條女有鳩而我冇賓周: 30
浩俊，阿桃…
阿桃，浩俊…
月伶嚇得啞口無言，佢小心翼翼一邊咁用紙巾抹走嘴邊嘅果汁，一邊努力咁消化事實。但係佢根本就冇辦法將嗰個嬌滴滴嘅阿桃同寡言嘅浩俊拉上關係。
兩個人之間根本一啲共通點都冇！
「咁即係佢一直都喺度呃我哋？」月伶猶豫片刻，皺住眉咁講道。
咁當時阿桃故意激自己嗰陣背後嘅企圖係咩？
咁阿桃同穎怡之間嘅事……穎怡根本唔知道阿桃係男人！
月伶內心突然有一股莫名其妙嘅怒火，佢開始為穎怡打抱不平。
「呢一點就……我幫浩俊講聲對唔住先。佢份人比較有惡趣味，希望你可以大人有大量。」曦銘一臉歉意咁講道，令月伶嘅心又化成軟綿綿嘅豆腐。
月伶默不作聲咁攪動自己杯果汁，佢竟一時間無言以對。呢一刻佢在意嘅唔再係自己，而係被欺騙嘅穎怡。
但係穎怡係咪完全無辜呢？穎怡都喺度扮緊男人㗎喎……
曦銘見月伶臉色古怪，開始後悔自己選擇向對方講出事實。
明明當初打算同月伶坦誠相見，但點解對方嘅反應好似比起自己想像中差？到底誠實係咪一件好事？
「無論點都好，可唔可以唔好將呢件事講出去？」曦銘誠懇咁望住月伶，希望對方可以幫忙保守秘密。
月伶托住腮咁望向浩俊，露出為難嘅表情。今舖應該點解釋呢？到底應唔應該同佢講穎怡嘅身份呢？
「但係…」月伶糾結咁講道，雖然平日佢都會順從曦銘嘅說話，但今次情況比想像更複雜。
但係既然曦銘選擇同自己開誠相見，咁好似都冇必要再瞞落去。
曦銘見月伶嘅表情變得凝重，一開始見面嘅嗰種緊張咁一掃而空。佢深諳不妙，決定救場。
「其實我都知道驚驚同浩俊，即係同阿桃之間有啲嘢—」曦銘手忙腳亂咁解釋道：「要你去瞞住好朋友的確有啲困難…」
唔係瞞唔瞞朋友……而係你都唔知道件事嘅來龍去脈。月伶忐忑不安咁諗道。
月伶深深咁唞咗啖氣，言簡意賅咁講道：「其實驚驚係我現實中嘅朋友，佢女仔嚟。」
於是曦銘嘅表情扭曲起嚟，忍唔住「下」咗一聲。佢從來冇諗過一直以嚟自稱係男人，同自己一齊打機嘅朋友，竟然係女人。
咁即係浩俊一直調戲緊嘅人唔係男人？咁即係自己一直都呷緊一個女人嘅醋？
曦銘同樣地陷入沉默，到底自己應唔應該同浩俊講驚驚嘅真實身份呢？
「打和！Super！」月伶打破僵局，尷尬咁乾笑道：「唔怕同你講埋，聽晚公會會約出去食飯，即係我哋嘅朋友會見面。」
聽日會見面？但係浩俊會放心去見驚驚咩？
曦銘一言不發咁喺度思考，平時保持上揚嘅嘴唇此時此刻變成一條直線。
到底浩俊見到驚驚真人嗰陣會有咩反應呢？一直習慣呃人嘅浩俊會唔會接受到自己俾人玩返轉頭？
月伶見氣氛未緩和，向曦銘嘅方向伸手：「拿，我哋啱啱交換咗情報，咁我哋就係共犯㗎啦！」
曦銘欲言又止，一臉唔放心咁望住月伶：「你諗住唔講？」
諗到自己好朋友聽日就要同驚驚見面，曦銘忽然就躊躇起嚟，雖然浩俊甚少會發脾氣，但係聽日會係點樣嘅修羅場呢？
月伶狡猾咁笑道：「將錯就錯唔好咩？我反而想睇到時佢哋會有咩反應喎！」佢揈一揈手，催促曦銘儘快落決定。
事都如今，雖然月伶同樣地對穎怡有一絲愧疚感，但佢反而更好奇兩個網絡人妖相認嗰一刻所碰撞出嚟嘅火花。
曦銘微微嘆氣，無奈咁笑咗聲：「但係我聽日都想去。」佢表示妥協咁握咗下月伶嘅手。
當月伶同曦銘掂到對方嘅手嘅嗰一刻，月伶就好似觸電咁打咗一個冷震。
成個Cafe就好似靜咗咁。
月伶一下子移開視線，唔敢直視曦銘。
睇嚟月伶啱啱係因為朋友嘅事而得意忘形，當佢感覺到曦銘手掌嘅溫度嗰陣，月伶重新記起一個事實— 坐喺面前嘅人其實係自己暗戀多年嘅師兄。
「好…好啊！我一陣send埋地點時間俾你。」月伶被突如其來嘅身體接觸嚇得一瞬間失神，佢內心嘅理智責怪自己大驚小怪，但係同時又有啲飄飄然。
曦銘彷彿感受唔到月伶窘迫嘅情緒咁，佢潛意識咁將啱啱掂到月伶嘅手握緊，另一隻手拎起放喺枱上面嘅單。
曦銘泛起淡淡嘅微笑：「我哋出去行吓？」月伶「嗯」咗聲，打算搶返曦銘手上嘅單實行AA制。結果曦銘舉高張單，利用身高壓制對方。
「你當係我想收買你呢個盟友啦。」曦銘笑道，自己行咗去收銀處埋單。
月伶嘅視線停留喺曦銘嘅背影上，細細聲咁抱怨咗句：「唔使你請食飯都收買咗啦…」
轉眼間兩個人就企咗喺Cafe嘅門口面面相覷，月伶磨擦雙臂，感受到夜晚六點幾嘅絲絲涼意。
得嗰少少風，係唔會嚇到我嘅！月伶內心鼓勵自己道，要靚唔要命不嬲都係自己嘅宗旨。
難得同曦銘出街，我絕對唔會親手毀滅自己嘅形象！
曦銘望咗月伶一眼：「啱啱食完飯有啲飽，行路送你返屋企先？」
「好啊，都係行十分鐘啫。」月伶抬眼望向曦銘，睇唔透對方嘅表情。
兩個人默默咁踏上往月伶屋企嘅路程，一向健談嘅曦銘竟然一時諗唔到話題，令氣氛瀰漫住一股尷尬感。
月伶目不轉睛咁望住曦銘嘅背影，忽然感覺自己又重新返到去中學嗰陣，曦銘永遠都比自己行得更前，而自己好似冇資格企喺佢隔籬咁。
就算而家多咗個盟友嘅稱呼，點解好似仲有啲距離咁嘅？
月伶下意識咁嘆咗啖氣，令曦銘擰轉身關心自己。當佢哋雙目接觸嘅嗰一刻，月伶跌落谷底嘅心又重新飄起嚟。
絕對唔可以浪費咗呢十分鐘佢！月伶內心激動道。佢左思右想，最後決定將話題兜到曦銘身上。
「咁既然阿桃係男人嘅話…即係你冇去過其他女仔嘅屋企？」月伶一唔小心又將內心嘅疑問衝口而出，佢下一秒就意識到自己嘅身份不足以干預曦銘嘅感情生活，唯有心虛咁擰轉頭四周圍望。
「冇啊。」曦銘微微側頭，饒有趣味咁打量月伶。而月伶就羞愧咁耷低頭，後悔自己啱啱嘅一時衝動。
「哦～」月伶似懂非懂咁拖長語氣，內心竊喜。咁即係其實自己冇所謂嘅情敵喇～
佢主動咁快步行去曦銘隔籬，假裝不滿咁講道：「唔好行咁快啦。」
月伶耷低頭望住佢同曦銘愈行愈近嘅兩個影，佢悄悄咁將右手往曦銘嘅方向移一移，令兩個人嘅手重疊埋一齊。
隨住兩個人嘅影行得愈嚟愈近，月伶嘅心跳就變得愈嚟愈快。
就算喺現實生活冇機會拖手，用個影嚟代替一下應該都唔算貪心啦掛？
月伶仔細咁望住地下，彷彿要將呢一刻深深咁烙印喺腦海入面。
「乜我行得好快咩？」曦銘意識到自己過於緊張，於是佢放慢腳步，遷就月伶嘅步伐。
「係呀，師兄你咁優秀，讀書又叻，連行路都快過人—」月伶開玩笑道：「我本身以為同你讀到同一間大學已經跟到你步伐，但係果然都係差咁啲嘢。」
雖然對月伶嚟講係無傷大雅嘅說話，但玩笑之間都有幾分真心。
而事實的確係好似月伶所講咁，佢永遠都追唔上嗰個好到識發光嘅曦銘。每一次月伶想放棄嗰陣，曦銘總會擰轉身望住佢，令月伶重新充滿希望。
曦銘突然停低。
月伶同樣地停落嚟，好奇咁觀察曦銘嘅動靜。
「咁我等你。」曦銘一臉認真咁講道。
等我？我係咪聽錯？月伶感覺個心臟唔再係屬於自己嘅咁。
今日曦銘到底係咩事啊！！月伶面紅耳赤咁擰轉面，又開始逃避曦銘嘅視線。
「唔使你等！我返到去會同你講㗎喇！」月伶個腦已經停止運作，佢眼見離自己屋企仲有一段短短嘅路程，驚慌失措咁逃離現場。