條女有鳩而我冇賓周: 44

「我今日代你阿sir幫你上堂。」浩俊言簡意賅地講道，連望多對方一眼嘅力氣都懶得浪費。

「你識唔識教㗎？」坐喺浩俊對面嘅係一個短頭髮高中生，圓眼，小瓊鼻，精靈外表輕而易舉地惹起人嘅好感，然而浩俊反應冷淡得令高中生自尊心受創，不禁不滿起嚟。

「你學校教到邊？」浩俊選擇性失聰，忽略對方嘅挑釁。佢轉身除低件灰色外套，捋起恤衫衫袖就拎起放喺枱面上嘅數學書。

書面上寫住「穎心」兩字，令浩俊不禁諗起穎怡嘅名，穎怡嘅笑容頓時喺浩俊腦海中一閃而過。

揭開本書，一堆以原子筆創作嘅塗鴉頓時映入眼簾，不論係加咗撇鬚嘅數學家定係各種各樣嘅卡通人物應有盡有，甚至有淡淡嘅口水漬，難怪需要補習。浩俊無奈地想道。





「你唔知咩叫藝術！」穎心本身仲整理緊額頭上嘅空氣瀏海，一望到自己嘅創作被發現時，連忙用手擋住數學書，匆忙揭去最近教嘅嗰一課。

浩俊默不作聲地將書轉到自己面前，對雜亂無章嘅算式嘆咗一口氣：「個角唔係咁搵。」

連步驟都可以抄錯，睇嚟真係一個人才。浩俊拎起鉛芯筆仔細圈出題目入面嘅錯誤，然後望向穎心：「你改完俾我睇吓。」

生人勿近嘅浩俊同和和藹可親嘅曦銘截然不同，穎心喺冷冰冰嘅視線底下根本無法專心，手下嘅動作隨即緩慢起嚟：「你可唔可以做一次俾我睇？」

浩俊無可奈何地將題目嘅做法示範一次，乾淨俐落嘅筆跡突顯其主人剛強嘅個性，字與字之間嘅距離更令人感覺到浩俊生人勿近嘅氣場。





穎心：可唔可以同阿叔嚟接我然後俾我早走
穎心：個補習阿sir好惡

穎心喺浩俊計數嘅時候慌忙地向表姐求救，更加send咗身處嘅Cafe地址俾表姐，希望對方可以伸出援手。

然而喺穎心send出最後一條Whatsapp嘅時候，浩俊就抬起頭凝視穎心，令對方不寒而慄。

算啦，連補習阿sir都要求要生得好睇啲嘅人又會認真得去邊。浩俊說服自己道。

「穎心叫我哋接佢喎？」穎怡疑惑地拎起電話，表妹嘅補習老師唔係曦銘咩？點解會係惡嘅？唔通曦銘心情唔好？





「我陪你去接佢？」阿叔略微擔憂地問道：「平時條友好少會驚人架喎～」穎怡同穎心嘅性格相近，從來唔會俾任何人佔有上風嘅機會，今次竟然遇到對手，令阿叔都好奇起穎心口中嘅補習老師。

「好呀。反正都唔係好遠。」穎怡着起外套，全黑嘅裝束就好似保護色咁護住自己。

「係喎，唔記得問你。」阿叔喺搭緊𨋢嘅時候隨口問起：「你拍拖未？」

「你覺得呢？」穎怡突然直視阿叔，漆黑嘅瞳孔令人睇唔清情緒：「你覺得我咁毒都有人要咩？」

「可能有㗎～」阿叔諗起幾年前有人曾經問過關於穎怡嘅事，輕笑出聲：「有啲人鍾意奇珍異獸都冇計。」

「你想話我係奇珍異獸呀？」穎怡作勢一拳打落阿叔嘅腹部，嘗試去報仇。

「嗱，係你對號入座咋！」阿叔反駁道，兩個人打打鬧鬧咁一路行到Cafe出面。





「喂，幾時同我單挑？」阿叔突然一下子搭落穎怡嘅膊頭上，兩個人之間嘅距離瞬間拉近。

「傻啦！你練好隻英先好講……」穎怡笑住推開阿叔嘅時候，突然望到坐喺Cafe窗邊，一臉錯愕嘅浩俊。

今次尷尬了，幫穎心補習嘅唔係曦銘咩？穎怡嘅笑容凝結喺嘴邊，佢飛快地行入Cafe同穎心打招呼。

「你喺度嘅？」浩俊衝口而出，當佢望到穎怡出現時又驚又喜，但對方身邊有咁親密嘅異性時，內心竟然有一絲不快。

「係，我係嚟接走表妹嘅。你可唔可以放人？」穎怡尷尬地笑起嚟，手下拍一拍穎心嘅頭頂。

點解曦銘冇同我講過穎心係穎怡表妹嘅？點解會見到穎怡嘅？堆疑問頓時喺浩俊內心彈出嚟，佢望住企喺不遠處嘅男人，心情變得複雜起嚟。

「你……可以。」浩俊欲言又止，望咗眼穎怡背後嘅男人就冇再繼續落去，內心變得酸溜溜起嚟。

浩俊啞口無言地睇住穎怡同其餘兩人行出Cafe，發現就算自己有幾介意都好，原來到最後都係冇資格去過問對方嘅感情事。到底啱啱喺穎怡隔籬嘅人係邊個？