麥東冬: （一）太古公園

深夜時份，我喺公園呆坐。無月光。
今晚太陽一落山個肚就開始唔爭氣，好肚餓。
附近壽司店、炸雞店都唔啱口味。個肚明明空空如也，但感覺一啖飯都吞唔落。
飢餓感令到頭腦都一樣空洞，好多事似乎都記唔起。

但我記得，我曾經喺依個公園唔見咗嘢。

公園裡面有個小草叢，專心聽嘅話可以聽到裡面有奇怪嘅碰撞聲。
我嘅目光離唔開個草叢，感覺有啲嘢就快跌落嚟。





路過餐廳外嘅玻璃，倒影裡嘅人蒼白無比。
依個真係我嚟？
我望住自己，視線轉到身後坐喺長凳嘅男仔。
佢彎低身雙手㩒住個肚，好辛苦咁。

我裝作散步，坐喺佢隔離嘅長凳，觀察一下有無嘢可以幫到佢。
哇...皺成一團嘅眼耳口鼻喺一塊蒼白嘅面上，同我嘅可以一比。
全世界都睇得出，你肚痛嘛。

突然，個男仔企起身跑走咗。