一個香港留學生在美國的生活: 試琴(1)

啱啱返到屋企電話就響：「Sorry 呀大佬！尋晚飲大咗，我都唔記得我點返屋企！」「我一早瞓咗啦！仲等你！」「哦，咁你冇見到我？」「我淨係見到一地衫，又唔知你帶條乜女返咗嚟！費事嘈醒你啦！」「哈哈！講你都唔識啦！我咁多女！」睇嚟我扮見唔到係啱嘅！Joe都冇打算話我知尋晚嗰個係Joyce。「屌！你下次飲大咗就唔好開車，捉到就大撚鑊啦！你未夠廿一㗎！」「係嘅係嘅！冇下次啦！下禮拜你出嚟接小詠我再請你食餐好嘅陪罪！」「咁禮拜六見啦！小詠禮拜日早機到。」  

阿君走咗Aaron應該車緊京子出三藩市機場，我最後都係冇同京子見面，我同京子嘅故事都係時候告一段落。我睇下鐘，十二點都未到，於是我去Café食Lunch，跟住去做Gym同游水。呢間Café算係學校Student Union Canteen 之外我食得最多嘅食堂，遠係遠咗啲，不過做Gym就響隔離，都好方便，後來阿君轉校搬走之後我同小詠就搬咗嚟呢區住，不過呢個係一年幾之後嘅事囉！  

去到Café又係得兩枱客同Joey一個Waitress，有時我都想知道呢間餐廳點賺錢？「一個定兩個？Aaron呢？」Joey笑住問我，「今日得我一個，Aaron出咗三藩市！」「咁隨便坐，想食乜？」「奶茶焗豬扒飯！」食物好快就到，我食到一半另外嗰兩枱都已經埋單走人，Joey冇嘢做就走嚟：「你等陣去Gym？」「係呀！你呢？今日全日返工？」「唔係呀！今日放兩點半，之後想去琴行睇吓，下個學期我想take堂Violin Beginner Class，我唔知應該租琴定買琴。」「啱啱學就租琴啦！到高級啲先買比較划算，靚琴唔平，平琴唔靚，有好大分別㗎！」「咁你知唔知道邊度有琴行？我屋企附近好似唔多覺！」「我知道大學附近個strip Mall入面有間琴行，不如等陣一齊去？」「好呀！咁等陣見！」  

由於Joey放兩點半，我只做咗一個鐘Gym，游水嘅時間都冇就要換衫走人，返到去Café已經兩點九，Joey換返便服坐喺門口張枱度，我都係第一次見Joey咁著，雖然佢唔算係靚女，不過對腳真係好修長，加上一條窄身牛仔褲，我已經睇到眼定定！Joey見到我行緊過嚟，佢起身走過嚟：「我地開兩部車？遠唔遠㗎？你唔好揸咁快喎！我手車好渣跟你唔到㗎！」「不如一架車啦！我等陣車你返嚟咪得囉！」「咁麻煩，點好意思啊！」「唔麻煩！揸車有幾遠吖！上車啦！」於是Joey就上咗我車。由Café去返大學大約20-25分鐘，其實只有十幾公里路程，不過出咗Freeway要行Local比較慢。我去到個Mall兜咗兩個圈終須見到間琴行，泊咗車之後，我同Joey一齊行入去，我見間琴行都好大， Joey要睇嘅係小提琴，於是我同佢直接行去擺放小提琴嘅櫃檯，有個上咗年紀嘅白人阿伯笑容滿面咁問我地有乜需要？於是我同佢講要揾個Full Size小提琴畀初學嘅學生，阿伯就介紹話初入門小提琴連埋支弓最平大約$300，如果租就$20一個月，按金$300，可以先租後買，之前租金可以當Credit用嚟買新琴，咁我就同Joey講先租後買比較划算，於是阿伯攞咗幾隻出租嘅琴畀Joey試試，其實都係做個樣，呢啲琴音跟本不能入耳！