條女有鳩而我冇賓周: 16

晏晝十二點半，熾熱嘅陽光啱啱好曬到浩俊嘅背脊。一向怕熱嘅浩俊遇到呢種情況一定會心煩氣躁，然而佢而家毫不動搖咁喺英雄聯盟咁同新識嘅朋友傾偈，心情變得愈嚟愈好。

「哦～所以你都係因為驚驚所以入嚟！」一個外號叫胖虎嘅男人講道：「唔怪得你成朝都喺度問佢啲嘢啦！」

阿桃：都？有其他人咩？

浩俊興致勃勃咁打字問道，佢冇諗過驚驚會有能力吸引到咁多人。

驚驚對浩俊而言仍然係充滿神秘感謎團，令人不禁好奇起對方嘅另一面，於是浩俊採用自己最擅長嘅方法。





幾日前浩俊就已經加入咗驚驚所在嘅公會，而佢宜家只需要同公會嘅其他成員打好關係，就係可以打聽驚驚嘅事。

浩俊一朝早就起咗身，搵到平日經常同驚驚組隊嘅公會成員，然後一一邀請佢哋打機。

人類總係會被外表亮麗嘅嘢吸引住，浩俊嘅女裝icon果然成功咁吸引到驚驚嘅兄弟，更加令對方開始將自己當成好朋友。

「呃…哈哈哈哈哈！」胖虎知道自己啱啱唔小心講多咗，唯有尷尬咁笑道：「講錯嘢啫！」

浩俊知道繼續追問落去只會暴露自己嘅諗法，佢唯有問其他嘢轉移話題。





阿桃：咁你哋見過佢真人未？

「見過啦！」另一個叫小明嘅人答道：「一開始見到佢真人嗰陣嚇死人啦～」

「嚇死人？」浩俊疑惑咁摸一摸下巴，對驚驚嘅存在愈來愈好奇。

「係，一開始以為係真男人嚟。」胖虎笑住附和道：「結果就…就」胖虎一時間唔記得掩飾穎怡係女人嘅事實，差啲講漏口。

「嗰陣佢仲話有靚女同學搵佢帶打機吖嘛！」胖虎突兀地轉換話題：「屌！識靚女又唔叫！」





真男人？浩俊聽得滿頭問號。

「咩唔叫呀！」小明留意到阿桃冇再打字回覆，開始打圓場：「呢度咪有呀桃囉！」

阿桃：唔好咁啦，我怕醜 (´,,•ω•,,)

「咁咪即係佢同月伶係同學？」浩俊心入面諗道，隨便敷衍隊伍入面嗰兩個人。

阿桃：咁佢同阿月熟唔熟？

浩俊一提到月伶嘅網名嘅時候，小明同胖虎即刻喺一秒內回答佢嘅問題。

「好撚熟！佢哋成日黐埋一齊架！」佢哋異口同聲咁講道。

「咁又係，之前曦銘嚟食飯都提過佢哋識對方。」浩俊冇再加入佢哋嘅話題，佢眼見其他人未有開game嘅傾向，開始自己喺度思考。





浩俊坐喺張凳度望住天花板，幻想有兩個叫曦銘同月伶嘅圓形，然後喺佢哋之間畫咗粒心。

「佢哋兩個之間有嘢就一定㗎喇，但關驚驚咩事呢？」浩俊努力咁諗返以往嘅事。

浩俊隱隱約約記起月伶尋日對住電話提過「收兵」兩隻字，頓時如夢初醒。

「唔通佢係月伶隻兵？！」浩俊突然大膽咁假設道：「咁唔怪得啦！」

然而，雖然浩俊終於認為件事水落石出嗰陣，莫名其妙地有啲唔啹。

「咁咪即係佢唔係對我有興趣。」浩俊想道：「原來淨係為咗討好女神。」

咁早知唔幫佢手趕deadline啦。浩俊回想起驚驚一直以嚟同自己嘅對話，一諗起佢會用同樣嘅態度對住其他人，就好似嚿玩具唔再屬於自己嘅咁。





「喂！驚驚要入嚟玩啦！」胖虎把聲喺手機傳出嚟：「呀桃你仲喺唔喺度？」

阿桃：喺度啊～

「今鋪我仲唔玩死你。」浩俊耷低頭望住西鐵線驚驚嘅icon出現喺隊伍入面，成個人仍然有啲心煩意悶。