那些年，我最愛的兩個女孩子: 15

新學年，我換左套新校服，其實都係校章唔同左者，著上皮鞋，都係我對6吋boot，落左巴士就行入校門，我嘅新學校，爸爸第一間嘅中學；樂善堂書院，唔係太好，又唔太差。我慢慢行去我個課室，F.3D，我以為我會係最早一個丫，原來唔係，入邊已經有一個四眼仔坐左係到，睇緊教科書，一個認真學生。
 
愈來愈近八點十五分，大部份同學都進入課室，大家都對我呢個轉校生冇咩興趣，各自返自己嘅圈子，我就一如以往，坐係窗邊望天。如今連媽媽都變成星星，係天空中守護我同家姐啦，不過點解我俾家姐打鑊果時佢地唔黎救我?
 
班主任Miss Law入到黎點名，然後佢行到我身邊
 
「你就係程逸風?」
 
「唔」
 




「歡迎你轉到我地學校，你係北角果兩年嘅事，我好清楚」
 
「唔」我仍然望住個天
 
「個天有咩好望?」
 
「睇下…我父母係邊」
 
「你父母嘅事我都知，你爸爸係到留低唔少足跡，有興趣你可以自己搵下，我之前已經搵過」
 




「唔」
 
「同學，人誰無過，你唔好介懷自己過去」
 
「唔」
 
「今夕吾軀歸故土，他朝君體也相同。最終你地會一家團聚，你要學習放開，明嘛?」
 
「知道啦Miss Law」
 




「有咩可以幫到你同家姐?」
 
「有」
 
「想我點幫你?」
 
「我轉黎目的，係為左幫我媽媽實現入大學嘅遺願，所以，希望Miss Law妳可以俾哂近年F.1-F.2所有英文試卷我」
 
「用黎做咩?」
 
「溫習用」
 
Miss Law好快就拎左近10年嘅卷俾我，而我一返到Hall，就立即成勢咁做卷，同埋開始備課，機會只有一次，為左媽媽，我唔可以就咁浪費左佢。
 
望住筆袋果隻草泥馬，唔知另一隻嘅主人，係到做緊咩呢?