惡靈指數100%: 夢
「迷路女童嘅真身係嗰隻綁住蝴蝶結嘅黑貓？」阿時提出自己嘅猜測。
「一半一半喇......但你要搵嘅係剛才喺電影度出現嘅公仔先啱。」提到黑貓嘅時候，Hiro嘅表情閃過一絲內疚同唔自然，被阿時捕捉到。
「噉應該喺邊度會搵到嗰隻公仔同鹽水？」阿時都配合佢轉移話題。
「呢樣我都幫你唔到......」Hiro遺憾噉搖搖頭。
「琛時......」
外邊依然隱約傳嚟迷路女童嘅聲，佢守喺外面。阿時根本冇法出去，更唔洗講話搵佢嘅真身同搵鹽水。
阿時而家最擔心就係遙遙，希望黑貓同漢堡包車唔會傷害佢。
而遙遙抱住黑貓，等咗好耐都等唔到阿時返嚟接佢。
「喵......」黑貓突然跳出佢嘅懷抱，跑走。
「小黑姐姐，你去邊啊？」遙遙追住佢跑咗幾步就開始猶豫，因為佢應承過要等阿時嚟接佢，佢唔想走開太遠。
「哈哈哈哈......」
前面冒險樂園嘅燈突然著起，閃爍住五顏六色嘅光芒。裡面傳出小朋友嘅歡笑聲，遙遙一步一步行過去。
裡面並冇小朋友，而係一隻又一隻可愛嘅毛公仔，喺度嬉戲，場面熱鬧又溫馨。
「咦，遙遙你返嚟喇？辛苦喇！」班公仔見到遙遙返嚟，興奮噉上前迎接。
「係......」遙遙被佢哋拖過去，坐到佢哋中間。
「趕走咗嗰個男仔未？定係個男仔以後都會留喺度陪我哋玩？」其中一隻公仔期待噉問。
遙遙面對佢哋嘅追問，欲言又止，最後低落噉搖搖頭。
「唔緊要，遙遙你已經做得好好。」
「我哋快啲嚟一齊玩喇！」
「嚟喇嚟喇！」
毛公仔想拉起遙遙，同平時一樣一齊去玩。但今次遙遙依然低住頭，唔肯跟過去。
「咩事啊？」
「遙遙你係唔係肚餓？」
「遙遙好奇怪。」
公仔你一言我一句，擔心遙遙嘅情況。
"你唔想好似普通小朋友咩？去返學，識好多好多朋友。"
遙遙諗起阿時嘅說話，決定鼓起勇氣，講出心裡面嘅想法：「我......我想返學讀書，識好多好多朋友！」
氣氛瞬間沉寂咗落嚟，一班公仔你眼望我眼。幾秒後，再一次活躍起嚟，想動搖佢嘅決心。
「遙遙你喺度亂講乜啊？我哋未係你朋友囉。」
「你有我哋仲唔夠？你唔通已經唔鍾意我哋？」
「呢啲說話，你以後都唔好提喇。」
「唔係噉㗎！」遙遙企起身激動噉講：「我想做一個普通嘅小朋友。我想升小學，想做一個小學生。我想返到現實世界！」
「唔好講笑喇......你覺得你真係有可能做一個普通嘅小朋友咩？」幾十隻公仔圍起遙遙，原本佢哋天真可愛嘅聲線一下子變得低沉，帶住威脅嘅意味。
「我......」遙遙想反駁，但又諗唔到應該點去回應。
「睇嚟你已經唔記得咗，啲大人係點對你。如果唔係小黑救咗你，你一早已經死咗。被自己深愛嘅親生媽媽殺死......」圍住遙遙嘅公仔越嚟越多，公仔嘅聲音重疊喺一齊，畫面好詭異。
「唔好啊！」遙遙抱住頭踎喺地下，崩潰尖叫。
「嘻嘻嘻嘻嘻嘻......等我哋嚟幫你回憶吓......」
遙遙被公仔推跌，身體直接瞓落身後軟綿綿嘅公仔堆。佢驚恐噉瞪大眼，睇住公仔越嚟越多，一個個噉將自己埋住。視線被遮擋，眼前一片黑暗。
「千遙......路千遙！」
遙遙喺沉睡中甦醒，發現自己身處喺幼稚園嘅課室，而老師擔心噉望住自己。
老師摸一摸遙遙嘅額頭，發現比正常體溫熱：「好似有啲發燒，不如今日打畀你媽咪，叫佢接你放學？」
「我自己識返屋企。」遙遙下意識拒絕。
「但係你發燒喎，不如今日我送你返屋企。」老師總覺得唔放心。
學校全部嘅幼稚園學生都仲需要家長接送，唯獨遙遙每日都只有自己一個返放學。老師有曾經打過畀家長傾相關問題，但家長嘅語氣完全係莫不關心。
之後遙遙都會講大話話媽媽接佢，然後自己一個跑走，老師由始到終都未見過佢所講嘅「媽媽」。連家長都唔配合嘅情況下，學校只有默許遙遙自己一個幼稚園生返放學。
「青青，我返嚟喇。」遙遙每日放學返到屋企，都會先同佢養嘅龜仔打招呼。
「砰砰砰砰......」
媽媽嘅睡房裡面傳嚟連續嘅槍聲，遙遙輕輕將門推開，偷瞄裡面嘅情況。
「吱......」
遙遙推開門嘅聲音好微弱，裡面一個男人坐喺電腦枱前打機，螢幕咁啱出現「Game Over」兩隻字。男人放低手上嘅滑鼠，慢慢轉過身。
「叔叔，歡迎你......」遙遙嘅表情瞬間轉成一個天真可愛嘅笑容，之後閂好門快步離開。
「砰！」
身後嘅門被男人用力拉開，發出好大嘅一聲，遙遙被嚇咗一跳。男人扯過遙遙幼細嘅手臂，迫佢轉身面對自己。
「我講過幾多次，我打機嘅時候唔好嘈住曬，你又累我輸咗喇。」男人用力噉搣住遙遙兩邊嘅臉頰，痛苦嘅表情慢慢喺遙遙嘅臉上浮現。
「對唔字......」被搣住嘅遙遙努力噉想向男人道歉。
「哼哼......哈哈哈......」男人見到之後，忍唔住笑。
遙遙嘅媽媽好夜先返到屋企，打開燈。見到男人依然坐喺電腦前打機，佢奇怪噉問：「千遙呢？」
「砰！」
男人諗起頭先嘅事，怒火仲未可以平復，佢用拳頭用力打向枱面。
「發生咩事啊？」遙遙嘅媽媽擔心噉問。
平時男人就算點去打或者整蠱遙遙，遙遙都唔夠膽反抗。但今次居然為咗隻烏龜，衝埋去咬咗男人嘅手臂一啖。
「我屋企唔養癲狗，掉咗喇。有意見啊？」男人冷淡噉望佢一眼。
「當然冇......」佢表情有啲唔自在，決定專心去做家務，唔再理太多。
已經就快十二點，佢打開門倒垃圾。果然見到遙遙抱住養龜仔嘅箱，坐喺屋企門口。
「隻龜你掉去出面垃圾桶，之後就入返嚟喇。」媽媽講完之後，將手上嘅遞畀遙遙。
遙遙欲言又止，最後都係點頭應承。佢將龜仔先收埋喺後樓梯，聽日再諗辦法。
到第二日放學之後，遙遙再去後樓梯搵龜仔，但發現佢已經唔見咗。
「青青！青青！」遙遙緊張噉一邊叫住龜仔嘅名，一邊四圍搵。
天色已經入夜，始終都係搵唔到龜仔。
「你喺度做咩啊？」媽媽放工拎住外賣返屋企，路過走廊見到遙遙。
「冇嘢......」遙遙唔敢被媽媽知道自己冇掉到龜仔，唯有暫時放棄，跟住媽媽入屋。
喺睡房打機嘅男人聽到開門聲，就走出嚟，對遙遙講：「喂，終於返嚟喇？我買咗嘢畀你食，放咗喺枱面。」
遙遙有種不祥嘅預感，不安噉望一望媽媽。媽媽冇理佢，轉身去拆外賣食。
遙遙迫於無奈噉坐好，打開男人指畀佢嘅嘢食。好似係一碗漆黑嘅啫喱嚟，遙遙唔知係咩，但單睇外表並唔吸引。
好苦......
遙遙試咗一啖，就皺起眉頭。
「好唔好味啊？」男人半威脅噉問遙遙。
「好味......」遙遙忍住口裡面嘅苦澀，大口大口噉食，想盡快食完。
「呢個係咩嚟？」媽媽好奇噉問。
「龜靈膏。」男人露出熟悉嘅惡作劇笑容，令遙遙心驚。
龜......青青？
遙遙瞬間覺得有啲反胃，衝到垃圾桶，見到令佢難以忘記嘅一幕。
佢嘅龜仔瞓喺垃圾堆裡面......
遙遙伸出抖震嘅手，將拎返出嚟，捧起手心，但龜仔已經冇可能再畀到反應佢。
「哼哼......哈哈哈哈......」見到遙遙嘅反應，男人忍唔住大笑。而媽媽都只係無奈噉望佢一眼，就繼續食飯。
遙遙已經棒住龜仔嘅屍體，跪喺垃圾桶旁邊好耐。
直到媽媽食完外賣，走過去掉垃圾。一直低住頭嘅遙遙突然開聲問佢：「青青佢......去咗天國？」
「係，佢而家喺天國好幸福。」媽媽見到之後，都有少少心軟。
「噉就好喇。」遙遙抬起頭，向媽媽勉強露出一個令人安心嘅笑容。
「快啲拎出去垃圾房掉咗佢，費時佢發臭。」媽媽見遙遙完全冇事，態度都恢復冷淡。
「嗯......」遙遙應咗一聲，然後將龜仔嘅屍體重新掉返喺垃圾堆，拎住一大袋垃圾出去倒。
到垃圾房之後，遙遙拆開垃圾袋，拎返龜仔嘅屍體出嚟。遙遙帶佢落樓下嘅花槽，將佢埋起泥土下面。
埋到一半，眼淚終於忍唔住流出嚟，冇聲噉畫過臉頰。滴喺泥土，瞬間就被吸收。
將龜仔埋好之後，遙遙想用污槽嘅衫袖抹乾臉上嘅眼淚。但有一隻白皙嘅手伸過嚟，阻止佢嘅動作。
遙遙抬起頭，發現有個著住紅色連身裙嘅姐姐，唔知幾時開始企咗喺佢隔離。
姐姐用手托起遙遙嘅臉，溫柔噉用自己一條乾淨嘅手巾仔幫遙遙抹臉。親暱嘅動作，令遙遙有啲驚愕同不知所措。
「唔該姐姐......」遙遙雖然覺得眼前嘅姐姐好古怪，但都禮貌噉表示感謝。
「要唔要一齊玩啊？去我屋企。」紅衫姐姐輕聲問。
「太夜喇，我要返自己屋企。遲啲先見到面再一齊玩，再見。」遙遙唔太好意思拒絕，唯有推遲，然後轉身離開。
「返去嗰個屋企嘅話，你會死啊......好似你隻烏龜噉。」