我以為自己要孤獨一世，直到你出現: 第五十二章-回港

我左轉右轉終於黎到秋葉原啦，果然真係毒撚天堂呀！全部都係模型舖～漫畫舖，當然唔少得既夾公仔鋪，而商舖入面全部都播着各式各樣動漫嘅主題曲

我隨便搵左一間夾公仔鋪行左入去。嘩！好大呀！而且仲係有兩層呀，我逐步睇一睇，睇下有冇小熊維尼夾，但都係好似都係得我冇興趣既公仔，或者係啲野食.....

行完地下成層都冇興趣，唯有上埋樓上睇睇，反正有時間，一行上二樓居然就見到小熊維呢呀！我見到佢單手掛住係支白色欄杆上面，就好似同我打緊招呼咁樣呀！我即刻停低咗係部機面前，用唔同角度睇佢，好似都差唔多會跌架啦喎

我即刻去就係附近搵唱散子機，準備用我高超既技技術帶小熊維尼番屋企！

唱完錢之後我就即刻到部機面前，望一望幾多錢？100 Yen一次，500 Yen就六次，梗係100 Yen啦，我對自己既技術有信心，於是我就入咗100Yen入去開始夾公仔



仆你個街呀！點解夾極佢都唔落去既？呢次一定得既，我再入多個100 Yen入去，屌你老母呀！小熊維尼隻手洗唔洗握得咁緊呀？謝天華上身呀！單手攀石聽電話！

我即刻打開手機上網，搵吓有啲咩方法，屌呀！網上啲人全部都係話呢啲夾公仔機係騙案，睇落去好似好易玩，實質上全部都係好難跌出黎

屌，可以點做呀？我真係好想要呀！我不斷試嘗試，都係唔得......冇幾耐有個店員過黎，同我講左幾句日文，就幫我調整左一下位置，我再試下，哇！我得咗啦！

我好開心咁係個出口位攞隻小熊維尼出黎，個店員都好開心敲起個鐘，俾咗個袋我裝起小熊維尼仲講咗句野，雖然唔知佢講咩，係都應該係恭喜說話

我好開心攞住小熊維尼準備行出大街，有一男一女努力緊夾緊蛋黃哥喎，反正都冇乜野做，我就行過去睇下其他人夾



過咗冇幾耐，果一男一女夾夾下好頹咁樣走開咗。吓？！就黎跌架喎，我見到店員準備行緊過去調整，我即刻衝過去，梗係唔可以放過呢個汁雞機會啦

我諗都冇諗過就入咗個100 Yan入去，再要調校好角度，一野禁落去，得咗啦！輕鬆～

我攞住蛋黃哥同小熊維尼行出大街，再到附近既模型舖同動漫舖睇下。居然咁啱比我見到Cindy最中意既美人魚呀！

買買買！緊係買啦，等佢返黎香港俾個驚喜佢先

就係咁樣，我全日就係秋葉原不停咁樣行吓有啲乜野睇，唔同動漫既周邊產品，漫畫，甚至男士們都喜歡既AV都有得賣，等我買返兩套俾呀希同呀俊做手信先～



係臨離開之前我都特登走去食松屋，因為實在太好味啦！食完之後我就番酒店check out ，搭JR去機場

我係機上望住個窗口，再望一望隔離空既座位，好掛住Cindy，佢今日一個wts都冇，可能佢仲未到美國

飛機起飛啦～我係機上不停睇同Cindy係日本影過既，唔覺意就訓住咗～

「先生，麻煩你扣好安全帶」我feel到有人拍一拍我膊頭就醒咗啦

我都立即扣安全帶，準備降落啦～我按住指示行出機倉，再攞埋行李，就走出機場啦～

Un.....我都番自己屋企算啦，反正Cindy又唔係屋企，我去邊到等佢都係一樣姐，而且自己屋企番工都方便啲～

我番到屋企，房門閂埋咗，Chris應該訓着咗覺，我慢慢打開個行李篋，諗住執返啲污糟衫出黎洗，係美人魚公仔擺埋係邊好呢

「咦！你番黎啦～你隻手攞住啲咩呀？」Chris突然開門走咗出黎！



「冇野呀！呢個送比你呀～」我即刻嚇到將隻手收係背後，我攞個蛋黃哥鎖匙扣比Chris，諗住打發佢走

「咁果個呢？」Chris指住我係秋葉原用100 Yan夾到果個蛋黃哥公仔

「都送埋比你呀」反正我都唔中意蛋黃哥，跟住送埋比佢

「好呀，多謝你，我訓啦」Chris過黎攬左我一下，之後就好開心攞住兩隻公仔番入房

我執完行李之後，就去咗沖涼，出到黎我望一望手機，Cindy仲未搵我，會唔會有咩事呢？我望住我同佢張相，諗返起都好開心！