麥東冬: （二十八）婆孫

趕上列車，其實我都唔知去邊好。
或者隨意揀個偏僻啲嘅站，靜靜咁度過今晚就好。

車上嘅自由人唔多，我自己一個坐著。

唔知東冬會唔會等緊我呢…？
我開始猶疑，我咁樣走咗去會唔會太衝動。
但我知道如果我坦白同佢講我想見少啲嘅話，佢一定唔肯應承，我唔想同佢有爭論嘅場面。

我諗得入神，被一聲「哎啊！」打斷思緒，即刻抬頭睇發生咩事。




只見一個白髮老婆婆跌低喺地上，一個小朋友扶緊佢起身。
我隨即過去幫手，扶婆婆埋凳度坐。

「你無事吖嘛？」我問婆婆。
「無事！係上車企唔穩啫！」婆婆搭住個小男孩膊頭，對我講。

我望住個男仔圓圓嘅眼仔，然後坐喺佢隔離。

依個一老一幼嘅組合，令我有種好感觸嘅感覺。
佢哋會唔會係婆孫？點解佢哋會喺度？





心中有好多疑問，但唔知點開口問。

婆婆打破沉默：「我哋兩個都係無耐之前意外走嘅。我哋留喺度係因為想睇埋佢個妹妹出世。啱啱佢媽咪入咗院，所以我哋依家趕緊去。」
我未嚟得切反應，個男仔已經捉住佢婆婆不斷嚷著：「我好掛住媽咪啊，啱啱佢好痛咁，佢會唔會有事㗎？」
「一陣就見到佢喇，爸爸會照顧佢㗎喇。」婆婆攬實佢，安撫佢。

我同婆婆沿路上寒暄一番，而男仔就伏喺婆婆大脾。

個男仔突然拍我手臂問：「姐姐，你係咪同我哋一齊去睇妹妹？」




我望一望婆婆，再望返男仔，微笑一下。

「如果無地方去，不如一齊嚟醫院？幫我手睇住隻豆釘吖。」婆婆對我講。


於是誤打誤撞，我就同依兩婆孫去咗醫院。