《我坐上了尾班輕鐵》: 6.消失的一節車廂

「頭先聽你女朋友講你叫呀興喎，我叫呀鳴，杜一鳴。」我向呀興說。

呀興指一指呀宜問：「你女友？」

「唔係呀...前女友。」我尷尬地回答並試圖轉移話題。「係呢...你開黑盒唔驚有事發生咩？」我問呀興。

「驚咩吖～一個咁細既盒可以發生啲咩？」呀興反問。

「我頭先見到個盒底刻咗行細字，所以先唔郁個盒咋。」我指向那一行細字給呀興看。隨後說：「個金屬球咁精緻唔知有咩玄機～加埋由輕鐵上車一刻就發生既一連串事件，我好難唔諗多...你見過兆麟站咁黑未？」





「你咪生人唔生膽啦！我未見過咁黑，可能今日供電唔穩定先會咁！你番咩工架？」呀興問。

「我做酒店既，不過同大細膽有關係咩？」

「梗係有啦！酒店最多古靈精怪事情發生，你唔驚咩？」呀興調侃我。

我不想搭理他。

呀宜和Wincy 在我們旁邊的坐位聊天。好像在聊名牌折扣的事情，我沒有太大興趣聽下去便繼續把玩手中的黑盒。





金屬球的齒輪仍然默默地運作，細心聽有微弱機械運作的聲音。我留意到金屬球旁邊有一個凹糟，呈「⋯」形狀，可能需要用鑰匙或是某一樣物件去打開，觸發之後不知道會發生什麼事。

「喂～你估下個波有咩用？」呀興問。

我敷衍地回答：「我唔知呀～從來未見過呢啲野...」

呀興從我手上接過了金屬球。我靜靜看著他。

「呀！後面果卡唔見咗呀！！！」Wincy突然驚呼。





呀宜聽到後嚇得單手掩面，另一隻手捉緊Wincy 手臂。

我嚇呆不懂反應，呀興依然站在我的身旁。

車廂內的人陷入一片恐慌。有人尖叫道說要下車，有人一聲不語地默默觀察（也有可能像我嚇呆了不懂反應），亦有人嘗試打電話求助可惜沒有訊號。

混亂之際呀興被人撞了一下，不小心手滑把金屬球掉地上了。

「啪！」金屬球掉地上的聲音把我召回現實。我馬上把球撿起來，並走到門旁按下與車長通話的按鈕。

鈴～鈴～鈴～

不消3秒，接通了車長。

車長的聲音從擴音器傳了出來：「我係車長，




請問有咩幫到你？」

我連忙說：「車長，我係呀鳴，頭先幫你搬箱果個男仔呢...後面節車廂唔見咗呀！！！」

車長輕笑著說：「咪玩啦，呀叔我揸咗十幾年車，咁荒唐既說話都係第一次聽...」

我大聲說：「我無玩我認真架！」

車長看向倒後鏡，馬上心一驚，不慌不忙地按下廣播。「請各位乘客捉緊扶手輕鐵列車將會緊急剎停，各位乘客請不要擔心，保持冷靜，留在原位。」

「呀鳴你等等，我先報告上公司電台等待指示。」車長的聲音從車門旁的小型廣播傳出來。

「輕鐵 XW 4607 住屯門碼頭方向需要支援。」 車長向對講機說。沒有回應。車長用車箱內的電話打到電台。「沙～沙～沙～」 的聲音在話筒傳出。明顯電話未能接通。

車長只好拿出自己手機打給公司。手機顯示沒有訊號。「搞錯呀！屯門有咩可能收唔到！唔通之前前輩講既結界係真既？」車長煩躁地抓了抓頭髮。





車長做了一下深呼吸，從駕駛廂走了出來。