我倆的緣份，於半世紀前已經開始: 氧氣箱中的我們

食完飯返到屋企，媽咪係書房改簿，而daddy就係會所做gym，呢個係好機會問下媽咪
 
「媽咪…我有d野想知道」
 
「嗯?有咩問題?」
 
「今日我係sogo掃貨果陣見到雪晴姨姨…佢話翹哥哥細個瞓氧氣箱，佢就快停心跳果時……」
 
「然後我強行打開個箱再放妳入去，係，雪晴姨姨講得冇錯」
 




「點解…妳要咁做…」
 
媽咪擰轉身過黎，除低佢副眼鏡…嘩…真係同婆婆一模一樣
 
「當時…浩翹佢有好多野未做過，雪凝姐姐冇抱過佢….佢未受過任何溫暖。以前佢係雪凝姐姐個肚，妳係媽咪個肚果時，我地一見面，妳地兩個就不斷咁踢，好似好開心咁。我地轉堂係走廊見到又踢，係教員室又踢，妳婆婆每日都係學校隔肚鬧妳地兩個，妳地就好似對小情侶咁，一見面就好開心」
 
「所以媽咪就放我入去?」
 
「果時我見到妳契爺擔心個樣，雪凝姐姐真係喊到收唔到聲，雪晴姨姨一個帶住四個細路又做唔到d咩…翀契爺不停搵藥俾浩翹，醫生公公不停睇報告…大家咩都做唔到果時，妳第一次笑」
 




「我果陣應該係手抱…」
 
「係…妳果陣剛滿月，我係到諗，妳會唔會知道浩翹係妳身邊，所以妳識笑。呢個小朋友，未食過媽咪一口奶，未俾父母抱過，如果咁就走左，佢會好可憐，所以我就走埋去打開個箱，將妳放入去陪佢」
 
「果時冇人阻止妳?」
 
「有，妳daddy，不過俾我一腳伸開左佢」
 
原來媽咪連坐緊月都咁好打……
 




「我一放妳入去，妳就自己捉實左浩翹隻手，然後…浩翹心跳回升，妳地兩個一齊打開眼，望住對方笑。果陣我地所有人都呆左，呢個唔知算唔算係奇蹟…所以…我地影低左張相」
 
「我好似未睇過」
 
媽咪打開電腦一個file，入邊全部都係我同哥哥嘅相，個file第一張相，就係我地兩個係氧氣箱果張相。我一望見，就不自覺流眼淚，初生bb嘅記憶慢慢係腦中海馬體之內，好似流水咁樣流出黎。
 
係一個暖暖嘅箱仔，我見到一個bb正準備離開，慢慢消失，但佢仍然對住我笑。我好鍾意眼前呢個bb，所以我伸手一捉，好似捉到佢，然後佢又再次出現係我面前，我好開心咁笑左出黎。果個唔係夢…係我真實嘅記憶
 
「可能呢個就係妳地兩個從細就開始鍾意對方嘅原因。」
 
「但係….哥哥而家明明…」
 
「不如咁講啦，佢對Winnie唔係冇感覺嘅，始終Winnie係我地英華近年來最top嘅學生，係男仔都會睇上佢嘅」
 
「我唔俾!」




 
「唔俾?」
 
「我唔會俾佢搶走哥哥架!」
 
「慧思，媽咪同契媽都唔可以幫妳，妳要靠妳自己知唔知?」
 
「知道…但係媽咪…點解妳會俾我係讀書時…」
 
「媽咪都後生過…我知妳點諗」