條女有鳩而我冇賓周: 34

幻覺嚟㗎啫，嚇我唔到嘅！

雖然之前都見到佢喺屋企附近嘅公園跑步，都估到佢應該係住呢頭㗎喇，但—

到底再一次遇返之前偷拍過嘅人係咩運氣？穎怡嘅大腦不斷咁諗出唔同嘅應對方法，行開？定係若無其事咁企喺度？

穎怡僵喺原地一動不動，佢餘光打量到男仔企咗喺自己隔籬。睇嚟對方都喺度等緊人。

佢提心吊膽咁繼續耷低頭望電話，明明阿桃喺Whatsapp度顯示在線上，但對方仍然唔覆自己嘅訊息。





唔通佢想放飛機？

快啲覆啦！！！穎怡內心吶喊道，唔知道係因為隔籬嘅人身材高挑，定係因為自己作賊心虛，穎怡總係感覺到有種濃濃嘅壓迫感。

其實放飛機都幾好啊？至少而家自己可以即刻拍拍籮柚走人，唔需要再企喺仇家隔籬。

穎怡：喺邊？

穎怡膽戰心驚咁作最後掙扎，打算如果對方仍然唔覆嘅話就即刻逃離現場。





「叮」

唔撚係掛？

穎怡嘅大腦一瞬間變成一片空白，佢難以置信咁抬起頭，一臉驚嚇咁望住企喺隔籬嘅人。

佢嚇到即刻望返手機，發現佢同阿桃之間嘅對話多咗行新訊息。

阿桃：喺你隔籬





成件事對穎怡而言仲恐怖過親眼目睹貞子爬出電視，佢成世人都未試過經歷類似嘅事。

「桃…阿桃？」穎怡再一次望去男仔嘅方向，戰戰兢兢咁講道。

You竟然是個boy？？？

但同時點解偏偏要係之前捉到自己偷拍嘅人啊—

「驚驚？」浩俊神色自若咁問道，彷彿已經唔記得穎怡之前對佢所做過嘅事。

「你…唔係女人嚟架咩？」穎怡驚慌失措咁問道，一向唔怕生嘅佢呢一刻發生故障。

「你唔係男人嚟架咩？」

對方嘅反問令穎怡無言以對，佢同浩俊你眼望我眼，場面一時間陷入寂靜。





即係我媾嘅唔係女，而係仔？而我一直都估唔到？穎怡內心問道。

「你好人好者做咩網絡人妖？」穎怡已經將得罪過對方嘅事拋諸腦後，反而被怒氣沖昏頭腦。

佢冇諗過俾人欺騙嘅感受會咁複雜，由阿桃調戲自己嘅嗰陣，到開始同對方傾偈，逐漸了解對方，到而家發現原來對方竟然係一個男仔……到底一直以嚟嘅相處有幾分係真？

「你係咪應該問返自己？」浩俊不怒反笑，佢都冇諗過一直以嚟同自己傾偈嘅人原來係一個女仔。

「咁打和囉…」穎怡唔忿氣咁迴避男仔嘅視線，生得咁好睇但就有啲咁奇怪嘅癖好…真係暴殄天物。

「再唔搭車就會遲。」浩俊似乎唔想再喺啱啱嘅話題上糾纏落去，佢行前幾步，示意穎怡跟住佢一齊走。

「你一陣叫我阿怡就得。」穎怡整理好思緒，決定行去浩俊隔籬。





「你可以叫我阿俊。」浩俊言簡意賅咁答道，然後快步行入車廂。

點解又係叫阿俊嘅？潛伏腦海深處嘅記憶重新湧上心頭，穎怡失神地望住對方。

又係叫阿俊，又係做網絡人妖。穎怡被巧合嚇到，但又知道此俊非彼俊，當時欺騙自己嘅係一個女人。

「俊？邊撚度俊呀？」穎怡忍住內心嘅波動，開口嘲笑對方。

然後下一秒穎怡就親身體驗咗次自打嘴巴嘅滋味。

接近六點嘅太陽就好似粒鹹蛋黃咁，陽光恰好照到浩俊嘅臉上，令穎怡再一次陷入花痴模式。

又真係幾俊嘅…穎怡再一次睇到入神，由對方又濃又長嘅眼睫毛，到佢對清澈見底嘅眼。

穎怡都係第一次見識到原來有人塊面係可以完全符合佢嘅取向。





佢好似已經唔記得我之前嘅事，睇嚟可以挽救下形象…穎怡抬頭望咗眼行喺企喺對面嘅浩俊。

「你望乜鳩？係咪又諗住偷拍我？」浩俊被穎怡望得唔耐煩，忍唔住開口問道。

我都係收返啱啱嗰句算⋯穎怡內心欲哭無淚。