條女有鳩而我冇賓周: 63

「…我鍾意你。」浩俊咬咬嘴唇，因羞澀而垂下頭，雙眸熠熠生輝。

公園入面總會有風掠過，拂動浩俊額前碎髮，對方緊張嘅神色一下子竄進穎怡心底。

穎怡有啲飄飄然，個心輕到幾乎可以飛上天空同白雲一齊飄向遠方嗰種。

成件事有啲不可思議，穎怡根本冇想像過浩俊會喺呢個時機告白，佢甚至冇諗過對方會有主動袒露心意嘅一日。

於是穎怡微不可察咁捏一捏手掌心，嘗試提醒自己並非發緊夢。





一用力捏。

穎怡痛得即刻「嘶」一聲咁縮開手，然後側目打量浩俊。

對方顯然唔知道自己嘅內心小劇場上演緊一套激情又緊張嘅戲，坐立不安咁等待自己嘅答案。

可惜穎怡並唔急住答對方，反而想解答內心嘅疑問：「你係幾時開始鍾意我？」

到底對方係幾時開始意識到自己嘅心意呢？穎怡的確冇想像過一臉冷淡嘅浩俊會有動情嘅一日。





「其實我幾年之前就見過你。」浩俊突然抬頭凝視穎怡，琥珀色眼眸喺陽光下變得透亮耀眼：「嗰陣你俾人妖呃，所以喊到豬頭咁。」

聽到浩俊提起不堪回首嘅往事，穎怡臉色變咗變，瞬間醒起當時的確有個學生遞咗包紙巾俾自己。

原來係浩俊。

咁即係自己一直都喺對方嘅心入面？

「當時都唔知咩事，但係見到你咁唔開心，反而羨慕起你可以毫無遮攔咁顯露出自己嘅情緒。」講到呢個位，浩俊有啲難為情，耷低頭講道：「之後我成日去個網吧，就係為咗睇吓你點行返出嚟。但自從嗰日起就冇再見到你。」





一陣熱浪迅速卷上穎怡耳邊，浩俊咁長情嘅一面真係意料之外。

「喺地鐵重遇你嗰陣，我幾乎真係想同你搭嗲。」浩俊輕聲講道：「但冇諗過你會偷拍我。」

穎怡有啲尷尬咁𢲷𢲷頭：「咁…」

生得咁好睇嘅人，邊個會忍得住呀？

「你俾我捉到偷拍之後就急急腳走咗，但我好怕又要再等多三五七年先見返你。」浩俊娓娓道來：「所以我就不斷咁諗，希望可以快啲搵到你，就算你認唔到我都冇所謂。」

皇天不負有心人，願望終於成真。

咁多年以嚟心思念念嘅人而家就坐喺自己面前，靜靜地聽住自己坦白從寬。

「咁聽起嚟好似啲痴漢同人講完一句就死心塌地咁，但由打機都撞到你嗰時開始，我就覺得唔可以再錯失任何機會。」





「但係你唔怕我真係網絡人妖咩？」穎怡不禁反問道。

「你當年講咗句說話令我印象幾深刻。」浩俊摸摸下巴，然後緩緩開口：「無論你係男定女都好，我就係鍾意你呢個人。」

兩人四目交投，滿眼都係對方嘅身影。

一切情意瞬間升溫，感覺連塊面都開始熱起嚟。

穎怡深呼吸，努力按捺住心臟瘋狂亂跳。

「咁啱嘅，我都鍾意你呢個人。」

就算你係網絡人妖都係咁話。