我倆的緣份，於半世紀前已經開始: 餐蛋麵

當哥哥換完衫出黎，見到落左妝但又有D尷尬嘅我，就知發生咩事啦

佢伸手叫我入一入去廚房

佢打開廚櫃，拎出兩個麵，同埋罐頭午餐肉

然後捉我入廚房

「唔……你真係咁清楚我嘅」





「唔係點做妳男朋友?」

哥哥又再一次表演佢嘅廚藝，佢為我整左碗餐蛋麵，加菜

麵身彈牙爽口，正

我望實哥哥，發現佢望住我微笑

「做咩呀?我個樣好怪?」





「唔係呀….我想望多妳耐D」

「咁我唔會走左去架嘛」

「妳唔係想去雪梨大學讀書咩?」

點解….哥哥會知嘅?

「邊…邊係喎」





「妳F.4果陣講架囉」

「咁….果陣我都未同你拍拖…而家我點都要留係你身邊架」

「咁婆婆呢?妳唔陪佢?」

「婆婆嘛……」

「妳唔好因為我，而扔低婆婆。我唔想因為我屋企嘅人，令佢再唔開心一次」

「但係…我地咪會分開囉」

「我可以去雪梨讀醫架嘛」

我擰一擰頭





「唔得，你係程浩翹。你唔係你爺爺同你爸爸。婆婆同你爺爺、媽咪同你爸爸嘅事，已經完左，我地兩個條頸鍊，只係家傳頸鍊，將來我都會除低佢」

「點解呢?」

「因為你唔係程偉忠，我唔係孔美玲，你唔係程逸風，我唔係張詩敏」

哥哥自己一個靜靜地唔出聲

「如果你真係鍾意過澳洲，我地可以結左婚先過去嘛」

「唔….」

「唔好諗咁多啦，知唔知?」





我攬實哥哥

「我地咁辛苦先一齊到，等我地過埋面前呢個難關再算啦」

唔知點解，我自己竟然講得出呢D野

我地洗完碗，兩個人沖完涼返房

我同佢一齊攤係床上邊，我攬到佢實一實

「總之….」

「唔?」

「哥哥你去邊到，我就會跟住你，我…..我地果陣係氧氣箱唔係應承左大家啦咩?」





哥哥搣一搣我個鼻「傻妹」

「咁你又肯要我呢個傻妹呀」

「我唔止要妳」

「咩..咩呀…我都俾左你啦」

「我仲想娶妳添呀」

聽到哥哥話想娶我，真係開心到想喊

「咁你自己同Daddy講啦」





第二日，我一出廳同契爺契媽食早餐果時，佢地俾左少少忠告我

「慧思呀….一陣呢…」

「唔?我咪返落去囉」

「唔係呀….我係想妳遲少少先返落去…」

我一面無知咁望住契媽「唔?發生咩事?」

我再望一望契爺，佢個樣有少少尷尬

然後…我又get到啦

「契爺….今次你地又買左咩呀?」

契爺支吾以對

「唔….呢層….唔……」

「姑丈偷偷地買左部電單車呀」哥哥邊食佢最愛嘅煎雙蛋邊講

「唔?點解哥哥你會知?」

佢將隻蛋慢慢啜入口到「姑丈俾我見到嘅」

「Daddy?佢應該有辦法氹返媽咪架喎」

契媽笑笑口咁樣對住我地「我就唔見得啦」

然後，daddy係浩揚哥哥間房行出黎