一個香港留學生在美國的生活: 觀鯨

去完水族館嗰晚我訂咗間響Carmel嘅Country French餐廳，揸車太約十五分鐘。Carmel係一個渡假小鎮，有世界出名嘅Golf Course，沿海有Seventeen Miles Drive，風景優美，不過今個旅程我冇時間留響度玩，因為聽日打算出海碰碰運氣睇鯨魚！  

每年冬天十一月到三月都係鯨魚出沒嘅季節，Monterey Bay其中最有特色嘅活動就係出海睇鯨魚！第二日朝早起身去咗酒店附近一間細細間嘅Coffee Shop食個簡單早餐，食完早餐我同小詠拖住手響Cannery Row漫步，四週環境好寧靜，早上遊客唔多，好多舖都仲未開門，我地趁著冇乜人，我地影咗好多相！差唔多十一點我地先開車去漁人碼頭食晏。其實漁人碼頭行路去都只係大半個鐘左右，去到泊咗車，先去買whale watch嘅船飛，跟住響碼頭上面嘅小食檔食海鮮！有拆哂肉嘅龍蝦，大蝦，蟹，炸魷魚，仲有Clam Chowder，我地食到飽先上船。成個船程大約三個鐘，一點半出發，四半左右返到嚟。隻觀光船唔算大，可以坐六十，不過因為禮拜一閒日，只有三十人唔到，個導遊好後生，佢本身係讀Marine Biology，半工半讀同時又賺到School Credit。隻船行咗大約一個鐘已經開始見到海豚，船上遊客開始變得興奮，大家都攞相關機Camcorder出嚟，海豚係聯羣結隊出沒，久唔久就會見到佢地跳出水面，完全同響海洋公園見到嘅唔一樣，真係震撼好多！  

要睇鯨魚就真係靠運氣啦！就算響冬天觀鯨季節都唔一定可以見到，不過我地好好彩，隻船行咗去目的地已經有兩條鯨魚響附近游戈，呢兩條都係灰鯨，導遊話灰鯨係最常見嘅鯨魚，如果再好彩啲會見到殺人鯨同座頭鯨！可惜嘅係我地冇再見到其他鯨魚啦！不過呢兩條灰鯨好似知道有人睇住，不停咁表演噴水，又響水面翻滾，大家都好興奮可以咁近距離接觸到咁有靈性咁巨型嘅動物！  

回程嘅時候比原定時間遲咗少少，不過反而畀我地有機會響船上欣賞日落，我從背後攬住小詠企響船尾望住太陽慢慢落山，真係好寫意浪漫，好希望時間永遠可以停留響度。  

落船後我同小詠響漁人碼頭附近閑逛，買咗啲手信寄返香港，其實我最反對就係買呢啲呃遊客嘅記念！全部都係Made in China，出口到美國跟住我地用貴唔知幾多十倍價錢買咗又送返香港！你話係咪戇居！不過我當然冇咁講，小詠想買我更話好啦！儍㗎咩！  



食完晚飯之後就返酒店執行李，聽日開車返三藩市，結束四日三夜Monterey之旅。