不能見面的女朋友: 第十章

我思緒混亂到極點。她給我的回覆徹底把我整個世界推翻了。

到底發生什麼事？？為什麼她會這樣說？我怎麼可能一直跟可喬而不是卓瑤對話？？？

我完全不明白！！

我:「我真係完全唔明白……」

然後她今次終於快了一點回覆我。





卓瑤:「一直都係可喬用我部電話同你傾計」

我:「你兩個唔係同學咩？」

她的答覆好像合理，卻極其違反常理……

卓瑤:「佢係我個妹」

甚麼？？？？？





難怪她們長得這麼相像！

我忽然回想起來，的確有很多可疑的地方……

為何本來卓瑤的口語寫得很準確，忽然就變得很多「喔」；

為何我問卓瑤她有沒有兄弟姊妹，她拒絕回答我；

為何卓瑤要離開家中的時候，就不能跟我whatsapp；





為何卓瑤看見我的表白之後，要過這麼久才回覆我，還要只是「真係㗎？」

為何……我們永遠不能見面。

我:「我而家……究竟係同緊邊個講嘢？」

我開始迷失了。跟誰對話也不知道，拍甚麼拖？

「以下嗰段嘢會係可喬寫俾你」

然後我一直看著她「輸入中……」，等了很久，很久。

「你一直其實係同緊我對話。我喺個活動嗰陣已經對你一見鍾情……為咗見多你一次，我叫家姐同你提出sharing session。食飯嗰陣有得坐你隔離，其實我好開心。之後嗰日，你有同家姐whatsapp，我就同佢講俾我負責覆你。自此之後，家姐就默許我用佢身份同你對話，因為……我始終冇勇氣主動搵你，唯有用佢身分。

同你每日傾計真係好開心，但係始終我唔係成日喺家姐身邊，有時家姐出街我就冇得傾，所以我好珍惜。





你同我……定唔知我家姐表白嗰陣，我好想即刻應承，但係……之後點算呢？所以我同家姐商量，而我地最後認為只要唔同你見面，咁樣應該冇問題。

自從嗰日之後，我每日都過得好開心。只要一直咁樣維持落去，即使冇得再見你，我都好心滿意足。

但係直至到早兩日，你再問可唔可以出街，我終於發現……我哋呢段關係根本冇得維持落去。喺我眼中，我係同你拍拖，但係喺你眼中……你係同緊家姐拍拖。我好想覆你，真係，但係我根本唔知點覆。家姐同我講，叫我直接承認咗佢。我諗住一晚，都係唔夠膽，結果我家姐幫我覆咗。

我真係鍾意你㗎，我保證。可惜，你鍾意嘅係我家姐……」

我看到這裏，問了自己一條問題。

到底我真正喜歡的是卓瑤，還是可喬？

「我咪問過你鍾意我啲咩嘢嘅。我個刻真係好想知道真正個答案。你對我……定係我家姐啦，我唔知道。到底係乜嘢令到你鍾意我呢？係我哋嘅對話？定係「家姐」同你嘅對話？」





我又不是對卓瑤一見鍾情，雖然她的確令我留下深刻的印象。然後，在和可喬的對話中，我慢慢建立了對卓瑤的好感。我不知道那些好感的來源，是卓瑤，還是可喬。我也不知道那些好感的對象，是卓瑤，還是可喬。

真是荒謬得很。我真的不知道自己愛上了誰的什麼。

「但係點都好，呢幾個月同你嘅對話，係我人生中最享受嘅嘢。多謝你每日畀我拍拖嘅感覺，雖然我心知肚明……唔係屬於我嘅。請相信我，就算你而家幾嬲我呃你都好，我對你嘅愛係千真萬確，即使到而家都係。但係我冇辦法再面對你，唔好意思。就等呢幾個月嘅夢幻，成為我哋兩個嘅回憶啦。祝你DSE順順利利，前程錦繡。

如果我哋真係有緣，我哋一定有機會再見面嘅。再見」

然後，她封鎖了我。

愛情是什麼，我真的望不透。從Whatsapp開始的戀情，又怎可能是真實呢？莫說不知對方的真實想法，連是不是你的對象答覆你也不知道。沒錯，我們的對話很甜蜜，當時的感覺很真實。但是，原來一切不過是幻覺。一直建立的好感，甚至喜歡的感覺，原來都是錯覺。五個月的對話，已經給我這麼大打擊，若果是一年、兩年……我實在不敢再想。

我實在有太多話想說，但是我不知我是想跟誰說。是卓瑤？還是可喬？

我決定刪除我們之間的對話。因為，對話的作用本來是讓人與人溝通。我們呢？甜蜜得拍拖了，每天也有甜言蜜語了，到頭來，在跟誰拍拖也不知道。





不過，縱使對話刪除了，記憶卻不能刪除。我永遠也會記得，曾經我愛上了一個人；但我不知道，她叫卓瑤，還是可喬。
完