[中學][純愛]讀男校嘅我，到底係咪真係咁難識女仔？: 約會

「不如我地一齊去掃街呀？」

「好呀！我想食咖喱魚蛋！」

我去左買兩串咖喱魚蛋，哇，足足20蚊呀！我個人肥左，但同時，個荷包瘦左。我將啲咖喱魚蛋俾左佢，佢好有禮貌，接左串魚蛋之後，就開始大快朵頤。

「嗯！啲魚蛋好好味呀！」

我見到佢食到嘴邊流住啲咖喱汁，呢個時候，我個腦出現左4個選項：用條脷奶乾淨佢，用紙巾幫佢抹乾淨，用手指幫佢卒走，無視佢作為一個正常人，我選擇咗第二個選項。





「你呢度污糟咗呀！」

我鼓起勇氣幫佢抺乾淨。佢捉住我隻手，控制我隻手幫佢抺。我個心跳得好快，同女仔身體接觸，我都係第一次。

「唔該你呀！」

佢到而家都未鬆開隻手，我就咁樣輕撫著佢塊面，我呆左足足3秒，3秒之後，我條理智線搶救成功。

「唔…唔使客氣！」





我鬆開隻手，冷靜下嚟。跟住我哋就慢慢行過去天悅啦。

「呢度就係天悅呀？我細細個就想嚟呢度玩啦！」

佢用期待嘅眼神望住琳琅滿目嘅店舖，其中佢望住一間夾公仔舖，雙眼發光，

「我哋去夾公仔囉！」

講完佢就一枝箭衝咗去間夾公仔舖度，佢望實咗隻布甸狗嘅公仔，呢個時候，我利落嘅眼神見到呢十三隻字：夾滿五十次保夾，現夾四十九次。我即刻行到去部機前面，二話不說，喺袋入面攞出5蚊，即係夾到一隻幾可愛嘅布甸狗。





「恭喜中獎！恭喜中獎…」

「哇！賢仔！你好勁呀！」

佢攬住隻公仔，開心咁同我講多謝，我地之後便離開公仔舖，隨住恭喜嘅字句越嚟越細聲，我地越行越遠。呢個時候，佢主動拖起我隻手，我開心到一個點，恭喜嘅語句，彷彿就係祝賀新情侶產生嘅音樂。我哋拖住手離開天悅，呢個時候，我哋就係一對熱戀中嘅情侶，我哋就係一對自由自在嘅鴛鴦。黃昏時分，我哋慢慢行去海皮，雖然途中冇出過聲，但係我個心，係甜嘅。

「我地今日就嚟到呢度啦！」

佢冇理會我，我望向佢，佢望住由黃昏襯托、格外美麗嘅大海，我望住佢嘅背影，陶醉喺佢嘅背影之中。

「我對今日嘅行程好滿意呀！」

佢望住個海同我講。

「咁…我地下次再約？」





佢點一點頭，我微微一笑。

「好啦！時間都唔早啦，係時候返去啦！」

佢提醒我時間，真不愧係大姐姐，我地行返去，簡單道別後，就各自返左屋企。我返到屋企，對頭先嘅每一幕都依依不捨，我隻手彷佛仲可以感受佢嘅溫度，我已經等唔切，下一次「約會」嘅來臨。我沖好曬涼，瞓咗喺張床度，我回想緊今日晏晝嘅事，諗起佢收到隻公仔個刻嘅表情，會心微笑。就係我諗得最入神嘅時候，我俾一個Msg打回現實，「賢仔！聽朝照舊，叫埋Argon喎。」原來係呀謙，佢咁樣叫一叫我都係早啲瞓。費事遲到俾佢小。===============
最美的景色 是你的身影