麥東冬: （十九）自由人

每晚同東冬喺公園傾偈已經成為咗我嘅習慣。
雖然到目前為止，多數都係我喺公園等佢，但最少我知道佢一定會嚟。

亦可能因為我同佢有某種獨特嘅連結，我好似好容易感應到佢諗緊咩。
儘管如此，我仍然比較想佢親口同我講佢嘅日常，佢嘅感覺。


「貓cafe？一定好開心啊！唉我都好想去玩吓貓仔…」我好失落咁對東冬講。
佢突發奇想，拍一拍我：「喂其實我可唔可以帶埋你去㗎？？！」
「唔係唔得嘅，會有少少麻煩啫。」




「點解麻煩？」

我喺裙袋拎咗張紙出嚟，畀東冬睇。

「自由人的交通時間表？」佢望住個標題，一臉迷茫。

「係我前排遇到嘅一隻鬼畀我㗎。佢哋唔中意叫自己做鬼，而係叫『自由人』。可能因為佢哋覺得做鬼自由過做人？」我側一側頭猜想。

「又或者係因為鬼都係『來自人』，『由人』變成？嗯…咁個時間表係點睇㗎？」佢問。





「原來如果我哋要搭車，係要搭依幾班列車先得。唔知你有無留意，有時候咪有啲『不載客列車』嘅，其實自由人就係喺上面搭緊…」

「吓…」東冬無言以對。

「咁所以照返你同禾姍約嗰個時間，我就要搭……依班。」我指住個時間表講。

「哇咁你咪有排等我哋，我同佢改時間先。」佢即刻喺背囊拎出電話。
「約好咗唔好改啦！」感到唔好意思嘅我揮手擰頭想阻止佢。
「唔緊要啊我改早啲啦，我唔想你等咁耐啊。」





見到佢咁堅持，我雖然有啲無奈，但更加感覺到溫暖。
依種溫暖甚至令我有一絲嘅幻想。
只係我無勇氣去睇透幻想嘅真偽。
因為我知道我同東冬嘅關係只可以係依家咁，已經係最多亦係最好了。