條女有鳩而我冇賓周: 13

夜晚八點半，食完飯穎怡摸住肚腩滿足咁返到去自己間房，一屁股坐落電腦凳上，搵咗個最舒服嘅姿勢，開始打開Instagram睇其他人嘅Story。

「我係咪都應該出去社交下呢？」穎怡望住中學同學嘅相，感覺佢哋嘅生活過得特別充實。相反地，自己就一如既往咁宅喺屋企打機，中學同大學嘅生活都係食飯、瞓覺，同打機。

但看似枯燥乏味嘅生活實際上比想像中有趣，網絡世界上發生嘅事多得可以媲美每日更新嘅長篇小說。

然而，有時穎怡都會不禁懷疑起自己嘅一成不變事實上係咪停滯不前。

「算啦，都係唔好搞咁多嘢。」穎怡自暴自棄咁撳熄螢幕，視線停留喺自己嘅倒影度。





留喺溫室嘅生活總比險惡嘅社會更舒適…穎怡表面上作自我安慰，內心仍然被淡淡嘅無力感包圍起嚟。

張月伶：打機要人！

穎怡嘅手機螢幕突然因為收到Whatsapp而重新著返，令上一秒嘅愁緒一掃而空。

張月伶：我約咗曦銘啊！求支援！

月伶大張旗鼓咁喺Whatsapp group度召喚同伴陪打機，穎怡呆咗呆，醒起幾個鐘之前月伶先提過同曦銘之間嘅約定。





但穎怡仍有一絲遲疑，曦銘身旁嘅阿桃就好似一粒不定時炸彈，對方同曦銘之間嘅交談無一影響到月伶嘅情緒，更會隨時波及到自己。

雖然對方係救命恩人，但穎怡唔願再因為月伶而再冇咗條命仔。

楊穎怡：啱啱食完飯要消化下，你哋玩先

穎怡諗起曦銘嘅時候，自然諗起對方身邊嘅阿桃。佢皺一皺眉，隨便作咗個理由拒絕月伶。

林海螢：你哋二人世界啦，我唔想做電燈膽





海螢喺推卻完月伶之後，反而私底下搵穎怡打機。

穎怡望住海螢句「靚女carry我排位ok？」，思考咗一陣，最後都係決定拒絕對方。

林海螢：做咩咁反常啊？平時你一定即刻應承㗎喎

楊穎怡：感覺一online就會見到阿桃…

穎怡嘆一口氣，坦誠咁將自己嘅擔憂講出嚟。佢煞有介事咁摸住微微冒汗嘅手掌，默默咁等待海螢嘅回覆。

林海螢：點解驚嘅？一係踢返佢出公會？

海螢好奇咁問道，喺佢心目中對網上社交自信滿滿嘅穎怡竟然都會有有所推卻嘅一日。

楊穎怡：阿桃尋晚幫咗我一個大忙，依家對佢有啲矛盾囉





穎怡最後選擇坦白從寬，拎起床上嘅攬枕，心煩意亂咁對住攬枕打咗幾拳。

穎怡腦海突然浮起尋晚阿桃耐心地幫手修改句子，更加願意同穎怡討論點先可以寫得好啲，對阿桃嘅印象有所改觀，心入面好似打咗無數嘅死結咁。

明明自己同月伶同一陣線，槍口理應一致對外，但阿桃而家有恩於我。穎怡嘅心又好似一團亂線咁梳理唔好。

林海螢：屌！小小事都咁煩

海螢一向行事唔拖泥帶水，冇諗過自己朋友會變得咁優柔寡斷，無奈咁「超」咗一聲。

穎怡：咁我點算啊？

海螢：唔知你，我搵仔仔打機算。





點解你可以咁跳脫呢？點解要幫我手呢？穎怡抬頭望住天花板，心緒仍然無比凌亂。

明明係素未謀面嘅師姐，但願意伸出援手，救自己於水深火熱之中。穎怡唯一肯定嘅係，佢對阿桃嘅為人已經漸漸改觀。

是次交戰結果：浩俊 2 穎怡 1