[中學][純愛]讀男校嘅我，到底係咪真係咁難識女仔？: 兄弟

「喂！不如你嚟我屋企呀，反正喺隔離咋嘛，一齊溫書都好呀！」 

我嘅大腦以高速運轉，諗緊背後嘅含意，（媽呀，我唔會咁早破處呀嘛？）諗深一層，其實與其去圖書館溫書，不如去佢屋企溫書，又可以嘈，又可以食嘢，幾咁自由。 

「好呀！」 

半秒後我爽快咁應承咗，我執咗啲書，踢咗對拖就過咗去。 

我入到屋，見到佢間房嘅裝潢係充滿少女情懷嘅粉紅色，床頭有幾隻公仔，書櫃放滿晒唔同科目嘅書，唔通呢個就係band 1女學生嘅房？ 





「我哋識咗咁耐，都冇俾你睇過我間房添，點呀？你覺得粉紅色靚唔靚呀？你會唔會覺得幼稚㗎？」 

「粉紅色可能會好幼稚，但係你可是最可愛嘅女仔喎，咁有氣質嘅女仔，咩幼稚都冇晒啦！」 

「口甜舌滑！」 

喺你儂我儂嘅氣氛下，一把聲傳嚟。 

「家姐！我返嚟啦！」 





一把熟悉嘅聲音喺佢屋企門口傳過嚟，我望一望原來係Argon返咗嚟，再望多次，佢後面有個熟悉嘅身影，熟悉到我無法忘記，化咗灰都記得佢。 

「你好呀！我又嚟溫書啦！」 

無錯！佢就係呀謙，基於佢對於我拍拖嘅事一無所知，所以我每次約會都會勁秘密咁去。 

我匿埋咗喺Isabella間房入面，連頭都唔敢探，默默攞起份notes埋頭苦幹。 

但係人有三急，一時之間好難忍㗎嘛，就喺我行去廁所之際，呀謙佢喺個廁所都行咗出嚟，我同佢四目交投， 





「Sup...suprise!!!」

「賢仔？點你喺到嘅？」 

佢一面問號嘅時候，我最驚嘅情況出嚟啦！ 

「BB，你去幾耐呀？」 

Isabella就喺呢個時候嗌我。 

「BB?你出咗pool咩？點解我唔知嘅？」 

就係咁，我同阿謙落到樓下公園愉快地談心。 

「你好同我解釋吓喎，Argon都知，我呢個Homie唔知？唔好咁過分好喎！話晒都識咗三年啦！」 





好明顯，佢有啲燥底。 

佢急急腳走咗去海皮，嗌極唔等，我唯有追上去同佢解釋。 

「咁...我都有私隱嘅，更何況你嘅性格，我驚傳到街知巷聞啫。」 

「講明先，我知我係大聲公，但係我都知如果真係唔講得，我就唔會講，識咗三年咁都唔知真係失望囉！我唔理，你請硬我飲嘢㗎啦！」 

「嗱，我知係我錯，但係你都唔好趁火打劫住先，講到唔洗儲錢拍拖咁！」 

「唓，扮曬蟹咁！返去溫書啦咁！」 

就係咁我哋有講有笑咁返去溫書。 





「無事啦？」 

我哋一入屋Argon就衝過嚟， 

「幾驚你兩個隻揪呀。打起上嚟，醫院見㗎啦！」 

「傻啦，呢條友仔，請佢飲雪碧就無嘢㗎啦。」 

就係咁呀謙同Argon繼續溫書，我就繼續上我嘅私人補習班。
===================================================================================
後面有班兄弟 將我頂起