這一晚，有個陌生女孩睡了我的床: 第十三章

淋了一整晚的雨，我病倒了。

這一燒，就把我送到伊利莎白醫院。
 
高燒不退，使我又躺了數天在病床。
 
除父母之外，劉華明是第一個來探望我的人。
 
「咦，你仲未死啊？」
 




你見有哪一個去探病時，是會說這些話？
 
「唔見到你，都唔捨得死。」
 
「我知本少爺玉樹林峰，貌比崔世安，但抱歉，我已經心有所屬，容不下你！」他自戀的撫摸著自己的臉說道。
 
崔世安？
 
這個「直把世安作潘安」的現代版例子，使我當堂笑出來，這個笨蛋沒知識也擺，是潘安才對。還要沒常識，他到底有沒有看電視？
 




不過有劉華明在，他的搞笑永遠讓你笑過不停。
 
「邊個咁前世唔修，被你睇中咗啊？」
 
「好話啦，就係我地系既一個女仔，超級可愛，佢叫Chloe。等我考慮下比唔比你隻色狼睇先。」

他一邊打開手機的相薄一邊說。
 
「你就色狼，拎黎啦！」我把他的手機搶去，相中的女孩正展現很甜很燦爛的笑容吃著甜品，確實是一位可愛迷人的女生。
 




「執到啦你。」
 
「咩啊，我地都未一齊。」他把手機搶回，續說：「佢仲未忘記唔佢前男友。」
 
「你又點解會中意咗人？貪人可愛？」

「當然唔係咁膚淺啦。」
 
「咁係點？」我開始感到好奇，爬起身專心聽著。
 
「係因為……一個機緣巧合。」
 
他繼續開口說：「因為有一次，我同同學買左五月天飛，本身諗好一齊去睇，點知佢果日原來約左女朋友去長洲，成架飛機撞埋嚟，咪我就係班度問有無人去囉。」
 
「……點解你唔問我呢？」




 
他疑惑的問道：「乜你中意五月天架咩？」
 
我：「……」
 
那一刻，我有極極極極強烈的衝動，跟他絕交。
 
五月天啊！！！
 
誰會不喜歡？
 
我按耐著我心中渴望把他掐死的衝動，吞了口氣繼續說：「咁跟住呢？」
 
「跟住嗰個女仔第一時間舉手彈起，仲興奮到差Ｄ爬埋上枱係咁話：『我！我！我！』，又對住全班嘅同學講：『喂啊！你地唔准同我爭！』。」
 




好可愛的率直女生。
 
「原來佢係五月天嘅超級粉絲，之前仲飛埋去台灣為咗睇演唱會。不過今次竟然記錯時間，買唔到飛，所以佢就好多謝我。」
 
「你可以講重點未？」
 
「係啦，咁我同佢一齊去，原來佢真係超級粉絲，全場就不停重覆：尖叫、唱歌同喊。」
 
「一直以黎我對佢都無咩特別感覺，但嗰晚坐係佢隔離，我先發現佢表情同感情都好豐富，好有活力同熱情，突然之間，佢好似變到好有魅力咁。」
 
「跟住呢？」
 
「跟住我就中意咗佢。」
 
「跟住你就中意咗佢？」




 
「係啊。」
 
「跟住你中意咗佢？」
 
「係啊。」
 
「你有無跳咗啲野唔記得講？」
 
「我跳咗啲咩唔記得講？」
 
我哪知道啊！現在是我問你！
 
「一場演唱會，你因為覺得佢幾有魅力就中意咗佢？」
 




「啊不然咧？」他用國語說。
 
果然是劉華明，不是常人。
 
不過，感覺的確難以說明。
 
「咁你中意咗人，如果追到就對人好啲啦。」
 
我這句話是多餘的，因為我認識劉華明很久，雖然他在人前的形象，
 
是一個口花花，俗稱「把口啷過油」的花花公子，
 
基本見女生就挑逗，哄她們開心，
 
可是，認識久了，就會發現他實際上是一個用情專一，
 
很深情的人，喜歡了就喜歡了，不會移情別戀的少見好男人。
 
他有點失落的說：「都話佢未知落……佢都忘記唔到佢前男朋友。」
 
「佢前男朋友好好架咩？」
 
「好似話年紀大我地一啲，年紀輕輕就事業有成又靚仔嗰啲。」
 
我突然很替劉華明感慨。
 
你明白的。
 
「咁你點算啊？」
 
「你少同我擔心啦，我遲啲同佢去台灣。到時，佢一定會接受我。」他很有自信的說著。
 
我瞪大眼睛問道：「你同佢去台灣？」
 
「係啊。」
 
「兩個人？」
 
「全班。」
 
「嚇死人咩。」
 
我們沉默了一陣，劉華明好像若有所思的，忽然他很認真地望著我說：
 
「阿賢，忘記一個人，係咪真係好難？」
 
 
 
世上，有許多事不是努力就能做到，忘記一個人很難，因為你只能被動的等待時間替你刷洗回憶。
越要忘記一個人，越忘不了一個人，正如我忘不了你一樣。