我以為自己要孤獨一世，直到你出現: 第四章-番新工

我刷好牙，洗好面，照緊鏡睇下自己邊到污糟

「邊一個發明了番工～我要給他米田共」鬧鐘係到響，我係廁所出黎申手禁息佢，之後我就出門口啦

我提早少少到達目的地，見到一個沙塵滾滾既地盤，有少少想走......

「喂...你好呀，我係公司新....請既同事，我已經到咗.....」請我打比接頭人，唔多唔少都有肴低

「嗯.....你去咗上安全堂先啦，我9點先番到」聽把聲佢應該啱啱訓醒



上完果個濕尻安全堂，之後一出黎，已經見到有個中年男人企係到

「呀賢？」果個男人用懷疑嘅眼光掃射我

「係呀」我即刻行過去

果個中年男人一路行一邊自我介紹，仲講埋間公司背景。好快我哋就行到架步，一入到去果然真係清一色麻甩佬

「大家好，我係啱啱新來嘅同事，叫我做呀賢得啦」我深呼吸，鼓起勇氣大大聲介紹自己



「你好呀」

「叫我呀俊得啦」

好彩一眾同事都有回應我，如果唔係就尷尬囉～

如是者我都返咗新工已經成個星期，感覺都唔錯，除咗好撚攰之外啦。

只係頭兩日柒柒地成日都唔知自己要做咩，要D師兄帶住先可以，都算好好彩同佢地打啤牌都好快熟絡。



「喂！呀賢今日個樣望落攰既」呀俊行到我隔離

呀俊係帶住我做野既師兄，同我年紀都差唔多，但呢條友仔好早就結咗婚，女都生埋，仲成日笑我孤兒仔，叫我快啲結婚。

玩我咩女都未有，仲叫我結婚？何況我咁既身世，點會有女想同我一齊呀～

「係呀，尋日夜晚有啲野做」唉～尋日放工之後仲要返7-11，點會唔攰呀，係人都散呀。

為咗還債，唯有頂硬上啦

「講件事比你醒醒神，最近公司嚟咗個女仔，派咗黎落嚟地盤，啲人話都幾靚喎，得閒同你去𥄫𥄫」

「係地盤做得既可以靚得去邊呀，多數咪係閪口閪面既老女人，你係咪聽錯呀」聽呀俊講完，我即刻諗去上次見工嗰個老女人

真係諗起都打冷震呀



「咳！咳！你唔係講緊我呀嘛？師傅」一把冷漠既女聲係我背後傳出

嚇到我眼都碌大，仆街！唔係咁啱得咁橋呀......咁都比本人聽到，六合彩又唔見我中

「你好呀！緊係唔係啦」呀俊擰轉身同個女人講野？！而我完全唔敢擰轉身

今次真係尷尬囉

「咦？！咩咁晏啦～原來夠鐘收工lu。冇咩事既我哋走先啦，byebye」呀俊望一望隻手錶對住我，扮晒野咁

講完之後就嗱嗱聲扯走咗我，而我全程冇出聲一直低頭，好撚驚比個老女人點相呀

我哋加快腳步，怕個女人會追上嚟，來者不善呀，啱啱明知我地講緊佢，佢都開口講野，非善類呀呢個老女人



我哋好快就番到架步

「仆街啦今次！」我除咗安全㡌之後係到講，真係心肝仔都仲震緊

「喂喂喂！呀賢，啱啱條女掂喎，後生女嚟傢」呀俊好興奮咁捉住我講

「係咩，由佢啦」

我随便答咗佢幾句就換衫收工，就去番part time 

後生女又點樣呀，佢啱啱個勢想溶咗我地呀，呢啲女人遲早變老女人下次返工見到都係調頭走呀，廢事到比佢認出，到時一定好麻煩

我番到7-11公司打卡換衫就出去收銀機幫手收錢，真係人攰到𥄫女都冇興趣啦，幾時先可以舒舒服服過日子呀！！！