一個香港留學生在美國的生活: 唐人街

Joe用咗唔夠五分鐘就到咗樓下，我上咗車就直接過橋出三藩市唐人街：「你今晚會唔會約Nancy？我可以去Anita度瞓。」「冇約喎！嘩你同Anita已經正式拍拖？」「閘住！呢啲叫FWB，唔係女朋友！咪同你同Nancy一樣！」我冇回應，其實我有啲衝動想再見Nancy，但我又怕越陷越深不能自拔，Joe 又話：「食飯先啦！食完咪Call吓Nancy囉！」  

三藩市唐人有百幾年歷史，聽Joe講係全美國最大嘅唐人街，有好多中餐廳，不過多數係呃鬼佬嘅中餐。我地泊咗架車響個地下停車場，一出𨋢係個平台花園，有好多阿婆阿伯響度打躉。我第一次嚟，呢度畀我嘅感覺就係舊，非常之舊，三四層高嘅舊樓樓下地舖樓上住人，大部分係餐廳藥材舖又或者賣旅遊紀念品嘅店舖，仲有好多乜乜同鄉會乜乜公所…四週圍都係中國人，絕大多數講廣東話，我跟住Joe行咗一個街口就到：「呢間食廣東菜，最出名係瓦罉豉油雞同椒鹽蟹，已經訂咗枱，David 佢哋應該到咗！」餐廳外面已經人山人海，好辛苦先迫到入大門，去到我哋張枱發覺只有David同Sam響度，Joe：「得你地兩個？」Sam：「Joyce話唔舒服留響屋企，Yoyo去咗陪佢。」David：「M到就M到啦！每月例假，明嘅！」Joe：「咁仲好，四個男人，食得Free啲！」Sam：「咁叫嘢食先，之後再揾節目！哈哈！David最知路數！」David：「阿偉唔知啱唔啱玩喎！唔好帶壞佢！」Joe：「你放心，阿偉仲壞過我！」我根本唔知佢地玩乜，唯有儍笑。  

除咗點招牌菜之外，我哋仲叫咗一個清湯腩一個大蜆蒸水蛋，加多個四季豆，呢餐食得好飽又十分好食。食完飯已經九點幾，Sam帶頭行返上唐人街，要行一段斜路，附近已經冇乜人，我哋行咗兩條街，去到一間足浴按摩店，入面有六七張櫈，David：「有冇房？我哋四個人。」門口招待位阿嬸望一望，就帶咗我哋去咗後面一條好隱蔽嘅木樓梯，上到二樓再帶哋去一人一間房，房入面有張按摩床同一張做足浴嘅按摩椅。阿嬸：「先生你淨做腳定要全身按摩？我睇你都係第一次嚟？」呢個時候Joe響門口：「唔洗問佢啦！我朋友做全套，張單入我數！」阿嬸：「收到！咁先生你先除衫，毛巾響按摩床上面，我地呢度包一杯嘢飲，你睇睇要乜同我講。」「咁我要杯凍奶茶！」我本來仲想同Joe講兩句，點知條友已經走咗！  

好彩上次去Golf Club已經試過做Spa，我估應該差唔多，我除淨件底衫底褲，著住件浴袍，坐響張按摩椅度飲住杯凍奶茶，門口有人敲門，跟住有把好甜美嘅聲用廣東話問：「先生我入得嚟嗎？」