一個香港留學生在美國的生活: 鬼屋

「你要學下認路呀！依家轉入50公路，行多15分鐘車就到啦！你點會住響啲咁嘅區嫁？呢度係高級住宅區，鬼多人少，想食碗雲吞麵都冇，返學又遠！」Joe 一路開車一路講「我阿爸搵嘅，屋主係一個Uncle嘅阿媽，呢個Uncle由細睇到我大，係我阿爸幾十年老友。」「住得呢個區嘅人非富則貴！嗱，今日禮拜六，你休息下年，聽日我再入嚟幫你買車，下禮拜再同你學車，我連教車師傅都幫你搵埋，你兩日應該學識㗎啦！」「有冇咁快呀？」「我以前十六歲考車要規定學幾多個鐘，你下個月都十九啦！求其學識就可以考！」  

講到一半，Joe 已經停咗響間大屋前面，呢條街啲屋都好大，綠樹成蔭，好寧靜好舒服。我落車之後，對清門牌之後，我走去大門㩒鐘，等咗一陣，冇人應，我又㩒多次，呢次終於聽到聲，仲係廣東話「嚟緊啦！我唔係聾嘅！」跟著就有個阿婆黑口黑面咁開門！我個心沉咗一沉，我第一眼見到呢個阿婆嘅感覺就係…倚天屠龍記入面嘅金花婆婆！唔係，應該係滅絕師太至啱！  

直覺話我知，呢個阿婆有病！應該係精神分裂症！好明顯我並不受歡迎，可能係我阿爸一廂情願以為阿婆個仔係佢老友，咁佢老友阿媽都會歡迎我啦！冇計，我都要頂硬上！「婆婆，你好！我係阿偉，我係Uncle Samuel個世侄！多謝你畀我響你屋企住！」「知道啦！阿婆幾廿歲唔識服侍人，你自己攪掂，嗱，間屋分兩邊，右邊你住，有三間客房，左邊有五間阿婆住，平時我唔多煮飯，你一係買外賣一係響學校食啦！如果我煮會予埋你。嗱，呢條係屋匙，唔好唔見咗，後面有游泳池，不過阿婆唔游水，已經好耐冇打理，車房呢，我已經放哂雜物冇位泊車，如果你有車就拍Drive way 啦！」  

8間房仲有游泳池，一個阿婆住，唔怪得佢有精神分裂！阿婆之後自己走咗入房，Joe 就幫手搬行李「兄弟，睇你遲早要搬出嚟，呢度點住人呀？鬼屋咁！」間屋的確係陰森恐怖，後園雜草叢生，屋入面燈都唔多盞，家私全部係古董，冇一百都有八十年歷史，我入間房，只有一張單人床，連書枱都冇，另外兩間係吉嘅！神啊！我做錯啲乜，要咁玩我呀！  

「咁啦！一場兄弟，我今晚揾間酒店住，我留低同你買晒嘢先，首先買枱，呢度買家私要自己切，你一個人又搬又切，唔掂嫁！」呢個時候，我用水汪汪嘅眼神望著Joe「我愛你！」跟住準備熊抱佢再咀佢「屌！死基佬！死開啦！快啲𢴇好嘢，趁早出去買嘢呀！」 



就係咁，我地禮拜六買枱買櫈，一晩就切好晒，禮拜日Joe仲幫我約咗教車師傅，學咗兩個鐘，之後繼續Shopping買日用品，仲買咗電話同phone card，原來用phone card 打返香港平好多！到咗禮拜一，一早去申請social security，再去銀行開戶口，阿媽同日滙咗錢過嚟，禮拜一晚joe返咗屋企，佢話禮拜五再入嚟幫我買車，叫我呢個禮拜好考咗個牌！  

雖住在同一屋簷下，成個禮拜我見到阿婆唔多過三次，講嘅嘢唔多過十句，真係人都癲！冇車又冇得出街，好彩教車師傅每日都過嚟教兩粒鐘，終於響禮拜四一日內考晒筆試同路試，可以開車啦！  

禮拜五一早Joe 就到咗，我地一齊去咗飲茶，呢個鄉下地方原來都有唔少中餐館，我地去咗down Town 一間茶樓飲茶，點心唔多不過都唔差，勝在抵食夾大件！  

Joe「點呀？住得慣唔慣呀？有冇被阿婆性騷擾呀？」「我屌你！食緊飯呀！講啲咁嘅嘢！」「諗咗買乜車未？有冇Budget？」「阿媽滙咗錢，佢話予啦十萬買車，唔夠再同佢講。」「十萬？你痴咗呀！洗鬼咁多！除非你想買架好似我部咁，不過你新牌，買部易上手又安全嘅好啲！」「咁你有乜提意？」Joe 諗咗陣「Mercedes Benz啦！我call個Uncle睇下有冇相熟Sales！」  

Joe打咗兩個電話，之後佢話約咗個唐人Sales兩點半響車行見，依家埋單啱啱好。開咗半個鐘車，去到車行，試咗三四部，最後決定買部CLK320 Coup，六萬都唔洗，平香港一半！做完過戶手續，買埋保險，終於有車揸啦！