我以為自己要孤獨一世，直到你出現: 第十五章-拯救

第十五章-拯救

「呀賢咁點算呀？」Cindy好擔心咁問

「唔緊要既，而家先三點半，我同事6點收工架啦，一定趕得切！」我安慰Cindy唔洗擔心，呀俊你去咗邊呀？屌！

我地番上床繼續睇魔鬼神探，但係我地已經冇心情再冇討論劇情，我周不時都有望下個鐘同Cindy，時間不斷係咁過，4:00～5:36～6:23，而Cindy個表情都隨時間過去而越來越沉重，甚至木口木面

我攞起手機睇，呀俊仲未覆.......Cindy望住我



「我去換衫先」Cindy心灰意冷咁講，吓，佢唔係諗住去呀！

「滴～你所打嘅電話號碼暫時接通」我立即再打比呀俊，屌呀！今次響都唔響呀！你死撚咗去邊呀？

Cindy換好衫出到黎，佢著白色針織衫，碎花長裙，白色波鞋，好簡單配搭加埋佢個樣，已經好靚！但係佢一啲表情都冇，雙手攞住我套衫

「呀賢你換衫先，我轉頭車你番去先」Cindy講完就轉身，佢真係諗住去呀！

「唔得！我地一齊面對！話咗會幫你架嘛」我拉住Cindy隻手，用好堅定既眼神望住佢，佢望一望隻手，再望住我



「但係...」Cindy講唔出口，可能係我仲未攞條片啦，佢又唔好意思講出黎

我都唔知點回應佢，換完衫只好跟住佢上車，Cindy揸車速度同尋晚好唔一樣，今日慢到望得清路上行人既衣着，甚至係樣貌，全程我唔敢望住Cindy，淨係望住部手機，等緊呀俊覆

「到啦」Cindy講完就落咗車

我都跟住落車，係佢隔離平排咁行，Cindy同我差唔多高，直頭可以平視，我地越行越慢，唉，呀俊你去邊呀？好後悔冇要條片呀！

「不如等多陣先啦」我同Cindy去對面馬路既長凳坐



我不停mon住手機，呀俊你條仆街仔肯上線未呀！忍唔住再打俾佢，結果都係冇人聽，Cindy 全程都一直低頭

「叮！叮！」Cindy部手機係到狂響，唔洗問啦，一定係肥仔！

Cindy望一望部手機，再收番埋手機，唉，我仲有咩方法幫Cindy呀！快啲諗啦高賢，平時諗點樣偷懶就快諗到，而家諗點樣救番過女仔，就諗唔到，我好想撼頭埋牆死咗佢算啦！

「呀賢呀」Cindy望住我講

「嗯？」我都望住Cindy

「唔緊要啦，佢都話係最後一次，好快過架咋」佢露出好牽強既笑容

「你唔好傻啦！有得第一次，就有二三四次架啦」我有啲激動咁講

「咁唔係點呀.....」Cindy雙眼開始變紅想喊



「我....」我答唔出口，最衰都係我啦，比咗個假希望佢.....

我望住Cindy慢慢走過去酒店，佢入到大堂，我個心跳得越來越快，呼吸都越來越急促，我都跑過去跟住Cindy後面，好快肥仔就出現，用淫賤既眼神望住Cindy，並拖住佢

唔通就咁玩完.....唔得！死就死啦！

「咪住！」我跑到Cindy前面，扯開肥仔隻臭手，拖住Cindy

「喂！呀生，你邊位」肥仔用不屑既眼光望住我

「我係佢男朋友！」我已經緊張到唔知自己講緊咩啦

「哦～咁又點呀？一係網上見一係上房」個肥仔既語氣十分囂張



肥仔諗住唔理我直接想拖住Cindy上房，我大力拍開佢隻手，再將Cindy拉到我旁邊，肥仔即刻啤住我，諗住再伸手過黎拉開Cindy

「噹！」我部手機突然響

我一邊護住Cindy，另一隻由褲袋拎手機出手機，一睇係呀俊條仆街仔呀！！！我閘刻禁入wts到，條片啱啱好load完

「好呀！一於網上見啦！」我show條片比肥仔睇

「唔怪之得，你咁熟面口啦，原來係你，你而家想點呀！」肥仔好緊張望住手機條片

「你唔好再煩Cindy，如果你再拎相威脅佢，呢條片就網上見，我相信啲人對呢啲柒片更加有興趣」而家優勢係我到呀

「你好野，你唔好將條片放上網，啲相都唔係網上見到」個肥仔比我激到嬲到爆炸，但又冇野可以反擊

個肥仔講左句粗口，之後個肥仔就轉身走咗



「Cindy，佢走咗啦！」我一擰轉身，Cindy就攬實我

「嗚...鳴...好彩.....有你係到咋....嗚...」我都攬實喊緊既Cindy，身體不斷係咁震，佢啱啱應該好驚啦

周圍既人都望住我地，個個都用奇怪既眼光望住我，以為我整喊佢呀..........

「不如去海旁行下囉～」費事個個都望住我地啦

「嗚....好...」Cindy好似好番啲啦