我倆的緣份，於半世紀前已經開始: 公主

旋轉木馬上，我真係好似個公主咁樣，所以我最鍾意就係旋轉木馬
 
“咔嚓咔嚓”清脆嘅相機機械快門聲係我身邊響起
 
每一次玩旋轉木馬，每一次入迪士尼，哥哥都會幫我影好多相
 
因為佢話係迪士尼玩緊嘅我，笑容係最甜最可愛
 
每一次入park，哥哥總係會買野俾我戴係頭上邊，今日佢揀左個公主小皇冠俾我
 




「唔?今日我又唔係著裙，都唔似公主」
 
「戴起佢啦，妳係我心中永遠都係一個公主」
 
「都唔知幾時先遇上一個錫我嘅王子」我講呢句說話時，抬高頭望佢。但係佢仍然好似平時一樣，愛理不理咁
 
不過算啦，我都已經慣左佢咁嘅態度啦
 
我地離開小店，係美國小鎮大街見到有職員拎住一大堆汽球
 




我地兩個望一望對方，可以話心有靈犀咁，大家一齊走去職員果到，我拎住堆汽球，而哥哥又幫我影相
 
迪士尼之中，最刺激嘅遊戲，一定係反斗右兵大本營果部衝天搖控車同埋降落傘(其實我都係覺得好小兒科)
 
玩完呢兩樣野，我地又走去灰熊山谷到玩過山車
 
終於玩到兩點幾，我都識叫攰要休息，我地兩個人坐係餐廳到食快餐就算，冇計啦，我地仲係學生，邊食得起小鎮大街兩間餐廳
 
一如以往，我都係食到成面都係
 




今次哥哥冇幫我抹啦，佢今次係不停影我相，而我就愈食愈污漕，連食雪糕個樣都俾哥哥影低埋
 
「喂呀!!!!咪影啦!!!!」
 
「妳食到咁樣，好難唔幫妳影一輯沙龍架喎」
 
「幫我抹啦!!!!!」
 
「好啦好啦，幫下妳啦」
 
哥哥幫我抹完咀之後，我地仍然坐係到
 
「係喎，遲d個Joint school talent show妳係咪報左名呀?」
 
「唔?你點知架」




 
「呀…..因為…..有人講我知」
 
「邊個?」
 
「呢層….」
 
見佢口窒窒，欲言又止，我都9成估到係邊個
 
「係唔係Winnie?」
 
「呀…係…」
 
「又係佢!!!」我嘟長個咀發脾氣
 




「妳…唔好嬲先啦」
 
「佢點知我個名架!!!」
 
「咁佢有時又去中央，可能有人講佢知呢」
 
「咁佢知唔知我係恐怖雞三世?」
 
「呢樣我冇同過佢講呀」
 
「算你啦」
 
「咁妳會表演d咩?」
 
「我同契媽同埋媽咪表演佢地當年拍住雪晴姨姨個6手鋼琴」




 
「妳代阿姨?得唔得呀?佢果Part好似係最難架喎」
 
「你咪理啦，不過我唔係英華妹，Winnie有冇覺得奇怪，點解媽咪要搵我呢個真光妹幫手?」
 
「其實冇人知道係妳」
 
「唔?你又話Winnie知嘅?」
 
「姑姐幫妳報名，係用特別幫手名義，冇用妳個名」
 
呢個真係似足媽咪嘅作風，咁都要玩神秘
 
「咁你呢?你唔上台表演?」
 




「我有咩好表演呀?」
 
「你有冇聽過我地Daddy以前試過上台搞楝篤笑?」
 
「哦，互相踢爆果次丫嘛，聽過呀，搞到阿姨同姑姐係台下面紅紅咁樣」
 
「嗯….你都可以架?」
 
「我有咩好爆?爆妳係我屋企成日走光?」
 
原來…我經常係哥哥屋企走光?點解佢唔提我
 
「你…你偷睇我?!」
 
「喂….咁妳係我屋企不修邊幅….好難睇唔到喎」
 
「咸濕仔」
 
「個talent show我真係諗唔到野表演，都係睇妳演出就算」
 
「不如你上去你問我答囉，反正契爺契媽同媽咪都試過」
 
「我又唔係風頭躉，到時再算啦」
 
講時講，又係巡遊嘅時間啦