我以為自己要孤獨一世，直到你出現: 第四十四章-出發

距離飛仲有一日咋，但係人事部姨姨都係未回覆我，唉......等我仲以為可以同Cindy去日本添

「呀賢～不如改第二日啦」Cindy抬高頭好失望咁講

「唯有係咁啦」我都有少少唔開心，但係除咗改第二日，我都唔知點做好......

「唔緊要～最少我都係日日都可以陪住你呀嘛」我摸一摸佢個頭，唯有咁樣講安慰Cindy啦

「好啦～不如我地訓囉～」Cindy聽完我講，心情都好似好番啲



「嗯」我講完之後就熄燈冚好被，再用被攬到Cindy實一實，天氣都凍啦，費事Cindy凍親～

無得去旅行，唯有死死氣咁番工～

「喂！呀賢」我聽到背後有人叫我，唔洗問一定係呀俊啦，我擰轉睇，大佬傑！

「早晨呀，傑哥」我都好禮貌咁打招呼，但係好少見傑哥落黎地盤架喎

「係呢，呀賢聽講你屋企有事要請假」佢搭住我膊頭講，唔通佢係特登落黎搵我嘅



「係呀，我屋企有啲事」我即刻影帝上身，扮到好慘咁講

「咁睇吓人手調動得唔得啦～」大佬傑可能見我好慘就諗住幫下我

「唔該你呀～傑哥」我講完之後就走咗啦，希望得啦～

今日呀俊冇番工，連唯一既傾偈對象都冇埋，我都特別頹廢，做咗一陣野就坐低休息咗，收工之後，死死氣地番屋企......

食完飯之後，都係Cindy挨住我一齊睇Netflix ，我同Cindy都冇乜點講野，可能佢有啲嬲我，咁又係既，錢已經唔洗我出，最簡單假都請唔到......



「噹！」我落床我攞起手機睇一睇

「有足夠既人手呀，你申請既假可以放」呀！得咗啦

「睇咩，睇到咁入神呀」Cindy 可能見我mon住手機郁都唔郁

「你瞇埋眼先啦～」Cindy聽到之後瞇埋咗眼，到我比驚喜佢啦，我慢慢走近佢

「你擘大眼啦」我將部手機遞係佢眼前，然後再叫佢

「吓～係咪真架？」Cindy擘大雙眼之後，個表情有啲難以相信

「緊係啦～我地執行李篋啦！」講完之後，Cindy隨即唔知係到攞咗兩個大gip出黎

始終男仔都冇乜野帶過去，都不外乎衫褲鞋襪姐，我好快就執完篋，個篋仲有一大半位，我係床上面見到Cindy就黎執爆個篋，我仲以為佢要帶全屋既衫去添，執完篋佢自動自覺上番床訓覺



今日呀俊都係冇番，唔知佢搞咩呢，好唔好wts佢呢，都係唔好啦！等佢番工再問啦，番工其間，我都周不時wts Cindy 

「仲有兩個鐘就收工啦🥰🥰」

「係呀，我黎接你呀😘😘

「好呀😍😍」

「呠呠～」我一出地盤門口，諗住打比Cindy ，點知佢已經係門口等緊我，仲用架車呠我

「我地出發啦～」我上到車，扣好安全帶，之後大叫

Cindy開車之後，我開咗車內既音樂，興奮到不自覺跟住首歌一齊唱，Cindy都跟着我唱～見到呢條橋就知道差唔多到機場啦，好興奮呀！終於有得去旅行啦，仲要係同心愛既人一齊去！