我以為自己要孤獨一世，直到你出現: 第四十八章-迪士尼(下）

由商店出咗黎之後就拎咗一張樂園地圖，我好興奮咁睇緊要玩一個機動遊戲先呢

「Cindy，我地去玩呢個，我想玩呢啲機動好耐啦」我好興奮咁指住地圖上既一座英式城堡

「呢個呀... ....好啦」Cindy諗咗一諗先再講

我好開心咁拖住Cindy行去我地既目的地-英式城堡，可以同Cindy一齊玩到真係好正呀

「呀賢，你好中意玩呢啲機動遊戲架？」排緊隊果陣Cindy突然問我



「係呀，玩呢啲機動遊戲好正呀，果種離心力真係好刺激呀」我好興奮咁同Cindy講

排隊果陣Cindy拖到我實一實，仲要有啲手汗，佢好似好少會咁樣，好似怪怪地

「Cindy，下一輪就到我地啦！」我地排左一個幾小時終於排到我地啦

「嗯...係呀」Cindy既表情好似怪怪地

「Cindy，正呀，我地坐前面呀」我好期待一陣架機開啦，好耐冇玩機動遊戲啦



原來係室內跳樓機呀！我同Cindy坐好之後架機開始郁啦！

全程我都好享受，玩得好開心係到尖叫，但好奇怪過程中Cindy好安靜，難道佢一啲都唔驚？

玩完一轉之後架機終於慢慢停咗，我好興奮咁望向Cindy先發現佢手震緊

「Cindy，你無事呀嘛？點解手震震既」Cindy個樣好似有啲唔妥

「我ok... ... 呀」我落車先，之後伸手去扶一扶Cindy，發現佢出曬手汗，直頭要攞張紙巾印先會乾呀！



落咗車之後，我地慢慢行到睇相既地方

「呀賢，不如我地唔好睇相，快啲走啦！」Cindy諗住拉走我，唔比我睇返啱啱臨完影既相

點知係臨走果陣就show咗我地嗰一張相，相中既Cindy好似驚咗咁用力合埋雙眼

「Cindy，你... 係咪好驚呢啲機動遊戲傢」我望向旁邊既Cindy，佢既樣好尷尬

「呀賢...其實我好少玩咁刺激既機動遊戲」我地行返出去，搵咗個位坐低，等佢可以冷靜下

「傻妹，你應該早啲同我講，唔好勉強自己呀」我好心痛咁摸摸Cindy既頭，佢啱啱一定好驚啦

「但你好想玩，我想陪你呀」Cindy細細聲答返我

「多謝你呀，咁我地下一個去番一個啱你既地方啦」我有一個咁既女朋友真係幸福呀



「咁我地下一個地方去邊呀」Cindy休息咗陣好似精神番啲

既然Cindy唔啱玩啲刺激既野，靜態野一定啱佢啦，我打開地圖睇一睇，有啦！咁帶佢睇美人魚劇場一定冇錯啦

「呀賢，我好鐘意Ariel 傢」Cindy見我帶佢行緊去美人魚劇場，成個人即刻好活躍

我地咁啱遇到佢差唔多開場，所以等咗一陣就可以入到去，入到去之後Cindy好快就搵位位坐低，好開心咁等開場

同啱啱等玩英式城堡個機動遊戲果陣真係差天共地，戲場終於開始，Cindy好似小朋友見到自己最愛既公主一樣，目不轉睛咁望住舞台，到最後完既一刻，佢仲好大力拍手

「呀賢～呀賢，你見唔見呀Ariel真係好靚呀，我都好想成為佢咁樣既公主呀」我地一邊離開Cindy一邊講

「你一直都係我既公主呀」Cindy聽到我講，突然有少少怕醜



「我地去下一個地方啦」見到Cindy咁開心真係好

由於Cindy好驚玩機動遊戲，所以基本上全日都係玩一啲劇場同觀光，周圍影吓相，但係冇所謂啦，只要佢中意，我都一樣中意

「呀賢，差唔多夠鐘搵位睇煙花啦」Cindy一講起就好似好期待咁樣

「好呀」我都好期待可以同心愛既人一齊睇到煙花

行緊去搵位睇煙花果陣，我見到一間精品店，諗都冇諗就拖住Cindy走咗入去啦，入面全部都係公主衫同毛公仔呀！我好心急咁行去毛公仔果區，小熊維尼你係邊呀？

搵到啦！唔同大細既小熊維尼整整有齊，咁係貨架上面，而大小由下至上咁排，我一直望上去，嘩！係最上面果個貨架有一隻特大既小熊維尼，我立即搵店員指住小熊維尼示意，我要呀！

店員攞咗梯過黎，把特大既小熊維尼攞落黎，並且交比我，嘩！佢除咗好睇之外仲好撚重呀....不過可以攬住咁大隻小熊維尼，真係好滿足呀！

我將小熊維尼擰轉身，睇一睇幾多錢先，屌你老母呀！三萬幾Yan呀，搶錢呀？唔怪之得啲人去親迪士尼都會話銀包大出血啦.......



「Cindy，幫我同佢影張相呀～」都係算啦，邊有錢帶佢呀.....都係影相留念

「123笑～」我舉高小熊維尼隻手，露出笑容

我搵番店員，正當我遞番最中意既小熊維尼比店員，好唔捨得呀！有啦！我立即縮番手

「Cindy～買比我啦～」我攬實小熊維尼，係Cindy面對左扭右扭，十足十小朋友咁樣

「Cindy係唔會比你架～」吓，玩撚完啦......唉，算啦，佢已經包咗我黎日本，下次黎先買啦～

「我都話Cindy唔會買比你呀！」我諗住遞番比店員，點知Cindy係我手上搶咗小熊維尼，攬到實一實

究竟佢想呀？又話唔買我，轉頭又搶番黎，仲要攬實埋添，佢啱啱好強調「Cindy」，佢咪係Cindy囉～呀！我知啦



「老婆仔～你買比我啦」我用嗲聲嗲氣去向佢撒嬌

「好啦～」Cindy比番小熊維尼我，仲係個手袋到攞咗張信用卡

我接過張信用卡，好開心咁走去Counter比錢，我一手攬住小熊維尼係腰間，另一手拖住Cindy好開心～好滿足呀！

「咁我地可以去睇煙花未呀？」當我陶醉緊隻小熊維尼

「可以呀」我點頭回應

我同Cindy去到一個高處位坐低咗，一直等～我望住部電話，明明都9:30啦仲未開始既

「咻～～～砰」有啦！突然有幾道野射上天並且炸開，原來係煙花黎架！

真係好靚，難怪Cindy咁期待啦，一道道既煙花相繼係天空中炸開，形成迪士尼人物，唔知有冇小熊維尼呢

我即刻攞起手機，等待小熊維尼出現，過咗冇幾耐，有啦！一隻又大有可愛既小熊維尼呈現左係天空，我即刻影低佢

「呀賢呢邊呀～」我擰過去見到Cindy揸住手機準備自拍，我露出燦爛既笑容

放完煙花之後，我地同其他人一樣搭JR出番去，係搭緊JR既途中，我攞返今日影啲相出嚟睇，望到Cindy燦爛既笑容，雖然冇得玩機動遊戲，但係都已經令我好滿足