我以為自己要孤獨一世，直到你出現: 第五十九章-宵夜
唉，Cindy都唔知幾時會番，呢段期間盡量搵多啲錢先得，所以7-11果邊有得番我都盡量番
「喂，呀賢捨得番工啦咩～」我一入門口，Ben已經問我
「屌你啦」我向住Ben舉中指，之後就入咗休息室換衫
係7-11番工既時間過得好快，可能係我同Ben不斷吹水，再加上本來番時間就唔長，係兩個因素之下，好快就收工啦～
「喂，呀賢！上次.....果...條女....係門口....呀」我換緊衫，Ben就沖入黎一邊抖氣一邊講
「嗯，我朋友黎架～」我好淡定咁答，仲以為係咩大件事
估都估到應該係Chris，Ben淨係見過Chris黎7-11搵我，再加上Cindy仲係美國，所以一定唔係佢啦，不過Chris又會無啦啦接我收工既，搵我做咩呢
「呀賢～」我收工一行門口就見到Chris，挨住牆撳緊手機係到等緊我
「你又會係到既？」雖然我都明知佢係接我收工架啦，但係循例都問吓啦
「特登接你收工去食糖水～」
「好呀！」我好爽快咁答應，因為好耐都冇人陪我食糖水啦，而家有人主動約我何樂不為呢
我同Chris去到附近既糖水舖，可能今日係平日， 所以唔洗好耐就入咗去
「兩位想食啲咩呀？」個姨姨擺低咗個餐牌就問，完全都唔比人考慮，雖然我都係食個樣野
「一碗腐竹雞蛋糖水～一碗芝麻糊，唔該」正當我諗住叫既時候，Chris突然開口講仲幫我叫埋野食，佢又會知我食咩既
「野食到～」個姨姨擺低咗兩碗野
「你又知我想食咩既？」
「之前見你食過咪估下叫得啱唔啱」Chris笑住咁答我
原本佢一直有留意我，所而我對佢一無所知
食完野之後，我地見時間仲早同埋食到好飽，所以就係周圍行下，同Chris一齊好似去邊食咩都冇負擔，唔怕佢會唔習慣
「如果每日食完野都可以落街咁行下就好啦」Chris突然間同我講
「都係既，但平時我地放工都好攰，仲點有精力行呢」我苦笑回返佢，呢啲問題真係要小心啲答先得
我地兩個冇咩講野，只係靜靜地行下，但氣氛居然一啲都唔尷尬，所而仲好舒服。我地行行下，不知不覺行到我細過住既附近
「Chris 我帶你去一個地方呀」係喎！有個地邊應該幾啱Chris
「嗯？邊度呀」Chris疑惑咁望住我
我好自然地拉住佢隻手，拖住佢快步行黎到我細過最鐘意去既地邊方 ——公園
「點解你帶我黎呢到呀，你當我小朋友咩」Chris見我帶佢黎公園，哭笑不得咁望住我
「我見你上次同妍妍玩鞦韆玩得咁開心，就估你細個應該都幾鐘意玩」Chris聽到我咁講嚇一嚇
「呢個地方係我細個最鐘意既地方，成日會係度玩鞦韆傢... ...」我未講完Chris已經坐好係鞦韆之上，好似一個急不及待坐上要玩玩具既小朋友一樣
「不如我地一邊玩一邊講啦」Chris笑得好開心
「我細個果陣成日都黎呢到玩傢，你成日見到果個仆街希都係呢到識傢」我不知不覺同Chris講起我細個既事
「吓？原來你地咁已經識咗咁耐！」Chris對於我同呀希識咗咗耐好驚訝
「嘩！呀嫂！！」呢把聲...又撞到佢啦...
「Hi ，呀希咁啱既？」Chris已經變到好自然咁問呀希
「係呀，我啱啱收工路過就見到你地兩個居然係到拍拖仔啦」呀希行到Chris同我既鞦韆旁邊
「啱啱呀賢講起你，你就咁啱出現啦」Chris同呀希講返我啱啱提起我地細路點相識
「係呀！細個果陣成日落黎玩都見到呀賢，點知有一次我比個死肥仔恰，呀賢果陣超人上身大戰死肥仔，之後我地兩個都比個肥仔打到喊，就係咁我地就識咁對方啦」呀希一本正經講我地相識經過，但旁邊既Chris一早已經笑到講唔到野
「屌！你可唔可以唔好講到咁仔細呀」我一野拍落呀希既頭，佢知唔知柒傢！
「賢哥！由果刻開始我就決定一生一世都跟住你啦，我當然要仔細都咁你既英勇事蹟比呀嫂聽啦」呀希居然覺得呢件柒事係冇問題
「呀希你收工，唔係要早啲返屋企咩」都係快啲趕佢走好啲呀，廢事佢愈講愈多柒事呀，而Chris聽呀希起我既事，聽得津津樂道
「唔趕呀，咁難得見到呀嫂同你當然要好好同你地吹下水啦」呀希冇理到我，繼續同Chris係到傾計
「呀希，我想問呀賢中學有冇追過女仔呀」Chris問完呀希之後，特登向我單眼
「嗱！呀希你唔好亂講野呀！」我即刻落鞦韆暗着佢既咀
「呀嫂，你問到我一定同你講...」呀希掙脫我隻手，好興奮咁同Chris講，Chris點曬頭，等呀希講
「我當年幫過呀賢追隔離班既女仔傢！當年中四呀賢同我講佢鐘意咗個女仔，之後我搵佢拎咗個女仔既Facebook，等佢可以搵人吹下水啦」呀希開始滔滔不絕咁講，而Chris邊聽邊笑到合唔埋口
「你唔好再講呢單呀！！」呢單係我既黑歷史呀
「賢哥，你等等我講埋先！點知佢呢係條友仔連Facebook同人said hi都諗左兩日先send出去，我見佢進度咁慢就自動請纓幫佢溝女啦，之後臨近聖誕我就順手幫手約係學校交換禮物」講到呢度呀希自己都忍唔住笑出嚟
「頂你！居然仲好意思提！你居然拎錯咁隔離班個肥婆既Facebook 呀，我居然同個肥婆傾咗咁耐，仲要約出黎交換禮物，最後仲要比個肥婆同其他人講我鐘意佢！！你居然仲提！！」我追住呀希，再忍唔住要打佢既頭啦
一場打鬧之後，呀希被我追打到走咗返屋企，而係一旁食花生既Chris已經笑到肚都痛
「估唔到你中學果陣口味咁特別呀」Chris已經笑到停唔到
下次一定唔黎呢頭呀，太易撞到個仆街希啦，我地返到屋企之後，我襯Chris去咗沖涼時，諗住睇下Cindy回我wts未，但好奇怪地...變左單剔既...？
「呀賢，到係沖涼啦」
「呀賢？」
「呀賢？」
「吓？咩呀？」啱啱諗得太入神，聽唔到Chris叫我
「你快啲去沖涼啦，你冇事嘛？」Chris有啲擔心咁問我
沖完涼之後Chris已經返上床，好似訓著咗，我訓上去佢留比我既空位，臨訓之前我望一望手機，仲係單剔...
「呀賢 你有冇事呀」Chris突然開口講野
「我諗我冇事...」呢一刻，我真係答唔到我冇事...