《家姐話，幫我追女仔》: 四十九
大家點樣定義happy ending？
對於我嚟講，而家咁樣每日見到婷婷、同到婷婷過，其實已經係一種開心嘅——未到結局，但總係難啲畀你睇晒我人生嘅未來發展……
我哋兩個多咗好多得我哋先知道嘅默契。
譬如我哋有同一個笑點，做一個動作就知對方其實講緊啲咩——而呢啲嘢係我哋自己自創，就變得非常浪漫。
我會叫婷婷做「嘟嘟獸」，因為佢成日睇睇吓書就會不自覺嘟起個嘴，睇落好似好蠢咁……作為回報，婷婷私底下都會叫我做傻鴨……佢話我成日捧住個頭，都似傻鴨一樣咁呆。
我哋經過對方，就成日發出「嘟嘟！」、「傻鴨傻鴨～」嘅叫聲——其實真係超級無敵低能……但係得我哋了然於心，而其他人一臉疑惑，呢一樣嘢，原來係咁爽。
有時呢喺學校，婷婷去完廁所，咁啱我就出緊去廁所，婷婷就會扮：「請拍卡！」就係同佢輕輕擊個靚掌，然後先至畀我出。
係㗎，係好無聊㗎……但我覺得好sweet喎。
嘻嘻～
情人節要返學，咁婷婷就有送到朱古力畀我，聽講係佢同Winnie一齊整？做？（我覺得其實都係融咗啲朱古力，再倒落個模度，然後再雪……），講真，收到婷婷送嘅朱古力，我就已經覺得好甜——有人見到婷婷攞畀我，佢哋個個「Wow~~~」問我哋係咪拍緊拖？咁我哋兩個都一致地笑笑口，唔多講，大家明咪算囉——
其實都好明顯，其他人一提起我，就會諗起婷婷，相反亦然啦。
婷婷值日要擦黑板，其他同學都會自動自覺嗌我個名，叫我出去幫佢手；咁我當然都係含笑義不容辭啦，起初婷婷都會唔太好意思，但最後、慢慢多咗之後，就欣然接受啦。有人起哄——係，同我哋乜都冇嘅時候，係一樣，但同學仔嘅起哄係永遠唔會缺席的。
大家都好似知我同婷婷係有嘢的。
唔係好似，都係真係知先啱。
有時有啲咩，有人想同我交待，但咁啱見我唔喺度，都會話畀婷婷知叫佢幫手轉告；咁搵婷婷嘅同理啦。
不過冇乜人直接篤穿我哋啫，佢哋覺得我哋係怕醜。
都怕醜㗎，你哋成日潤我哋，點招架喎！不過我同婷婷兩情雙悅呢件事，的確係令我覺得，無謂點畀人抽水都冇所謂，事關你哋恨唔嚟㗎啦。
我哋好少出去玩嘅——之後先玩都未遲；話晒未拍拖。
原來同婷婷一齊，就算唔知做咩、虛耗光陰同生命，都係美事；到底，我有咩可能再會遇到咁樣嘅心動感覺？會有咩人可以令我咁畀心機去追求？恐怕冇……
而婷婷都有為我付出嘅，佢嘅態度都變得主動、熱切，多咗好多搵我，變得更加開朗、活潑，同我分享佢嘅日常、過往同屋企人嘅相處、未來志願、價值觀……
中五尾嘅時候，老師已經叫我哋填定Jupas，估吓自己大概幾多分、入唔入到心儀嘅學科咁樣。
我好慚愧，因為呢，我望住個表，諗嘅其實唔係自己嘅前程，而係諗希望想同婷婷入到同一間多啲——家姐就話我死蠢，呢啲重要決定係應該為自己做嘅，為女去決定，萬一畀女撇咁就喊三聲啦！
好彩，我望吓啲科，又咁啱係想揀同婷婷同一間㗎啫。
「喂喂，唔准再偷懶、打咁多機啦，一齊勤力温書啦！」婷婷總係咁同我講。
我當然冇。
中六就係Chur，係咁課後補課操卷，日日都好攰、好眼瞓。
有時喺屋企我已經唔想做，咁婷婷見到，就會話：「好啦好啦，我哋今日一齊休息一日啦！」就一齊去食甜品……
佢又冇逼我一定要變成點，但正正係佢呢一種「無論我點，佢都會接受」嘅態度，令我更渴望可以同佢有未來——一個令佢安心投入嘅未來。
唉……好難捱啊。
家姐會講：「得㗎啦，Chur埋佢，完咗DSE都放成幾個月假㗎喎，到時你鍾意點玩就點玩。」
但我知道其實家姐係呃人……事關我記得佢都冇乜點玩過，只係留喺屋企宅住過日子。
咁當然，我同家姐唔同，我有婷婷。
；
Study leave開始，我同婷婷就減少咗見，除非佢嚟我度操卷，否則都少講咗嘢。
有時做做吓，會感嘆：「DSE可能已經係最後一個、可以憑努力而有回報嘅人生試題嚟，將來就唔係咁，世界唔會公平。」
婷婷一聽到我咁講，就會應我：「咁你快啲努力去換取分數。」
我成日疑惑係咪真係需要咁畀心機去考——大佬呀，DSE咋喎！而家又咁多學位！但見住時間一日日咁過去，我竟然有焦慮感——開始驚冇時間温。
婷婷同樣……佢做得唔夠好時，成日都會講：「唔得㗎，我一定要叻啲，如果唔係就會差阿哥太遠……」
我知道屋企人一直有意無意畀壓力佢。我唔知可以做咩，始終我唔會完全身同感受，但我希望佢知道無論如何都會有我、喺佢身邊支持佢，同佢一齊努力。
婷婷對於我嚟講，唔止係我愛嘅女仔，仲係能夠同我互相鼓勵扶持嘅人——
冇人可以取代佢喺我心中嘅地位。
入試場嗰時，其實我覺得同平時分別唔大㗎，一樣係禮堂、多人、沉默，只係身邊啲面孔唔同晒咋。
有啲人好少布……有啲人好大浸驅風油味……有啲人成日郁身郁勢——屌晒你哋班仆街！唔可以正常啲考㗎咩！係都要做埋晒啲擾敵嘢？每次我都諗，婷婷係咪都遇到同樣嘅情況呢？佢又覺得點呢？
我冇一刻唔掛住你㗎，所以，你要知道，身邊有人係真係好着緊你、支持你。
我同婷婷係喺同一個試場考數，臨考之前，佢仲好緊張，話覺得好似一片空白咁，last minute咁睇返晒啲公式、口訣——佢對數學真係冇乜信心，相對佢其他科，呢科真係最差。
考完，我即刻去婷婷個座位搵佢。
婷婷唔出聲，只係低頭默默執嘢；我問：
「點啊？」
「唔太好……不過，算啦，都考完。」
婷婷仲好似想喊想喊咁。
「係啊，都考完，點都OK㗎，」我提婷婷：「唔好對答案啊，繼續温下一科。」
婷婷點頭，悶悶不樂，好不容易先食食吓飯開心返啲。
點知送完佢返屋企，佢WhatsApp我：「唔小心對咗答案……我會努力温其他科的T-T」傻！妹！叫咗你唔好㗎啦……不過人就係犯賤，事關我都去咗對。
哈、哈、哈。
總之，嚟緊要考DSE嘅同學仔加油呀，考完就算，唔好回望啦！
一個月之後，又真係考完——冇㗎，過程真係唔會有特別，係淆囉，但始終會考完。原來好多嘢都係咁，以為好耐、好煩，過後回望，不過爾爾——DSE對我嚟講，就係其中一樣啦。
「咁就完咗啦。」婷婷話。
「咁咪好囉，唔想再考落去啦我都，冇癮。」我答。
「其實而家香港咁，讀書仲有冇用？我哋嘅知識，係咪仲可以幫到社會？幫到香港？」婷婷自問自答：「得㗎，無論如何，都唔應該放棄希望……如果我哋都唔抱持信念，咁邊個幫我哋實現志願？」
「係啊，係啊。」我點頭。
此刻，我哋一同喺學校附近嘅公園仔坐緊，望住周圍，有花、有草、有小朋友喺不遠處嘅公園仔玩。