條女有鳩而我冇賓周: 19

浩俊本來仍然打算同胖虎同小明打多幾鋪機，但穎怡突然間邀請自己去一間新嘅組隊房間，喺好奇心驅使下，浩俊果斷拋棄其餘嘅人。

空蕩蕩嘅組隊房間淨係得浩俊同穎怡兩個玩家，浩俊被一片寂靜悶得發慌，決定率先打開話題。

「點解突然搵我嘅？」浩俊㩒開支mic問道，背後熾熱嘅太陽令佢心跳加速起嚟，微微期待起對方嘅答覆。

到底驚驚想點呢？浩俊不禁好奇起對方嘅企圖。到底對方模糊不清嘅態度背後真正嘅想法係咩呢？

「喂？」一把同以往截然不同嘅聲音傳入浩俊耳中，清澈嘅女聲刺激住每一條神經：「聽唔聽到？」





穎怡若無其事地㩒著支mic開口講嘢，但唔記得自己自從做group project之後就唔記得開返變聲器。

熟悉嘅聲音震撼浩俊嘅內心，係佢，係幾年前遇到嘅女仔，係喺地鐵偶遇嘅佢。原來一直幫月伶試探自己嘅竟然係嗰個女仔，竟然係自己一直喺度提防嘅人。

棕色瞳孔因驚喜而放大，臉部表情一下子凝結起嚟，千言萬語頓時堆積如山，湧到逐漸上揚嘅嘴邊。

幾年嚟一直念念不忘嘅人重新出現喺浩俊面前，以相反嘅性別為面具掩飾自己嘅身份，以另外一個身份再會。

「聽…聽到。」浩俊聲音微微顛動，心臟激動得就快跳出胸口，一時間不知所措起嚟：「做咩？」





喺另外一邊，穎怡反而迷茫地𢲷一𢲷頭，為對方微妙嘅反應感到疑惑：「唔好意思，突然開mic係咪嚇親你？」

「唔係啊！」浩俊喉嚨一緊，一臉不敢置信地望住驚驚嘅icon，急忙回答道。

唔怪之得我一直都遇唔到佢…浩俊回想起當時為咗重遇個女仔，特登為咗對方download英雄聯盟，更加故意搵喺遊戲中同樣住喺元朗嘅女仔。

原來佢搖身一變，做咗個有賓周嘅女玩家。

浩俊唔敢想像當年嘅女仔竟然同自己之間只有一面屏幕之差，到底對方同自己講嘢嗰陣係咩心情呢？到底應唔應該講佢唔記得開變聲器呢？





「你唔想出去嘅話可以唔去。」穎怡單刀直入，直接同浩俊講出自己嘅想法：「我信你係女仔。」

自從阿桃出手幫助穎怡後，穎怡就對阿桃嘅存在更加有信心，甚至已經當咗對方係朋友。

唉，驚驚而家當咗我係女仔，咁點算。浩俊不禁懊惱起嚟，但又想出去再同對方見面。

都已經等咗佢幾年，唔通要錯過呢個機會？浩俊諗起當時會為咗重新遇到驚驚而不斷再去同一個網吧搵佢，但咁多年以嚟都冇收穫。

「冇呀。」浩俊衝口而出，長長嘅睫毛微微震動，滿眼寫住不捨：「我唔介意出嚟。」

原來朝思暮想嘅人一直都喺自己隔籬。浩俊嘅視線停留喺驚驚嘅icon上：「不如我哋早啲出嚟見咗面先？」

穎怡思索片刻，欣然答應對方。提早同對方承認自己係網絡人妖，總好過一下子就要對方消化事實。

屏幕小心翼翼地保護起浩俊嘅心跳聲，令穎怡對一切茫然不知，佢仍然覺得自己有開著變聲器，阿桃仍然唔知道自己嘅身份。