我倆的緣份，於半世紀前已經開始: 大姐夫出現啦

打左好多圈之後，媽咪入黎叫我地出去食飯

「妳地四隻小獅子，出去食飯啦」

點解哥哥仲未到嘅?我有D擔心佢

正當我四圍搵佢果時，原來佢已經坐左係婆婆身邊，同婆婆傾野

既然婆婆霸住哥哥，咁我唔去打擾佢地囉





我地開好檯之後，大家各自坐低

我地兩個比較特別，我同哥哥一定要一齊坐

因為….我地兩個都係用左手….兩個都係左拗

所以我自細就一定係坐哥哥隔離

大人一檯、我地細佬一檯





不過今日……大家姐男朋友終於要出席啦。一向好照顧我地班平輩嘅大家姐，咁耐都唔帶男朋友出席活動，不過今日婆婆有命令，一定要大家姐帶男朋友返黎

“叮噹”

我一馬當先走去開門，見到大家姐好怕羞咁雙手撓實個四眼仔

我認得係家姐床頭果個男仔

「家姐….妳好呀」





「嗯…..」

家姐好怕羞咁帶佢男朋友入黎，不過唔洗怕羞丫…..反正佢地個個都識，係未見過雪晴姨姨、翀契爺同Daddy之嘛

佢地一入到屋，Jayden哥哥就好識做咁同婆婆打招呼

「孔校長…好耐冇見」

婆婆望一望佢，就散出嚴師氣息

「Jayden，呢到係屋企，唔好咁拘謹，但你記住，上到庭，要有返個檢控官嘅態度」

「知道校長」

「小敏」





「係!婆婆!」

「乖乖地，唔好蝦人，叫得詩敏嘅都比較惡」

「知…知啦…」

在場所有人個個都點頭

然後可憐嘅爸爸……

我同哥哥坐係到食飯，佢對我好好，不停咁夾野俾我

呢個動作，引黎家姐恥笑





「Jayden，你應該未見過我細佬個女朋友喎」

「唔?Natalie?佢咪係到囉」果然同傳聞一樣，Jayden哥哥係有少少天然呆

「唔係家琪呀，我話浩翹個女朋友呀」

「浩翹呀…哦!!妳話佢地兩個拖拖拉拉左16年，互相鍾意大家果對嘛」

「係呀」

Jayden哥哥咁樣講一講，我塊面紅過紅蘋果，而佢都發現我嘅存在

「就係妳呀?小妹妹」

「係…我叫Charlotte」





「妳好呀」

「Jayden哥哥你好」

家姐見到我怕羞個樣，真係好開心，因為佢可以搞到我咁怕羞

「點呀?我呢個最細嘅妹妹靚唔靚呀?」

噢!!佢慘啦，呢條問題佢真係唔知點答啦

而家佢係我屋企，試下話我唔靚?即係話婆婆同媽咪唔靚，死罪

話我靚，即係話我靚過三個家姐，係奶奶同雪晴姨姨面前，死罪





正當我諗緊點幫佢解圍果時，佢發揮出大律師嘅能力

「係呢個假釋性嘅問題上，我唔需要有任何解答，因為呢條係一條引導式嘅問題」

嘩….學到野啦

「你評價呢?」

「而家冇任何表面上證據去俾我瞭解，呢個問題要交俾個官處理」

於是，哥哥幫人解圍啦

「家姐妳算吧啦，最靚係妳啦，冰山美人丫嘛，得啦!」

「你….你唔幫我架!!!扔你枝筆呀!」

「我扔妳兩塊紙板呀」

我地果檯嘻嘻哈哈咁係到玩

哥哥依舊不停夾餸俾我，不過有個人見到我呢邊咁多野，佢就行過黎食埋一份

我同佢一齊夾中舊鮑魚

「我夾到先架!!」「我夾到先架!!」

「㗅…..」「㗅…..」

冇錯!!!媽咪又黎爭野食

「媽咪妳返過去食啦」

「妳唔識讓下媽咪架?」

「㗅…..」「㗅…..」

「呀….姑姐呀…..我幫妳夾多幾舊鮑魚啦

「呀女妳學下浩翹啦」

「點解呀!」

「 妳咁勺蠻，佢肯要妳，妳執到啦」

「媽咪我似妳者，daddy肯要妳，妳執到啦」

「㗅…..」「㗅…..」

Jayden哥哥應該係俾呢一幕嚇左一嚇，三個家姐同家琪姐姐佢地見怪不怪

「食野啦，呢兩個係咁架啦，我地見慣」

「即係…..Charlotte係Miss Cheung個女呀?」

「係呀!如假包換，連脾氣都一模一樣」

「小敏妳都唔差者」

「咩話!!!」

「冇錯呀!表姐夫!!你講得好啱呀!!」x2

媽咪返左過去之後，佢地幾個又黎玩鬼我地

「慧思妳今晚上黎定係浩翹落去呀?」

我聽到之後碌大隻眼望住大家姐

「做咩呀??唔洗怕羞喎」

「我…我當然係自己屋企啦」

「但係妳又放個枕頭上黎嘅?」

「咁….我….平時….有時會…..呀….」

「今晚家琪黎我地到過夜，妳都上黎囉」

「唔好玩我啦家姐，聽日又要送佢返落去」

「真係唔洗上黎?」

「唔洗呀!!!今晚好多人爭廁所呀」

「好多咩?平時家琪都黎瞓架啦」

我望一望家琪姐姐，佢面紅紅咁樣

原來姐姐已經成日去過夜架啦?明明自己屋企又好近