全實景系列《香檳大厦 1:55 am 行人止步》重製版 (已完結): 第三章：【黄經理】
20:45 – 佐敦測試中心辦公室
「噠噠噠……噠噠……」黃經理將個食完嘅飯盒推埋一邊，手指繼續快速地喺個Keyboard上打出一連串嘅英文字。
已經過咗平時收工嘅時間，黄經理仲未離開公司。呢個幾星期佢幾乎每晚都OT超過四個鐘以上。
「反正返到屋企咪又係要做。」黃經理一直都係咁諗，所以係咪準時放工對佢嚟講無分別。
之前好幾晚，黃經理上司仲會捉住佢嚟開會，開到連晚飯都無得食。今晚好少少，佢上司一早閃咗人，所以黃經理先打算食飽飯咗再做。
咁辛苦，為嘅就係一份來年計劃書。
黃經理深知道，如果所有嘢都唔按步就班咁規劃，就唔駛旨意做得出預期成效。所以佢係一個好怕有突發意外嘅人，所以佢先會花咁多時間喺份計劃書上。
尤其係佢地嘅服務舊年先被政府狠狠地中止咗一年撥款，搞到成個團隊要重組，呢啲艱難時刻黃經理仍然歷歷在目，直至到搵到其他基金肯出手資助個服務，佢先感到如釋重負。
只可惜嘅係，新加入機構嘅頭三次申請，每次都只能獲得上限一年嘅資助，意味住如果要穩獲基金三年資助，黃經理就要每年寫一次計劃書。
除咗遞交計劃書之外，黃經理仲要接受慈善基金方面嘅面談，畀佢地了解下計劃內容、時間線及成效等，另一方面又要睇下申請人對基金有幾認識之類嘅細節。
所以每次寫完，黃經理幾乎都會背熟埋成份計劃書，乃至成個慈善基金嘅發展史，先至敢去做面試。
「未雨綢繆，安全至上。」係佢嘅座右銘。事實上，如果再一次搵唔到資助，恐怕真係要摺埋個服務喇，所以黃經理特別花心機去寫呢份計劃書。
佢預計今晚無十二點都離開唔到中心。
黃經理伸一伸懶腰，打咗個喊露，放低手上一疊厚厚嘅文件，攞起水杯，沖佢平時最鐘意嘅白咖啡。
佐敦測試中心分開左右兩部份，一邊嘅格局就好似出面嘅醫務中心，有幾間房，畀測試員幫服務對象做愛滋病及梅毒快速測試。另一邊則完完全全係辦公室設計。兩邊單位就係靠一道門同一條小走廊接通。
小走廊嘅牆邊放咗水機、雪櫃同微波爐呢啲一般設備，而呢條通道亦成為兩邊同事嘅交匯點，同埋吹水閒聊嘅地方。
黃經理一按熱水掣，熱辣辣嘅水撞入杯中又啡又白嘅即溶咖啡粉中，成條走廊都充斥住白咖啡嘅香氣。佢叉住腰，呷住一啖熱咖啡。
喺呢個時候，有人打開咗黃經理身後走廊嗰道門。
「噢，Sorry呀經理，有無撞到你呀？」一位身形嬌小嘅女同事竄入嚟。
「無事，仲以為邊個添，原來係你。」黃經理回答女同事：「小冰，你今晚當更做測試員？」
「係呀，收十點半，你仲未走嘅？」小冰反問。順手在雪櫃側邊嘅櫃桶搵疊垃圾膠袋。
小冰同黃經理屬於同一個部門，有時小冰都會負責做測試工作。基本上，團隊裡面每個全職同事都會識得做快速測試。
「未有咁快啦，下星期deadline，我諗呢個星期都唔駛諗住早走啦。」黄經理再呷兩啖咖啡。
「既然你咁忙，好心日頭就唔好同我哋一齊出外展啦，呢啲嘢交比我同埋啲Part time去做咪得囉。」小冰攞住剛剛搵到嘅膠袋，抽了一個出嚟。
「天氣咁熱，你地日日都出外展想做死你哋咩，我都要一齊做下㗎嘛。」黃經理講就講得輕鬆，但其實佢都好怕熱。
「OK啦，我哋都仲頂得住嘅。」小冰拍拍黃經理膊頭：「我過返去做埋最後一隻測試先啦，一陣再傾啦。」
「喂，食宵夜？」黃經理叫住小冰。
小冰臨閂埋門嘅時候比咗個「讚好」手勢，然後就消失喺門後面。
「唉…」黃經理望住道門嘆了一聲，心入面覺得唔好受：「點解啲同事要咁辛苦呢？」
過往，每一個加入團隊嘅人，黃經理都再三提醒佢地呢份係一份好辛苦嘅工作。除咗日曬雨淋之外，有時仲要受人面色，冒住畀人趕走、威嚇嘅風險，深入前線做服務之餘，仲要處理好多突發情況，解答好多難題，設計好多新穎嘅預防工作推廣。呢份工少啲IQ同EQ嘅人根本做唔嚟。
喺團隊工作嘅同事，黃經理都覺得佢哋係精英中嘅精英。所以，當佢見到啲同事由朝做到晚都仍然咁盡責而且毫無怨言，就覺得好過意唔去：「係咪原先計劃得太差呢？」
黃經理又嘆一口氣，慢慢行返去自己個位。攤咗喺個位度。
佢個枱頭一遍凌亂，除咗個飯盒仍然係未掉之外，參考書、工作記錄、以往做計劃用嘅PLM(Programme Logic Model)全部攤晒喺度。
黃經理將呢啲同工作相關嘅嘢撥開，攞起前面一個座抬相架嚟睇。
一張滿佈笑臉，愉快又融洽嘅相片。
黃經理記得呢張係某一次出發去酒吧做外展前，喺中心樓下影嘅團體相，所有同事都著上清一色嘅紅色外展Tee，開開心心咁準備去做嘢。
每一位同事，喺黃經理眼中都係不可多得嘅好幫手。
黃經理又嘆氣，手輕輕力摸張相，眼望住相中嘅一位男同事：「阿琛，究竟你呢兩個月去咗邊？」
黃經理從來無諗過，一個佢向來十分信賴，同時亦好有交帶嘅兼職同事，會突然間無聲無息，音訊全無咁消失咗。
黃經理望住張相發咗一陣呆，就放低相架，繼續埋首工作之中。
(待續)