰禮拜六日見面，而今年嘅大年初一係一月廿八號禮拜三，我同阿君佢地約好一齊出三藩市，唐人街過年氣氛十分熱鬧，仲有街會，我打算初三，即係禮拜五下晝出發，先去接小詠，跟住去王將晚飯，夜晚呢，就響Joe屋企瞓！呢個基本上係我往後六個月嘅例牌行程。  

今個學期take堂嘅Schedule同上學期差唔多，都係集中禮拜一至四，禮拜五只有上晝一堂Calculus 2， 至於Violin係Special Election，逢禮拜三上一個小時，算係深造班，我嘅目標係大學畢業前考完八級。而最令我意外係Music Department睇完我Application之後，想請我做Teaching Associate教鋼琴！我考慮咗幾日決定嘗試挑戰下自己，人工係其次，最重要係工作經驗，呢份算係我第一份正式嘅工作 ！簽咗約，開學後第二個禮拜開始教，一個禮拜教四堂共四個鐘，$20一個鐘，一堂有三個學生，大學工嚟計，算係唔錯嘅收入！而我第一個學生Joey，我有繼續免費教佢，不過改為一星期一次，多數係禮拜一放學後我去佢屋企， 呢個一直係我同Joey嘅秘密，連小詠都唔知！  

開學嘅第一個禮拜過得好快，又冇功課做，年卅晚響Alan屋企團年，除咗Aaron大家都到齊，Aaron要同姨媽食團年飯，食完先過嚟，之後打牌唱K守歲，睇嚟響外國生活嘅留學生平時嘅娛樂都係差唔多！  

Aaron差唔多十一點先到，今個學期五堂課入面有三堂同Aaron同班，自從京子走咗之後，Aaron有啲悶悶不樂，「喂！你好似仲有個女朋友響香港等緊你喎！你唔係真係鍾意咗京子呀！」「咁又唔係，不過真係好悶！身邊又冇其他女可以溝！你話我約Joey好唔好？」「吓？你講真定假呀！」「反正又唔係你條女！你唔好話我知你都想溝人喎」其實我都唔知我係唔係對Joey有Feel，我又冇打算同Aaron坦白，「你想我死咩！小詠到咗三藩市啦！」「唓！咁你又屌京子？有乜分別喎！小詠又唔係你老婆！」Aaron絕對係魔鬼！佢講嘅又冇錯，其實我心入面真係好矛盾，如果我冇心又點解要偷偷教琴？孤男寡女獨處一室，早晚實出事！  



人嘅心態就係咁，自欺欺人！Aaron同我應該係同一類人，又要威又要帶頭盔。Joe又唔同，佢擺明係滾友，又冇女朋友。Alan阿君就安份守法，從不偷食。