條女有鳩而我冇賓周: 41
好可愛啊！！！！！！月伶本來對呢種轉彎抹角嘅表白方式嗤之以鼻，但當佢望到曦銘臉紅耳赤嘅模樣時，內心頓時化成一灘水。
夜深人靜，公園內昏黃嘅燈光灑落喺長櫈上，周遭嘅環境逐漸暗淡，連附近打情罵俏嘅情侶都唔再喧鬧，一切聚焦喺兩個人身上。
「然後呢？」月伶嘅聲音划破寧靜，用盡奶力去壓抑激動不已嘅心情，但係聲線仍然不受控咁變高。
「對唔住，我拖咗你咁耐。」曦銘一臉誠懇咁望向月伶，佢吞一吞口水，然後不慌不忙道：「其實我思前想後咗一段時間，喺度諗到底點樣開口先好。」
曦銘諗起以往經歷過無數個不眠夜，大多數都喺度猶豫應該點樣向月伶承認自己對佢嘅心意。佢從來冇諗過會係呢一晚，亦都冇諗過會係月伶提醒自己行出呢一步。
月伶感覺自己嘅心跳快到幾乎歷歷可辨，佢望穿秋水，滿心期待咁等待曦銘接落嚟嘅說話。
「你想唔想同我呢個廢柴喺埋一齊？」曦銘半分玩笑半分真咁問道。
時間變得靜止不動，連一直吹喺耳邊嘅風都一剎那煙消雲散，曦銘直視住月伶清澈見底嘅雙眼，自己嘅表情下意識凝結起嚟。
曦銘忽然發現連等待月伶回應嘅嗰幾秒都如坐針氈，佢唔敢想像月伶等自己嘅嗰幾年有幾辛苦。
「好呀。」月伶不加思索咁答道，佢揞住漲紅嘅面珠墩，不斷咁岌頭。
我終於得咗啦！！月伶嘅內心有一個小人歡喜若狂咁不斷跳動，恨不得即刻同穎怡同海螢分享自己終於修成正果。
「無論你點問都好，個答案都唔會變㗎喎。」月伶嘅嘴角情不自禁咁上揚，已經冇辦法再掩飾對曦銘嘅愛慕。
曦銘情不自禁咁伸出手，想將月伶擁入懷抱中攬到實一實。但又怕自己過於熱情，兩隻手又收返埋身旁。
月伶見狀偷偷地笑咗下，今日嘅曦銘彷彿食咗誠實豆沙包咁，慌張嘅神情可愛得令自己心動不已。
只不過，月伶嘅內心仍然有道刺。佢煞有介事咁坐返喺長櫈上，有意無意咁拉近同曦銘之間嘅距離。
「咁即係你同嘉琪…」月伶試探性咁詢問道，只要每一次諗起嘉琪同曦銘之間嘅交流，內心就自然被酸澀填滿。
雖然話曦銘生得好睇，係女都會黐埋去，但月伶唯獨對嘉琪特別有戒心。
而曦銘對任何人都一樣嘅友好態度，某程度上係導致月伶缺乏安全感嘅源頭。
「梗係冇嘢啦！」曦銘知道月伶有所誤會，焦急咁擰頭否認道：「佢又唔係你！」
轟呀！曦銘嘅說話猶如揼咗粒核彈落月伶嘅內心深處，掀起狂濤巨浪。
係係係，我知道啦！！月伶怕醜得不知所措，周遭嘅氧氣猶如變得稀薄起嚟，令人無法思考。
佢望向坐喺對面嘅曦銘，對方一臉寵溺嘅表情令自己好似加咗對翼咁變得飄飄然。
「都幾夜啦。」曦銘適時咁望一望電話，然後開口道：「我送你返去？」
雖然曦銘巴不得每分每秒都可以同月伶見面，但理智仍然喝止住佢活蹦亂跳嘅心臟。
月伶打咗個喊路，依依不捨咁收拾起長櫈上嘅嘢。佢將曦銘嘅長褸披喺身上，雙手緊緊咁握住大褸嘅袖口。
佢悄悄咁聞咗聞長褸上— 係洗衣粉嘅香味。
兩個人慢悠悠咁踏上返去嘅路程，月伶假裝漫不經心咁抬頭偷望行喺身旁嘅曦銘— 對方逆住月光嘅笑容令月伶怦然心動，月伶開始連眼都唔捨得眨，佢滿腦都想將對方嘅身影刻入心底。
曦銘望住距離不遠嘅屋苑，刻意放慢腳步，令月伶行喺佢身前。
曦銘細細打量前面嘅人，佢回想起幾年前紮住馬尾嘅少女，同此時此刻披住長髮嘅月伶，兩個身影重疊埋一齊。
月伶就係有種神奇嘅魔力，令自己對佢嘅心意始終如一。
「做咩？」月伶忍唔住擰轉頭問道，一臉疑惑咁望住愣咗愣嘅曦銘。
「冇，純粹有啲唔捨得。」曦銘笑住講道，眼底蘊藏住無限溫柔。
曦銘又再一次準確無誤咁擊中月伶嘅心臟，令月伶心神蕩漾。但快樂嘅時光總係過得特別快，兩個人已經行到月伶嘅屋企樓下。
「件褸我還返俾你啦。」月伶羞澀地微微耷低頭，將長褸遞去曦銘面前。
「唔洗啦～下次出嚟你再俾返我？」曦銘冇接過嗰件褸，佢嘅視線無一刻願意喺月伶對眼上移開。
咁係咪即係佢約緊我下一次出嚟！？月伶內心歡喜若狂道，表面上睇落風平浪靜，內心已經泛起層層漣漪。
月伶「嗯」咗一聲，然後將長褸緊緊咁抱喺胸口前，兩個人戀戀不捨咁凝視住對方。
「呃…」曦銘欲言又止：「你返上去瞓啦，我會睇到你入𨋢為止。」
「唔洗啦，你都送到我嚟呢度—」月伶輕聲道：「我會睇到你行到路口為止。」
兩邊都唔願意讓步，僵持喺原地。月伶疲倦咁捽一捽眼，忽然伸手推咗推曦銘嘅上半身。
「好啦。」曦銘嘅心一軟，但仍然滿臉不捨咁講道：「我走啦。」
時間一點一滴咁流逝，月伶滿眼柔情咁凝望曦銘，希望可以捉緊如此珍貴嘅時刻。
曦銘開始緩緩向後行，一頭撞上身後走廊嘅石柱。佢吃痛咁摸一摸頭，但依然唔願中斷同月伶嘅眼神接觸。
啊！！點解連咁柒嘅事去到曦銘身上都可以咁可愛嘅？？月伶內心尖叫道。
「我走啦。」月伶嘅笑容滿溢住幸福，裝模作樣咁擰轉身，慢吞吞咁行去大堂嘅位，餘光不斷打量後面嘅曦銘。
明明今日都唔係飲得咁多，但點解啱啱又咁大膽嘅？曦銘不禁問道。
唔緊要啦，至少個結局係好嘅。佢望住月伶嘅身影行入𨋢度，先放心咁轉身就走。
原本接近凝結嘅時間重新緩緩流淌，曖昧不清嘅氣氛慢慢平淡落去。周圍嘅環境恬靜得猶如冇發生過任何事一般。
然而月伶嘅頭下一秒突然喺𨋢度悄悄咁望出嚟，靜雞雞咁跑去曦銘嘅背後。
今晚發生過嘅所有事無一令月伶心悸，佢滿眼都只有曦銘嘅身影，身體好似不受控咁一心想接近對方。
喺短短幾秒內，周遭嘅環境隨住月伶抱落去嘅動作而變得模糊不清，冬天嘅嚴寒一下子升到令人臉紅心跳嘅溫度。
專屬曦銘嘅氣味撲鼻而來，月伶深深咁吸咗口氣，沈浸喺呢一刻嘅美好之中。佢隔住曦銘嘅毛衣喘氣，成個世界淨係得番對方「咚咚、咚咚」咁逐漸變得急促嘅心跳聲。
「嗯？」曦銘望到兩隻手環抱到腰前嘅時候，大腦直接宣佈停止運作，深啡色嘅瞳孔因為驚訝而放大。
「幫你做埋啱啱你唔夠膽做嘅嘢先。」月伶嘅觸碰好似帶電咁令曦銘上半身剎那間僵直起嚟，雙耳恍如被蒙住咁，唯有聽到嘅只有月伶重重嘅喘氣聲。
應該點反應啊！！點算啊！對方嘅一呼一吸都撼動住曦銘嘅心臟，令佢無處可逃。曦銘一瞬間變得心亂如麻，反應變得遲鈍起嚟。
「我真係走啦。」正當曦銘仲掙扎緊嘅時候，月伶突然開口講道，靦腆咁避開曦銘熾熱嘅視線。
點解我可以咁唔要面嘅？？月伶羞恥得鬆開抱住曦銘嘅手，狼狽咁耷低頭原路逃跑返去電梯大堂。
曦銘仍然反應唔切，雖然佢喺月伶逃走嘅時候嘗試去拉住對方，但已經太遲，空氣中只係剩低月伶噴過嘅香水味。
下次我一定會抱返佢，一定。佢遺憾咁握緊拳頭，失神咁望向月伶嘅背影。
平日嘅月伶根本唔會喺曦銘面前失控，但今日恍如剎唔切掣咁不斷展現自己嘅真情實感。
究竟佢會點睇我呢？月伶倉皇咁推開玻璃門，幾分鐘前拖拖拉拉嘅神態盡然消失。
但，我啱啱真係好幸福啊。月伶臨入𨋢前停咗停，依舊唔敢擰轉面望曦銘嘅表情。佢思索片刻，背住曦銘揮一揮手就行入𨋢。