中四那年，我因為五毫子而成名: 1.14 告一段落？

我帶陳主任走到小食部。

當時Robin還跟啊姐爭論著，聲音比之前的還要大，附近也圍了兩三圈的同學在議論紛紛。

「唔該借一借。」我大聲叫道，好讓開出一條路讓我和陳主任可以進去。

Robin爭論得臉紅耳赤，他應該撐了好久。

「同學啊，你憑咩……」啊姐見到陳主任忽然停了下來。





啊姐忽然變得客氣：「陳主任，咁小事要你大駕光臨。」

「呢度咩事？」陳主任霸氣的問。

「係咁嘅，個同學話碗麵入面有昆蟲，想我地換過一碗。咁根據我地公司嘅政策，貨物出門係恕不退換嘅，所以我地都冇辦法幫個同學換，陳主任你點睇？」啊姐的語氣是前所未有的禮貌。

「比我睇下。」陳主任說。

陳主任看了一下，然後說：「你換過啲野比個同學啦，同你地主管講翻今日個情況，呢件事就告一段落。」





「好嘅，明白。」啊姐忽然變得溫純。

啊姐把有問題的碗麵收回去，然後下一秒她端出一碗麵，那個小男生拿著麵離開。

「你地兩個宜家冇問題啦？」陳主任問我們。

「點解頭先你唔影低佢再同負責人講？我覺得呢個係食物安全嘅問題。」Robin有點激動。

陳主任對著我們兩個還有圍著的群眾說：「我明白同學你好關心食物安全嘅問題，我地作為老師都好關心，不過我更加關心同學有冇野食，所以緊係要求佢地換過碗麵先，宜家最重點嘅問題都解決左，同學可以攞到碗麵。老實講，小食部一向都提供優質嘅食物比同學，只不過偶爾有小小問題，我地校方都有機制定時反映比承辦商，不過同時都希望同學都可以包容啲……」





圍著看湊熱鬧的同學們聽到陳主任在訓話後慢慢散去，我聽到有些同學失望的說道：「唉，都預左係咁。」

「算啦，都唔會有咩改善，包容下啦。」

「咪又係要食。」
後面的人散去，就剩下我跟Robin兩個人在陳主任面前。

「唔該曬你啵，陳主任。」Robin忽然打斷了陳主任的話。

「我未講完，做咩打斷我講野咁冇禮貌。」陳主任生氣的說。

Robin囂張的跟陳主任說：「你最關心嘅問題解決左，而我最關心嘅問題，好似你上次講，我咁大個人，應該要自己解決。」

我對著Robin微微笑以示認同，然後堅定的對陳主任說：「係，我地會自己解決。麻煩曬你，陳主任。」





說罷，我跟Robin兩個很有默契的轉身離開，就剩下陳主任在小食部。我偷偷別過頭，只看陳主任帶點憤怒卻又迷惘的表情。

「黎緊嘅事，睇黎要靠自己。」Robin深深呼出一口氣。

「係。」我堅定的說。

「Joyce，你會唔會陪我一齊解決？」

「我會。」

「你係我最好嘅拍檔。」Robin說罷環顧了四周，然後用手掌輕輕揉了一下我的頭頂，我感覺我的心砰砰的跳著。我對於他突如其來的行為有點意外，可是我不反感。

「喂，你唔好以為你高過我就可以摸我個頭。」我拍了一下他的臂彎，抿起嘴巴假裝討厭他。

「好啦，好啦。」





「我過翻去食飯喇，朋友等緊我。」

「我都係，Bye。」