條女有鳩而我冇賓周: 22

「點解冇聽過你講佢嘅？」月伶漫不經心咁攪動枱上嗰杯凍檸茶，對眼瞄向海螢嗰邊。

「見你哋呢排煩緊阿桃嘅事，所以咪冇點提過。」海螢如實交代。佢一向性格被動，唔會主動同其他人提及自己嘅事，就算係面對穎怡同月伶亦一樣。

坐喺海螢隔籬嘅穎怡做咗個「哦～」嘅口型，佢已經對海螢內向嘅性格見怪不怪。海螢耷低頭，將頭埋喺厚厚嘅頸巾入面，雙手握緊杯冒住熱氣嘅咖啡。

「咁你覺得佢點？」穎怡輕輕撞咗撞海螢嘅手臂。

「佢啊？雖然打機唔算勁，但人幾好。」海螢言簡意賅咁答道，塊面唔知係因為暖定因為怕醜而變紅。





海螢喺網上同現實世界中嘅性格截然不同，只要唔係當面傾偈，佢都顯得大大咧咧，性情豪邁。然而去到現實生活中，佢更加似一隻需要保護嘅小動物咁，待人處事小心翼翼，無時無刻都保持住羞澀嘅微笑。

「你睇得上眼嘅男仔肯定唔簡單。」月伶揮一揮手叫侍應埋單。海螢聽到月伶嘅肯定之後，嘴上嘅笑意變得更濃。

「點解會鍾意佢嘅？」海螢心入面疑惑道，到底係幾時開始對佢咁上心嘅呢？

海螢諗起當初望到對方嘅名— 「鐵馬秋軒」，佢嘅第一印象係對方肯定係個中二病末期嘅小朋友。結果自己嘅判斷大錯特錯，原來對方係一個大過自己兩年嘅男人。

鐵馬秋軒對佢而言有種難以言喻嘅吸引力，由對方成熟嘅談吐、再到兩個人喺文學上嘅志趣相投、再到佢豁達嘅人生觀，佢好似成身都充滿令海螢仰慕嘅魅力咁。





由海螢每日都期待可以同鐵馬秋軒傾偈嘅嗰一刻起，佢意識到自己已經變咗做鐵達尼號，深深咁沉咗喺嗰片叫鐵馬秋軒嘅大海中，無法自拔。

但到底係啲咩令自己咁心動呢？

「我覺得呢件襯你多啲囉！」月伶拎起一條裙放喺海螢身前比對，強行將海螢扯返去現實。

海螢定眼一看，發現月伶所揀嘅衫原來係一條深藍色嘅短裙，貼身嘅設計會將身材曲線體現得淋漓盡致。海螢臉上泛起尷尬嘅微笑，佢將條裙放喺身上，一望到條裙短到上自己大髀位就打咗個冷震。

「第一次出街著短裙實冇死！」月伶感覺到海螢嘅擔憂，喺約會中身經百戰嘅佢有自己嘅一套秘訣。佢拍一拍海螢嘅屁股，強調短裙嘅重要性。





「你著嘅話會好睇啲。」海螢輕聲講道，將裙遞返俾月伶。佢嘅視線喺衫架嗰邊毫無方向咁游離，對自己應該揀咩衫仍然一頭霧水。

「又或者呢件呢？」穎怡喺其他衫架前徘徊咗一陣，將一件衫遞俾海螢。

穎怡所選擇嘅衫係一件咖啡色針織背心同一條奶茶色長裙，更加適合海螢文靜嘅氣質。

「屌！佢已經成屋都係呢啲衫，講到明係約會就唔好咁着到日常啦！」月伶無奈咁打斷兩個人，然後拎咗另外一條短裙俾海螢。

「你哋揀自己想著嗰啲衫啦。我自己睇就得。」海螢保持住同樣嘅微笑。

「拿，你要意見就問我哋啦！知你有選擇困難症。」穎怡拍一拍海螢嘅膊頭，走開咗去其他衫架度睇衫。

海螢怔怔地望住月伶俾佢嗰條格仔裙，喺度考慮究竟自己要唔要試吓著一次短裙出去。

「點解你又著成咁出去？」海螢嘅腦海浮現起屋企人對佢嘅批評，佢拎住短裙嘅手鬆咗鬆，內心開始退縮。





海螢喺一個傳統家庭中成長，重男輕女嘅父母對佢哥哥噓寒問暖，對海螢就冷嘲熱諷。海螢只要稍微用心打扮一下，父母就會惡言相向，問佢係咪勾引異性、問佢買衫嘅錢係邊度嚟。

喺屋企毫無地位嘅佢，自然養成沉默寡言、對任何人都可以百般遷就嘅性格。甚至係佢嘴邊一成不變嘅微笑都係一種保護機制，以免俾屋企人指責自己成日愁眉苦臉。

海螢唯一嘅發洩點就係打機，只有喺遊戲上佢先可以無視任何人嘅臉色，我行我素。只要自己一日仲可以喺網上自由自在咁做最真實嘅自己，海螢都可以忍受到苦澀嘅現實生活。

此時此刻，呢種想活得無拘無束嘅妄想終於燃燒到現實中，海螢緊緊握住條短裙，已經想像到父母到時變本加厲嘅責罵。

「你做乜望住條裙發吽哣？」月伶冰涼嘅手摸到海螢嘅臉，佢一臉疑惑咁望住不知所措嘅海螢，下一秒就記起海螢內心嘅掙扎。

「哦～我同穎怡夾份幫你俾囉！到時你撻我哋兩個出嚟咪得！」月伶知道海螢屋企嘅情況，體貼咁安慰道。

海螢向月伶投向感激嘅眼神，月伶唔好意思咁笑住揮一揮手，行去收銀處嗰邊排隊。





穎怡喺海螢手上拎走條短裙同針織背心，從容咁行去月伶隔離有講有笑。

「今次又係要靠佢哋幫手。」海螢嘅內心莫名其妙地煩躁起嚟，佢開始厭倦咁軟弱嘅自己、開始厭惡一直要低聲下氣嘅日子。

「咁懦弱嘅我，係咪真係可以同佢行得愈嚟愈近？」海螢咬緊嘴唇，眉頭深深咁皺埋一齊，腳步開始不受控咁行去月伶嗰邊。

「今次我俾啦。」

正當月伶要俾錢嗰陣，海螢把聲突然打斷咗佢嘅動作。

海螢漲紅住臉咁喺自己銀包拎咗幾張銀紙遞俾收銀員，令穎怡同月伶用詫異嘅眼光打量住佢。

「你肯定唔使我哋幫你？」穎怡擔憂咁問道。

「受咗成十幾年嘅氣，我唔通仲要繼續忍咩。」