咁廢既超能力都有？我寧願唔要呀…！！: 9

『喀喀。』

「我響度，你可以入黎。」

『咔。』「陳社工，班主任叫我落黎問下我地同班同學既情況。」走入社工室既係女班長。

「嗯…佢地都需要大家既關心。」

女班長望一望陳社工對面既三個人，粗嘴同肥成顯得一臉嚴肅。





「喂…」女班長想伸手搖下粗嘴，不過最後縮左手，「你地無野呀麻？」

「我同粗嘴都無野，但係小氣輝佢望到任sir跌落黎…望到，你知咩意思。」肥成代替粗嘴開口。

「……」我感到女班長既視線轉向我，但係果份視線停留響我精神既外圍，未有穿透直達我的內心。

「呀…陳社工，如果佢地無事我想帶佢地返上班房先。」女班長以乖巧倩兮的笑容對陳社工講。

「嗯，好。」





我企響靈魂既高點，感覺自己既肉體緊隨肥成粗嘴同女班長行出社工室，行左兩層樓梯後停低。

「肥成粗嘴，你地上返去先。」

「咁你呢？」

「我帶阿輝去圖書館。」

大概係講左呢d掛，我唔太記得。





我見到自己既肉體跟隨女班長去到圖書館一張角落既檯坐低。

我見到我雙手擺響檯下，雙目無神垂視住檯面。

「……」女班長眼中望起黎似有幾分無奈。

亦都唔知過左幾耐，唔知聽到幾多次落堂鐘聲之後，我望見自己同肉體之間出現一條線，我借住呢條線向女班長問，「其實你係咪覺得我真係一個好差好衰既人？」

「若果我簡單咁話唔係，你有幾多成會信我？」女班長面對出乎情況發展以外既問題仍然對答如流。

「……」

女班長講中我諗緊既重點，我有幾多成相信佢？對於我口中耳提面命喜歡的女班長，我可以做到幾分既信任呢？但係，又同令到我身處而家既呢種狀況又有咩關係？

「你知唔知…我覺得自己就係全班最聰明果個？」女班長沒頭沒腦的問出一個好奇怪既問題。





「……」

「我呢種諗法唔係隨便無根據既自信，而係同每個同班同學傾計過，了解過佢地既我，我發現我係凡事諗得最深入，最願意了解核結所在既人。」

「所以，當呢一次連我都唔知道我應該企響點樣既位置望住阿輝你，我開始明白咩野叫做極限。」

我嘗試理解女班長話語中既心思同含意，同時，果條連我同肉體既線響我理解既同時慢慢一步步收短。

響我用盡我所能用既力氣之後，我唯一得到既理解係，女班長嘗試令我首先明白佢係一個企響我側邊既人，唔係憐憫亦唔係向我作出施捨，就係一個同我企響相同水平線既存在，中間更無任何利益弊害關係，若果我連佢呢種思緒都無辦法猜透同理解，咁就更加唔洗提任何溝通。

果一條無形既線，終於引導我重掌自己肉體既質感。

「我…」由震撼中逐漸回復既我再度開口，「我…」





「嗯。」女班長並無講d乜，只係簡單既肯定佢聆聽者既位置。

「我…響果一刻親眼見到任sir眼中既野。」「但係我唔知道…唔係，或者其實我知道，任sir就係一個簡單咁勞心勞力教學既老師，但係因為不得其法而從未備受我地尊敬而且承受無數壓力跳樓…雖然呢一切係我自己估自己所諗，」「我唔係要為左果少少無謂既自責感而推翻過往我對任sir唔好既事，我唔係要做聖人，我唔係要幫自己搵一個救贖既藉口，我仲未差到容許自己自我寬恕成為推到任sir行上呢一步呢件事既一份子果種感覺，我仍然知道就算可以無事發生亦唔代表我會去認同任sir…但係…但係…」

「…」女班長比我更快一步諗出我真正既思想，「如果單純係任sir自殺既事上談論邊個需要負責既善惡論，對於你黎講仍然係一個唔希望逃避但係亦暫時無辦法承受既概念。但係對於你心入面沉甸甸既感覺，需要一個迫切既出口。」「果個出口唔在乎係咪超乎倫理概念，亦唔規限響人世常識，果種係響你身上確確實實發生既超自然現象。」「你需要既係一個凌架你常識既存在，借你突然得到既能力去搵到一個困局既出口。」「但係唔需要因為自己需要外力而沮喪…因為我地原本就係不停依靠外來既野令自己成長。」

「如果真係要講既話，就係要你自己去諗，由你得到能力開始…唔需要理能力令你發生乜事，而係你由能力中到底得到d乜？」

「……」似懂非懂既我將女班長既字句暫時收埋一邊，再問出另一句風馬牛不相及既問題，「其實你係咪好耐之前已經知道我鍾意你？」

「嗯。」

「係咪唔止我一個人鍾意你？」

「係掛。」





「咁你…咁你點諗？」原本我想衝口而出問你鍾唔鍾意我。

「有咩點諗丫…成班都細路仔…」女班長拓住腮，視線遊離至其它地方。

「嗯…嗯。」我明白左一d野。

女班長深深嘆一口氣，「上返去班房啦？」

「嗯。」