惡靈指數100%: 迷路女童
聽講只要成為越多人相信同恐懼嘅存在，靈體就會變得越強大。靈體慢慢會失去原本嘅思想，越嚟越接近傳言中嘅角色，最終成為真真正正嘅惡靈。
最近幾個月，出現咗一個新嘅都市傳說。
如果太夜都仲未返屋企，喺街度流連嘅話，有機會撞到鬼打牆嘅情況。搵路嗰陣，會有一個著紅色連身裙細路女突然喺身後出現，主動問人係咪搵佢。
無論答佢係定唔係，第二日清醒後都會發現自己企喺危險嘅地方，天台、海邊、甚至係懸崖邊......只要一叉錯腳，就會粉身碎骨。
天水圍係最先傳出呢個都市傳說，所以呢個都市傳說中嘅細路女，被人稱為天水圍迷路女童。隨住傳言越嚟越誇大，發生嘅靈異事件都越嚟越多，發生事件嘅地區開始擴大。
迷路女童而家轉化為惡靈嘅指數係75%......
天色已經入夜，因為迷路女童呢個都市傳說最近被廣泛流傳，令唔少人心寒，提早返屋企。本身有悲情城市之稱嘅地方，更添一份沉重嘅感覺。
「沙啦沙啦」
路上基本上得返幾丁友，幽靜嘅環境，連風吹過樹葉所發出嘅聲音都異常清晰。暗黃嘅街燈，令街道更加陰森恐怖。
「好驚......」
「只係一個細路女惡靈，一拳都搞得掂佢喇，使乜特登搵靈媒啫。」
「我已經準備好相機，如果真係影到靈體，賣俾傳媒應該可以賺好多錢。」
四個年輕男女走喺路上，不停嘻笑玩鬧，令緊張恐怖嘅氣氛緩和咗唔少。唯獨一個著住西裝嘅男人，遠遠跟喺佢哋後面，無聊噉打喊露。
「行咗咁耐，連一個細路仔嘅影都搵唔到，真係無聊。果然都市傳說都係呃人，我地影相打完卡就走啦。」四個年輕男女拎出相機自拍，見到遠處無所事事嘅男人，就大聲叫佢：「仲成碌木戙喺度？快啲過嚟幫我哋影相喇！」
「係係......」男人接過佢嘅相機，無奈噉應承。跟咗佢哋成晚，一早就想早啲完成任務返屋企瞓。
打完卡之後，佢哋就直接轉身離開。
「費用方面，因為冇遇到靈體，聽日會再重新報個價俾你哋。」男人慌忙咁走到佢哋面前，提醒佢哋。
「吓？你做得靈媒，連幫手搵傳說中嘅迷路女童都搵唔到。浪費我哋咁多時間，最後咩都冇做到，分明係呃人。我哋一蚊都唔會俾，唔上網唱衰你間公司已經算好。」原本仲笑容滿臉嘅年輕人聽到費用兩個字之後，即刻換咗一副尖酸刻薄嘅嘴臉。
佢哋直接上私家車離開，剩底靈媒先生一個人喺原地。靈媒先生無奈咁打開銀包，望一望裡面所剩無幾嘅銀仔，自言自語：「唉......又要做白工，行路返屋企算。」
四個年輕人上到車之後，又繼續嘻笑。其中一個拎起相機，睇返剛才影嘅相。
「咦？」佢發現相裡面仲隱約影到一個矮細嘅紅色身影企喺佢哋身後，每一張相都有。
佢以為自己眼鏡污糟咗，捽一捽眼鏡，又抹一抹個mon。檢查一吓鏡頭，睇唔到有任何污糟同劃花嘅痕跡。四個人輪流zoom大張相，擘大眼再睇清楚相中嘅紅色身影。
「哥哥姐姐，你哋係咪搵我啊？」
後座突然傳嚟細路女嘅聲，令佢哋嘅表情僵硬咗，皮膚霎時間起晒雞皮。
「啊！！！」
佢哋受到驚嚇，車失控撞樹。車頭嚴重變形，開始冒起煙，佢哋當場昏迷咗。喺好遠嘅靈媒先生聽到巨大嘅聲響之後，即刻向出煙嘅位置跑過去。
一......二......三......四......
見到全部齊人，靈媒先生就準備救人。
「五......」
聽到身後多咗把細路仔聲報數，靈媒先生嚇咗一嚇。即刻轉過身，發現多咗個細路女企喺佢後面，而且企得好近......
細路女大約五歲左右，著住亮麗嘅紅色公主裙。五官可愛又精緻，大個絕對有潛力成為一個靚女。蒼白嘅臉色對比下，令擦咗鮮紅色唇膏嘅嘴唇顯得更加鮮豔。好似剛吸完血一樣，令人對佢嘴角嘅色彩產生懷疑。
到底係普通唇膏啊？定係血漬......
前面就係車禍現場，但佢一啲都唔驚，安安靜靜噉睇住靈媒先生。見靈媒先生都望住佢，佢輕輕拉住靈媒先生嘅衫角，擺出一個甜美嘅笑容，但語調平穩呆板：「哥哥，你係咪搵我啊？」
表情同語調嘅反差，令人感覺好詭異。黑色嘅眼珠冇絲毫笑意同光彩，一同佢對視，就好似要跌落深淵一樣，意識變得遲鈍。被看透靈魂，心裡面嘅想法會表露無違，做出下意識嘅動作。
表情呆滯嘅靈媒先生不自覺噉踎低身，向細路女精緻嘅臉伸出手，用手指輕輕將佢嘴角畫出界嘅紅色抹走。明明只係單純嘅動作，但畫面仲帶住絲絲嘅曖昧。
呢個畫面......好熟悉......
諗起上一個做呢個動作嘅男人，細路女嘴角嘅笑容都越嚟越天真無邪，俾人嘅感覺都越嚟越危險。
靈媒先生緊緊捉實細路女嘅膊頭，並冇再做出細路女預想中嘅動作。細路女有啲疑惑，靜靜等待靈媒先生之後嘅動作。
「你已經唔記得咗我？我已經等咗你幾個月，見到你仲咁精神就好喇。」靈媒先生表情依然呆滯，証明佢而家嘅動作同說話，仲係反映住內心。
細路女聽到佢搵咗自己幾個月之後，有啲驚愕，原本扯住靈媒先生衫角嘅手都鬆開。
呢個細路女喺呢個時間仲喺街度，著住紅色連身裙，周圍問人係咪搵佢，的確同迷路女童嘅都市傳說似到十足十。
若果靈媒先生未見過眼前嘅細路女，應該都會誤會。但偏偏佢一眼就認出，呢位小朋友就係幾個月前搵過佢幫手嘅小客人。
雖然衣著裝扮同之前好大出入，但因為種種嘅原因，令佢對呢位小客人印象異常深刻。
幾個月前，有一個身形瘦小嘅細路女嚟到靈媒先生嘅除靈事務所。
細路女身上嘅衫好殘舊，已經洗到甩色。一手拎住印有眼前男人大頭嘅傳單，另一隻手就小心翼翼噉抱住裝有寵物烏龜嘅箱。
手上嘅傳單印有大量誇大嘅宣傳字句，雖然有啲字佢唔太明白，但總覺得傳單裡面嘅靈媒先生係個好勁嘅人物。
「哥哥，你可唔可以將我除靈？」細路女抬起頭，認真咁問眼前嘅男人。用無害嘅外表，講出無比嘅詭異說話。
靈媒先生見細路女只係嚟惡作劇，原本臉上親切有禮嘅服務業微笑僵硬咗。
細路女一直抬起頭等待佢回應，等到條頸已經開始好攰，所以再補充一句：「我會俾錢㗎。」
細路女喺自己嘅銀包仔拎出剩低嘅全部銀仔，遞俾靈媒先生。靈媒先生冇接受，擺出一個陰森恐怖嘅表情。然後用旁邊嘅食鹽灑向細路女，想嚇怕佢，都借此證明細路女並唔係靈體。
細路女冇避開，仲主動伸手接住食鹽。食鹽落喺佢身上，身體一啲變化同不適都冇。佢輕輕咁搖搖頭，表情好失望。
「係請我食？可以除靈㗎？」細路女眼定定咁望住手上嘅鹽粒，慢慢咁伸出脷，由下而上，將手上嘅鹽全部舔乾淨。
「仲未夠啊......我仲可唔可以食？」目光轉移到枱面上嘅細包食鹽，輕聲問。
靈媒先生都仲未反應過嚟，細路女已經迅速咁拎起食鹽，抬起頭，直接將剩餘嘅鹽都倒落口。靈媒先生嚟唔切阻止，只能夠震驚咁瞪大眼，睇住事情嘅發生。
好痛苦......
食鹽除靈，睇嚟係有效.....
「咳咳咳......」味蕾無法突然接受咁重口味，細路女直接將難受嘅表情流露出嚟。
好彩嗰包鹽只係剩返少少，食完之後，細路女意猶未盡咁用條脷舔一舔嘴角遺留嘅鹽粒。雖然痛苦，但佢嘅眼底閃爍住一絲瘋狂，令人心驚。
「點解啊？點解我仲未被除靈？」
細路女突然衝埋去捉實靈媒先生嘅衫角，再一次祈求佢：「請你將我除靈......」
「夠啦！唔好再玩啦！你咁樣食法，唔好話係靈體，就算係人類都會死，快啲飲水！」靈媒先生接受唔到細路女嘅瘋狂，將佢推開。然後即刻搵樽水，灌落細路女嘅口。
「小朋友，你絕對係人類嚟，一睇就知除唔到靈。快啲返屋企，媽媽等你開飯啊。」靈媒先生長期冇生意做已經好煩躁，都冇心情再同小朋友玩，唔耐煩咁想趕走佢。
「真嘅？冇理由㗎，明明媽媽話我係惡魔嘅女啊......如果我消失咗，佢就會開心。只要媽媽開心，只要佢鍾意我，我咩都會做㗎......」細路女好堅持，唔似講笑，反而似被人長期洗腦咁。
而靈媒先生聽完之後，不可思議咁望住眼前嘅細路女。正常嘅小朋友根本冇可能講得出呢啲說話，應該係佢嘅家長成日喺佢面前提，先會影響到佢。
「唉......入嚟啦。」靈媒先生一臉無奈咁嘆咗一口氣，轉身俾細路女入去坐。
佢搵咗好耐，但公司只係得咖啡同啤酒，完全冇啱小朋友飲嘅飲品同點心。佢最後喺西裝褸衫袋拎咗一盒喉糖，倒一粒遞俾細路女：「你食唔食糖啊？」
細路女望住眼前嘅喉糖，猶豫咗一陣先接住。低聲講一句：「多謝。」
佢同其他小朋友嘅反應好唔同，拎到糖之後，感覺好緊張，好抗拒。糖嘅外層被佢手指嘅溫度溶化，令手指有啲黐立立嘅感覺。
「點解唔食？」靈媒先生總覺得眼前嘅細路女好古怪同詭異。
「粒糖有冇蟲喺裡面？」細路女仔細咁觀察粒糖，天真咁問。
細路女而家會轉化為惡靈嘅指數係0%......