條女有鳩而我冇賓周: 38

對曦銘而言，只要係月伶有份出席嘅聚會，自己嘅心情就會不自覺地愉快起嚟。就算要應酬幾多人都好，只要可以望到月伶一面，曦銘就會心滿意足咁繼續默默關心對方。

只不過……今次嘅情況有啲尷尬。個距離會唔會太遠？！

曦銘坐咗喺間房嘅角落頭，而月伶就企咗喺間房嘅另外一個角落，兩個人彷彿被厚厚嘅人牆擋住咁。

曦銘一臉無奈咁望咗眼坐喺隔籬嘅浩俊，有時候同浩俊出去聚會真係好掃興，對方一直都面無表情咁拒人千里，成塊面就好似寫住「我被迫出嚟㗎放過我啦」。

都係月伶好。





「喂～點解今日你嚟嘅？」胖虎拎住一包薯片行去曦銘嗰邊，一下子搭上曦銘嘅膊頭。

作為月伶嘅熟人，曦銘唔單止同公會入面嘅人素有來往，尤其係胖虎等平易近人嘅成員，令曦銘更快同佢哋打成一片。

「係囉，點解嘅。」胖虎嘅問題篤中浩俊嘅好奇心，佢雙眼直視住曦銘，似笑非笑咁問道。

雖然浩俊一直知道曦銘對月伶有意思，但點解偏偏係揀自己同穎怡相認嘅日子先出現嘅？浩俊回想起曦銘當時心虛嘅表情，已經大概估到自己嘅好兄弟係俾花生嘅香味吸引過嚟，但佢仍然想聽對方嘅解釋。

「冇啊。」曦銘知道自己已經無路可退，又唔想將責任推卸俾月伶，佢唯有從實招來：「其實我都係早幾日先知穎怡係女人，今日諗住你哋出嚟，咪湊下熱鬧囉。」





「你唔早啲同我講？」浩俊一開始聽到事實嗰陣的確有啲不快，佢從來冇諗過曦銘會有同自己講大話嘅一日。

仲要係俾另外一隻網絡人妖玩番轉頭……浩俊條件反射咁望向穎怡嗰邊嘅時候，佢咁啱就同穎怡四目相對。

但當穎怡下一秒就慌張咁移開視線嘅時候，浩俊感覺對方就好似做錯事俾人捉到咁，佢忍唔住想笑。

算。個體驗冇想像中咁差。浩俊推咗罐啤酒去曦銘面前，聲線毫無起伏咁講道：「你爭我一份人情。」

「知啦知啦。」曦銘悶悶不樂咁一飲而盡，然後擰轉面望住胖虎：「點解你咁快就適應到阿桃係男人嘅？」





想當初自己都要段時間先接受到個事實…不過都好嘅，至少代表自己少咗個對手。曦銘望向同穎怡有傾有講嘅月伶，心情開始暢快起嚟。

「好快就接受到啦！已經經歷過一次喇嘛～」胖虎拍住大髀笑道：「知道穎怡喺女人嗰陣，已經係幾個月前嘅事啦！」

咁即係胖虎同小明都有份呃埋自己。浩俊諗起當初同佢哋打機嗰陣嘅事，喺心入面嘅小器簿寫上胖虎同小明嘅名。

「點解你講到做網絡人妖好似好平常咁嘅？」嘉琪嘅聲喺胖虎身後響起，一手揸住骰盅，慢悠悠咁行過去曦銘一行人坐嘅梳化隔籬。

邊位？浩俊嘅腦海入面彷彿冇同嘉琪交流過咁，匆匆咁望咗嘉琪一眼就冇再理過對方。

「都OK平常㗎！」曦銘一見係唔熟嘅人就進入交際草模式，佢笑住開口：「你睇吓，呢度已經有兩隻喇喎～」

「係咩？男仔嘅話我還好。」嘉琪目光炯炯咁望住浩俊，佢頓咗頓：「但係女仔做網絡人妖就…我會覺得佢生活太枯燥囉。」

條女咩事？浩俊打咗個冷震，對住第一次見嘅人就咁講嘢㗎咩？





「係呀？」曦銘知道嘉琪嘅說話意有所指，但佢又唔敢仔細問穎怡同嘉琪之間嘅過節。

曦銘見過唔少唔識相嘅人，咁唔要面嘅人都係第一個。但出於禮貌，佢又唔好意思拒絕人，唯有尷尬咁坐喺度儘量陪笑。

都係月伶好。曦銘再一次望向月伶坐嘅位置，至少月伶唔會咁刻意。

今次終於到曦銘同月伶四目交投，月伶望到曦銘同嘉琪嗰陣僵咗下。

月伶下一秒就擰轉面，有意逃避曦銘嘅視線。曦銘見到月伶臉上嘅笑容一下子煙消雲散，而佢忽然覺得佢同月伶之間嘅距離好似返到去啱啱識嗰陣咁。

曦銘恨不得即刻同月伶解釋清楚，但係佢知道自己只不過係對方嘅師兄，根本冇澄清嘅必要。

但係當佢望到月伶強顏歡笑嗰陣，個心都好似跌咗落谷底咁。





「你唔肚餓咩？」胖虎意識到氣氛有啲奇怪，佢將包薯片舉到嘉琪眼前：「見你好似食得嗰幾啖咋喎。」

「你知道我不嬲都咁細食㗎喇～」嘉琪推開包薯片，夾硬坐落浩俊同曦銘中間，令浩俊一臉厭煩咁褪開個位俾個不速之客。

「我都係第一次聽。」胖虎用住誇張嘅口型同浩俊講道，浩俊若有所思咁笑咗笑，決定將專注力放喺電話度。

而可憐嘅曦銘就成為嘉琪嘅目標，佢臉上努力保持住不失禮貌嘅微笑，上半身慢慢咁褪後，嘗試同嘉琪維持一段距離。

「你識唔識玩大話骰啊？」嘉琪突然問道，佢有意無意咁湊近曦銘嘅位置。

「識啊識啊！」曦銘俾嘉琪嘅熱情嚇親，佢好似捉住救命稻草咁做揸實放喺枱面嘅骰盅，目光喺月伶坐嘅嗰一帶徘徊。

「咁你可唔可以教我啊？」嘉琪掛上嫵媚嘅笑容，故意摸上曦銘捉住骰盅嘅手。

金翅仆街鳥。





曦銘嘅餘光見到月伶目擊到呢一幕，而當佢縮開隻手嗰陣，月伶已經擰轉身走開咗。

「三唔識七就摸嚟摸去。」浩俊似乎睇唔過眼，開口道：「你唔尷尬架咩？」

「唔好意思。」嘉琪笑道：「可能我醉醉地。」

對曦銘而言，只要係月伶有份出席嘅聚會，自己嘅心情就會不自覺地愉快起嚟。

但今次嘅情況有啲尷尬……月伶竟然開始逃避佢。

曦銘嘆咗口氣，點解佢今日可以咁失敗呢？