我倆的緣份，於半世紀前已經開始: 踢爆兩位媽咪大鑊

「咁….Clodulf呀，Miss Lam果三個小朋友，你家姐Jasmine啦，我地好多同學都識啦，我地嘅師姐啦，咁你哥哥Ethan我地又好熟啦….咁佢女朋友都係我地狀元師姐Natalie啦。咁…Miss Cheung個女你識唔識呀?佢好似一個迷咁樣，有傳聞，佢都係我地學生，不過冇人知佢係邊個」
 
「哦….我識佢呀，我識佢….16年啦，我一直當佢係我妹妹咁睇」
 
「咁佢係點架?」
 
「佢生到同Miss Cheung好似樣啦，又一樣成日起飛腳啦，兩母女一樣，讀書時女子力係0啦」
 
「咁校長咪俾佢地激到飛起囉」
 


「唔止校長，Miss Cheung都成日打搞我屋企架」
 
「點打搞法呀?」
 
「日日夜晚呢，都係媽咪煮埋俾佢食」
 
「但係…Miss Cheung應該識煮飯架喎」
 
「佢識呀，但係佢懶嘛」
 


「咁….Miss Cheung個囡囡呢?係咪真係我地同學呢?佢姓咩呢?」
 
「呢層呀……我唔講佢係唔係英華妹啦，我話妳知，佢姓李」
 
「原來公雞二世係姓李架喂!!!咁多年嘅迷終於解開啦!!!!」
 
「咁Miss Cheung個女呢…識唔識獅哮功架?」
 
「哦…佢呀…識嘅，但未成氣候囉」
 


「原來三代都識獅哮功嘅」
 
「不過呢….佢又幾溫柔嘅….」
 
哥哥咁樣係台上讚我，搞到我面紅紅咁，亦引到好多同學望住我
 
「你講到同佢好熟咁喎」
 
「下?佢住我樓下五層之嘛，佢晚晚都去我屋企食飯架啦」
 
「咁呢…我地所有英華同學都想問架啦」
 
「妳問啦」
 
「Miss Cheung呢….私低下係咪好小鳥架?我地有同學見過佢同老公行街，兩個好甜蜜架喎」


 
呢個時候我都忍唔住笑….而哥哥係台上唔知點答好，因為媽咪係台下望實佢
 
終於媽咪拎起枝咪啦
 
「浩翹…..你要點答呀?」
 
「呀…姑姐呀….er……」
 
「你…知我想講咩架啦」
 
「呀….媽咪呀….」
 
契媽一面花生樣「你決定囉，我都救你唔到架啦」
 


不過有一個人救到哥哥，估唔到佢會現身
 
「浩翹，唔好怕，婆婆叫你講」
 
婆婆終於出現啦!!!!!!恐怖雞黎啦!!!!!!
 
「媽...媽咪…..」
 
「講啦浩翹，俾d學生知道下，我個女其實都係普通女仔一個，唔洗再傳聞佢係咩哥斯拉咁樣」
 
「係….其實姑姐…呀..即係Miss Cheung呢…同佢先生，係好甜蜜嘅….例如前排瞞住Miss Cheung偷偷地買新機玩，Miss Cheung都冇發嬲」
 
「咁大方?」
 
「係呀，我爸爸俾媽咪趕左去阿哥間房到瞓，然後自己獨霸部機…..果晚佢仲同阿姨同姑姐連線打FIFA……佢地三個打機同讀書一樣都好勁….」